[真人真事][校園][純愛]《總有一天，會再次遇見》: 第七十章

跟住有一日

原本都好正常咁樣上緊堂,

突然之間有校務處嗰啲人上嚟班房

佢話有家長打電話嚟,

叫晞澄即刻執書包走





咁樣跟住晞澄就走咗啦

唔知佢咩事呢

原本想喺小息又或者食飯sms佢,

不過見佢咁匆忙,

唔似係細單野





都係夜晚見佢on msn先至搵佢

跟住嗰日返學都冇乜特別,

放學之後同呀邦去買啲野

買完就各自歸家

咁喺返屋企途中,





會經過一個公園

嗰個公園一向都比較靜

啲人多數去另一個公園玩,

因為另一個大啲,

跟住離遠見到公園入面有個女仔坐咗喺度

隱約係著住我地學校校服

不過唔肯定,

因為始終真係太遠





再行近啲就可以確認喇

其實唔係因為件校服,

而係因為見到條馬尾

呢條馬尾我係唔會認錯

你幾時問我都係咁樣答

咁我跟住就行過去啦,

我:「坐喺度做咩 」





晞澄:「點解你會喺度 」

我:「有咩點解

平時返屋企係經呢條路 」

一見到佢個樣,

用一個愁字嚟形容佢都不為過

平時見佢總係好陽光,

笑得好燦爛,

不過呢一刻完全係另一個人





唔使問呀貴都知出咗問題

我:「做咩咁嘅樣呀

發生咩事 」

晞澄:「嫲嫲啱啱走咗 」

我:「就係因為咁所以你早退 」

晞澄:「嗯,

其實我一早有心理準備





不過原來去到嗰刻都係冇用.」

跟住我就即刻坐喺佢隔離啦,

我:「慢慢講啦

係喎咁點解你唔返屋企嘅 」

晞澄:「屋企咪又係死氣沉沉咁樣

我知道daddy媽咪好緊張我

一見到我喊佢就覺得大件事,

我唔想搞到咁大陣仗,

我知道佢地依家個心都唔係好舒服,

唔想佢地再擔心埋個女

所以頭先一直扮到冇野咁樣,

我真係好努力忍住眼淚

跟住一諗返起以前細個嗰啲野,

就真係忍唔住 」

我:「你唔想喺屋企人面前喊啫,

借個膊頭俾你喇 」

其實我安慰人真係好差

不嬲都冇呢個經驗

你知男人老九點會安慰丫

講下幾句粗口拍下膊頭就算架啦

不過女仔唔係咁丫嘛,

我可以做嘅就係借個膊頭俾佢用

跟住佢諗都冇諗就挨埋嚟

嗰下我都嚇咗一嚇

我以為佢會鬥氣唔會用我個膊頭

睇嚟佢真係好需要釋放情緒

跟住我就feel到膊頭濕濕地,

唔通我推開佢咩

又係我話借個膊頭俾佢用先嘅

我:「你好叻架喇

淨係喊定唔喊都諗咁多

依家喺度盡情喊,

反正我今晚都冇野做

當係你之前成日整野俾我食,

個膊頭俾你慢慢用啦 」

我真係從來未見過佢咁嘅樣

喊到咁犀利,

唔好話佢,

如果淨係講女仔喊,

對我嚟講今次應該係最震撼嘅一次

過咗一兩個鐘佢終於冷靜返

就慢慢陪佢返屋企

我:「你呀嫲幾多歲 」

晞澄:「91呀.」

我:「咪係囉,

唔係話我口臭,

其實可以講得上係笑喪 」

晞澄:「我都明白人係會死

但原來嗰一刻真係會頂唔順 」

我:「咁我地係人嚟,

如果所有野都可以預計到有咩感情嘅話,

咁仲係咪一個人

或者有啲人好叻,

可以咁樣做,

不過嗰個唔係我囉 」

晞澄:「係 」

我:「佢走嗰陣安唔安祥 」

晞澄:「插住儀器咁樣囉,

好似瞓緊覺咁 」

我:「咁咪係囉,

其實有時都係一種解脫

講真見到一個老人家插住儀器咁樣,

你估佢唔辛苦咩

其實我地唔可以咁自私,

一味為自己想見到佢,

就叫佢撐住

其實對佢嚟講可能走更加好 」

晞澄:「你都啱

其實呢排見到佢插住儀器,

都好似好辛苦咁

不過只係唔捨得咁解 」

我:「試下喺佢嗰度諗,

就唔會咁唔開心架喇 」

晞澄:「你真係搞笑

未見過人安慰人講啲咁嘅野 」

我:「你要我講啲好煽情嘅野就冇可能

事實上我都唔識

你咪當我廢噏下講幾句囉 」

晞澄:「點都好啦,

多謝你個膊頭

仲要整濕埋唔好意思 」

我:「你知我不嬲好大方

君子點會計埋呢啲雞毛蒜皮嘅野 」

晞澄:「你係君子

Um......

淨係今日囉哈哈 」

見到佢笑返,

我就知我借個膊頭係借得抵

你問我自己我就一定話自己氹到佢架喇

話我ff都係咁話,

不過一個男仔見到自己鍾意嘅女仔笑逐顏開,

乜野都拋諸腦後架啦