[真人真事][校園][純愛]《總有一天，會再次遇見》: 第六十八章

跟住我地就去咗平時去開嗰間麵包鋪

一切就好似之前咁,

兩個人拍住行

佢終於唔再係板起塊面

都係依家呢個佢靚好多





好彩啲菠蘿油都冇賣晒

買完之後,

就好有默契咁樣向住佢屋企嗰條路行

我:「話時話我地都好耐冇食過菠蘿油 」

晞澄:「咁就要問你喇呢層 」





我:「問我做乜 」

晞澄:「兩個禮拜都唔撩我傾計

真係可以一路都唔出聲

仲有呀,

竟然喺圖書館都唔坐埋嚟我嗰枱 」





我:「驚你唔鍾意丫嘛

咁咪特登坐遠啲

你都唔知你板起塊面嗰個樣幾得人驚 」

晞澄:「乜係咩 」

我:「梗係啦

玄壇咁嘅樣 」

晞澄:「作大啲丫 」

我:「你





冇嬲喇 」

晞澄:「嬲架

嬲你點解兩個禮拜都唔同我講野 」

我:「都話你板起塊面嗰個樣搞到我卻步咯

你又唔撩我 」

晞澄:「咁

我係女仔丫嘛哈哈 」





我:「男女唔公平就係咁樣

明明就唔係我錯晒 」

晞澄:「係咁架啦 」

我:「循例都要講下嘅

其實我嗰日凌晨三點幾就起咗身,

因為我呀公有急事入咗醫院

最後去到十一點幾就走咗,

跟住成班親戚圍埋喺度傾計





我嗰陣因為喺醫院熄咗電話,

所以完全唔知你地搵過我

跟住我已經搭的士趕嚟,

可惜都趕唔到

點都好啦都係我食言,

唔好意思呀.」

我將我喺呢兩個禮拜一直想講嘅野,





一次過講出去

晞澄:「原來發生啲咁嘅事......

你冇咩事嘛 」

我:「可以有咩事 」

晞澄:「你呀公唔喺度喎

心情平復未 」

我:「講真其實同佢唔算好大感情

所以唔係話有好大咁講感覺 」

晞澄:「咁都係嘅

咁你嗰日點解唔講 」

我:「我覺得唔係啲乜好野

咁咪唔講囉

唔通呢啲野要周圍講咩 」

晞澄:「原來你有事,

下次記住有啲咩要講呀

如果唔係好似今次咁樣誤會就大家都唔開心 」

我:「我仲知你好小氣添 」

晞澄:「我諗住扮黑面你會知道我仲嬲緊

跟住就主動搵我傾計丫嘛 」

我:「都唔知你嗰啲乜野諗法 」

晞澄:「點知你又真係不瞅不睬

sms,msn都冇 」

我:「今晚玩旋轉泡泡球囉

其實呢排都幾想玩

我覺得我可以復仇 」

晞澄:「憑你

諗下好喇 」

我:「唔好咁口響 」

晞澄:「不過真係估唔到你仲會keep住張卡 」

我:「我又未去到咁冇記性,

至少呢件事一直記得 」

晞澄:「嗯 」

跟住佢已經露出一個半深嘅彎角,

隔咗十六日終於可以見返

夜晚就同佢玩旋轉泡泡球啦

頂你個肺真係贏唔到佢

我:「一定係外掛 」

晞澄:「你心態唔正確呀

贏唔到就話人地出外掛 」

我:「有乜理由玩咗年幾都冇次贏到 」

晞澄:「技術問題囉哈哈 」

我:「快啲講你平時點樣特訓 」

晞澄:「唔好傻啦玩旋轉泡泡球都要特訓 」

我:「如果唔係點會咁犀利 」

晞澄:「講咗好多次係人問題

俾啲心機啦 」

我地玩多陣就上床瞓覺

瞓喺張床望住天花板嗰陣諗返今日嘅事,

原來自己不知不覺間,

已經對佢個笑容產生迷戀

嗰陣我暗地裏同自己講,

以後都唔會俾自己同佢有拗撬

就算佢點野蠻,點樣唔啱都好,

我都唔會好似今次咁樣處理

當然其實我覺得佢又唔係真係咁嘅人嚟嘅

不過即使佢係咁都好,

我都只會遷就佢

可能我真係好冇用,

明明大家就唔係啲乜野關係,

根本唔需要咁樣做,

我絕對承認我係廢

但係我為嘅只係一樣野,

就係唔想再隔咁耐先至見到佢嘅笑容,

唔想再日日見到佢黑面,

唔想再偷望佢,

因為有啲野,

試過一次就已經好足夠.