荒島日記（新手、後宮甜）（不定期更新）: 安全套

我攞左包安全套出黎，即刻拆開，拉一拉，扯一扯，0.03，果然係質量既保證，唔錯唔錯～

女神雪兒：你好核突啊大陸仔，你個腦除左鹹濕嘢仲會裝D咩。而秋儀見我係度拉扯個安全套，塊面紅到爆炸：學東哥，你攞個安全套出黎做咩啊⋯

我無出聲，對住兩女奸笑，雪兒俾我嚇到：你想點啊大陸仔，你應承過我唔逼我做唔願意既事咖。秋儀繼續塊面紅啵啵，有嘢想講但最後又唔講。

我哈哈大笑，雪兒俾我突然咁笑嚇到打冷震，秋儀繼續都係面紅咁望住我。

我：唉，唔玩你地兩個啦，我用安全套整個過濾器。雪兒即刻鬆左口氣，秋儀就係度掃風俾塊面散熱。我攞多幾個安全套走出去，係海邊洗左一陣，去除安全套既潤滑油，然後係附近執D石春，走翻去熄左既火堆度攞D木炭，然後再加埋D石仔、沙，吉個細孔俾水流出黎，大功告成～



我整多幾個竹壺，然後吊高D安全套，倒入D河水，要等佢慢慢過濾先飲得（如果你驚微生物，就要將D水煮一次）女神雪兒一唸起要飲安全套既水，整左個反胃既樣俾我睇，秋儀就好興奮咁走去摸D安全套濾水器。

D河水混濁到咁，睇唔到D蟹同魚，我唯有攞起個竹籠走去海邊，用開山刀打開啱啱撈到既海膽，擺入籠度做餌，龍蝦，睇下你地今次仲唔俾我食落肚～

雪兒同秋儀走左去摘香蕉，我見仲咁得閒，於是我望下個天空，暴雨過後，應該都有成個星期唔會再落雨既。我掃開D樹枝落地，加建個竹棚頂（因為住係地面實在太危險）我整左個樓梯係旁邊，方便我地上落。我又到附近行一轉。

我見雪兒同秋儀咁耐都未翻，唔通發生左D乜嘢事？我即刻跑去香蕉林個方向，用盡全力跑，我真係好驚佢地會有事。

當我跑到差唔多到香蕉林個度，我見到一個全身骯髒既長頭髮野人係度摘香蕉（我X，雪兒同秋儀呢？）見到個野人，我不停係到滴汗，唔通個野人抓左雪兒同秋儀？個野人見到我之後，好開心咁係度跳舞（咩料啊？）



個野人開口講嘢：後生仔，你有無嘢食啊？我餓左好幾日啦。我：你係郵輪上既乘客啊？野人點點頭講：我姓劉，你可以叫我做劉伯，我啱啱跌左落泥水度，所以搞到成身污糟曬。

我摘左十幾個香蕉葉，然後帶劉伯去河邊清洗一下，再翻到竹棚個邊，見到雪兒同秋儀已經翻到黎，我正想開口，雪兒嬲霸霸咁講：你走左去邊啊，我地啱啱去沙灘個邊見唔到你。秋儀：雪兒唸住去沙灘俾⋯雪兒唔俾秋儀講落去。我：我見你地咁耐無翻，所以去蕉林個邊，但見唔到你地。雪兒個樣好似唔係好信我。

我拉住劉伯：依位係劉伯，依位係雪兒同秋儀。劉伯微微笑，而秋儀就點頭笑一笑，雪兒就用疑惑既眼神望住劉伯。我地大家食完個燒熟既香蕉午餐後，又繼續忙自己野，雪兒無望過我一眼。

我走翻去沙灘，睇下海底個竹籠有無收穫。我見竹籠有四隻大龍蝦同一隻比較細D既龍蝦係裡面，我再游去附近撈埋幾個海膽，今晚個餐解決到啦～

我攞住個竹籠翻去見大家，大家一見到龍蝦，雙眼即刻發曬光，秋儀開心到跑過黎攬住我，搞到我有D尷尬，我突然感覺到一種壓逼感，望一望女神雪兒，雪兒黑口黑面咁望住我，雙眼好似想殺左我咁，D頭髮好似仲飛埋起身咁（打機啊？開覺醒啊？）



我摸一摸秋儀個頭，然後我攞起竹籠倒出D龍蝦出黎，用把刀劈開龍蝦D鉗，咁你就夾唔到人啦～我將個火堆起翻火，然後攞原先香蕉林摘翻黎既香蕉葉，包住D龍蝦，包到實一實就擺係火堆旁邊燒，秋儀：學東哥，咁都俾你唸到咁樣焗龍蝦，你好叻啊你。我：我未試過啊，不過見D葉咁大塊，所以睇下可唔可以包住龍蝦黎焗。雪兒無出聲咁望住我撩D龍蝦。

而劉伯流曬口水⋯