荒島日記（新手、後宮甜）（不定期更新）: 收𡃁

我拖住雪兒走去一邊問。
「點解文健咁唔想走？佢明明好驚班馬騮wor。」

「唔係啊，佢同D馬騮玩得好埋啊，佢仲經常點班馬騮做嘢。」
雪兒講完回頭望一望。

「哦，原來收左一班𡃁，終於有返D地位，所以先唔捨得走。」
我托住腮講。

「收左一班𡃁？」


雪兒唔係好明我講咩。

「咁你都唔明啊？佢平時叫大陸仔做大佬，其實佢最想做大佬，依家有班馬騮聽佢話，俾佢過返舖大佬癮。」
辣椒妹走過黎搭嗲。

「你都知幾多wor，辣椒妹。」
我望住辣椒妹講。

「咁係知啦屌！點解收一大班𡃁然後做大佬啊？巴閉囉！英雄主義！疊馬！我唔妥你，我可以逗你！我唔鐘意你，我可以𢱕你！𡃁仔你啤乜撚嘢啊！」
辣椒妹指住附近一隻馬騮仔，隻馬騮仔嚇到即刻跑走。



「好啦，我地今晚早D訓啦，聽日一朝早出發。」
我講完後就走返去訓教。

雪兒都跟住我，訓左係我旁邊，秋儀亦都走左返黎，然後攬住我隻手臂訓教，辣椒妹望一望後，就訓係雪兒旁邊。




第二朝醒後，我疲勞感終於無曬，同大家執好曬D用品就繼續出發。



班馬騮送左好多香蕉俾我地帶走，隻大馬騮亦都坐左起身，學我地咁一直揮手講byebye，我係馬騮群裡面，隱約聽到好似有馬騮既喊聲。

有唔少馬騮跟住我地尾，好唔捨得我地走，直到我地差唔多上到山頂後先至離開。

「大陸仔，我地係唔係行去有煙個度。」
辣椒妹指住前面座山後既白煙。

「係喔！點解有煙既？唔通係有人係個度住？」
雪兒好驚訝咁望住山後既煙。

「嗯，雖然個度有白煙，但我唔肯定係唔係有人係個度住，我地就去個度睇下啦，不過大家要小心D，就算係人⋯我都驚會係⋯⋯」
我猶豫咁講唔講好。

「驚會係D咩啊？學東哥。」


秋儀回頭問。

「我驚會係野人⋯」
我憂慮個樣完全呈現係塊面度。

「死啦⋯咁點解我地仲要行過去⋯調頭啦！我地同返班馬騮一齊住仲好過啦！」
文健帶頭想行返去。

「我唔驚，有你係度，我唔怕！」
雪兒抓住我隻手講。

「我都唔驚。」
秋儀抓住我另外一隻手講。

「大家！班野人並唔係大陸仔話解決就解決得到㗎，我以前係youtube睇過D片，D野人係會食人㗎，好鐘意攞人類頭骨做飾物㗎！」


文健想說服大家。

「文健，有D嘢點都要面對，你今日可以安全住係馬騮個度，唔代表可以一直安全住落去，我地依家去觀察下，如果真係原始人，我地就再搵個更加隱蔽安全既地方住。」
我講完後對住雪兒微笑。

「走啦！唔好再咁撚多嗲啦！你可以選擇唔跟過黎㗎！」
辣椒妹講完就即刻行去個方向。

「唉⋯死就死啦⋯」
文健死死氣咁跟住。

嗷！來福一馬當先跑到最前帶路。

突然我感到有D不安，手臂起曬雞皮，我望住前面個座山，感覺到我地將會係個度遇上更加大既麻煩⋯⋯