[真人真事][校園][純愛]《總有一天，會再次遇見》: 第六十九章

返多幾日就放新年假

值得喺度講下,

今年情人節係喺新年假期入面

講起情人節

擺到明我最重視就係朱古力啦





所以新年期間有一日我就搵咗晞澄

目的就梗係希望佢會整杏仁朱古力

事關佢早兩年整嗰啲真係幾好食

我:「靚女姐姐今年會唔會整朱古力呀 」

晞澄:「我都估到你會搵我





你條為食鬼 」

我:「我要杏仁嗰隻喎 」

晞澄:「麻鬼煩

好地地牛奶咪好囉 」

我:「我知你肯整嘅





你咁犀利乜都識整 」

晞澄:「賣口乖 」

我:「講真呀唔係講假說話 」

晞澄:「唉得喇得喇

有時間就整啦 」

去到正日之前嗰晚,

晞澄:「係咪要食朱古力呀為食鬼 」

我:「係呀係呀 」





晞澄:「我聽日拎出嚟俾你喇

講明先得幾粒 」

我:「咁就夠啦 」

晞澄:「喺商場等 」

我:「好呀 」

結果去到第二日,

準時去到就見到晞澄喺度





晞澄:「俾你喇 」

我:「正 」

晞澄:「喂,

食咗野未 」

我:「未喎做咩 」

晞澄:「陪我食

掛住整你嗰啲杏仁朱古力都仲未食野 」

我:「你講到咁樣有得唔賠咩 」





晞澄:「醒咗喎 」

我:「行啦講 」

跟住就同佢食野,

點知食食下俾同學見到

某同學:「你兩個情人節出嚟食野喎

果然 」

我:「情人節唔使食野嘅咩 」





某同學:「明嘅明嘅

唔阻你地 」

我:「趕住落地獄就快啦 」

晞澄:「又喺度咒人 」

我:「嗰條友麻煩丫嘛

佢個樣衰到呢 」

晞澄:「唔使理佢啦 」

我:「同埋可以乘機鬧人 」

晞澄:「原來你都係想咁 」

我:「係喎你又好似冇野咁嘅 」

晞澄:「可以有啲乜野 」

我:「成班人咁樣老屈我地 」

晞澄:「可以點啫

把口喺人哋度 」

我:「咁又係 」

就係今次咁樣借啲意問佢

我就自己主觀覺得佢係唔鍾意我

因為我覺得如果係鍾意我的話,

個反應應該唔係咁

當然依家再諗返起,

嗰陣就梗係覺得自己戇居啦

情人節一齊食晏幾乎係俾晒貼士咁滯,

我都可以懵然不知

真係冇藥醫.


放完新年假之後又正式返學喇

跟住落嚟都冇乜特別

始終距離A Level又近咗

唔經唔覺會考已經係一年前嘅事

所以時間真係過得好快

係有一日放學,

晞澄佢無啦啦翹住我隻手咁行

我就知道佢又有問題

因為佢平時好少咁樣做,

對上一次咁樣做嘅時候就係佢同我講,

話好擔心會考放榜唔理想

直覺話俾我聽今次應該係有啲野

我:「做咩事呀 」

晞澄:「翹住你唔得咩 」

我:「對上一次翹住我,

就係你話擔心放榜唔理想嗰陣

有咩事講出嚟啦 」

晞澄冇講野淨係笑咗一笑

我:「笑咩 」

晞澄:「原來你都幾細心

睇唔出喎 」

我:「有好多野你都睇唔出 」

包括我鍾意你啦,

當然呢句說話冇講出口

晞澄:「係咩 」

我:「究竟咩事呀 」

晞澄:「冇,

話說我嫲嫲近排入咗醫院

聽返嚟話情況唔係好理想,

我依家好擔心佢隨時唔喺度 」

我:「你同佢感情好好 」

晞澄:「嗯

成日都會同佢傾計,

又或者成家人週不時搵佢去飲茶 」

我:「幾時入咗醫院 」

晞澄:「上個禮拜日囉,

依家每晚瞓覺,

我都好擔心瞓瞓下嗰陣,

會收到醫院電話

話佢就嚟唔得 」

我:「邊有得驚丫

講真生離死別好正常

你一陣去探佢 」

晞澄:「依家基本上每一日都會去 」

我:「好辛苦喎 」

晞澄:「其實係

不過我唔想因為唔去而令自己後悔 」

我:「頂住就得啦,

咁不如呢排唔好溫書啦

驚你頂唔順 」

晞澄:「唔使

唔關溫書事 」

我:「你覺得頂到就得啦 」

晞澄:「嗯 」

的而且確,

喺我角度睇,

生離死別真係好可怕

可能係我唔夠歷練嘅關係啦,

有啲人凡事都做到不留感情,

所以離別嗰陣完全冇感覺

老實講我好羨慕呢啲人,

可以做到咁灑脫,

真係唔係個個得.