[真人真事][校園][純愛]《總有一天，會再次遇見》: 第四十二章

結果去到第二朝

食完早餐上一陣網,

見到時間差唔多

就打咗俾晞澄

跟住佢話喺樓下接我上去





之後我就聽佢講去佢屋企樓下啦,

晞澄著住普通出街衫咁等我

即係T卹牛仔褲啦

晞澄:「食咗野未呀 」

我:「未喎





食又得唔食又得 」

晞澄:「咁去附近求其食啦 」

我:「好呀 」

食完野之後就上佢屋企

咁喺途中我問咗一條好膠嘅問題





我:「其實點解你會俾我上去 」

晞澄:「咩叫點解俾你上去 」

我:「我睇嗰啲電視劇都係丫嘛

好少女仔會俾男仔上去 」

晞澄:「兄台

你睇得電視太多喇

同埋如果唔搵你幫手,

我根本做唔切 」





我:「好彩你今次係叫我咋

如果係第二個變態佬你就死 」

晞澄:「你條友可以做到啲乜丫

雖然你真係一個變態佬

由啱啱開始識嗰陣已經覺得你 .」

我:「女人真係記仇

咁耐你都仲記得 」





晞澄:「係呀

之後你小心啲呀 」

我:「梗係啦

容乜易俾你嬲成世

多個朋友點都好過多個敵人嘅 」

晞澄:「算你傻唔晒啦 」

之後上到佢屋企,

由於我真係好少上人屋企,





就連我老友呀邦個屋企,

我都真係好少上去

所以一去到都唔知做乜好

跟住就懵下懵呀坐咗喺梳化度

晞澄:「飲唔飲野 」

我:「好呀 」

晞澄:「可樂定係檸檬茶 」





我:「檸檬茶囉 」

跟住晞澄就拎咗兩包檸檬茶,

一包佢一包我

跟住我見到有張相

咁我呢啲有禮貌嘅,

就梗係唔會隨便上去攞啦

事關我自己都唔鍾意有人嚟到我屋企,

亂咁整我啲野

真係極度不尊重

之後晞澄見到我望住張相

就拎咗過嚟俾我睇

張相應該係全家福,

有四個人,

晞澄,佢爸爸,佢媽媽同埋佢細妹

佢雙親望落去個樣都幾後生

至於佢細妹同佢又真係幾似樣

不過我就覺得晞澄靚啲

當然我冇同佢講啦

呢啲野在心中咪算

晞澄:「好

開工喇 」

我:「講明先真係唔識

你講乜我就做乜啦 」

晞澄:「得啦 」

之後我地就去咗整芒果布甸

原來真係好鬼難整

當然我本身都冇烹調嘅天份呀

呢個係實際嘅,

所以基本上全程都係佢整晒咁濟

我淨係負責喺隔離望住佢整

同埋做阿四

邊啲野要邊啲野唔要,

我就幫佢拎開又或者拎過嚟

喺嗰刻我先知,

原來一個女仔最吸引嗰陣

係佢認真做一樣野

我好相信人係有通感

你一定感覺到佢係咪認真做緊野

呢一刻係我眼前嘅晞澄就係好認真整緊野,

嗰種專注心機絕對唔係可以扮出嚟

誇張講句,

成個人真係好有靈魂

同時間亦都真係影響咗我好多

點樣影響

至少我日後見到認真煮野食嘅女仔,

都會格外欣賞

不過嗰啲都係之後嘅事嚕

但係我好清楚點解自己會有呢個評價,

其實都只係因為晞澄

第一次好多時都係最震撼,

嗰個衝擊真係可以好大

晞澄:「嗱

呢啲就俾你食嘅

呢啲就係後日拎返學校

唔好同人講呀

如果唔係就大鑊.」

我:「梗係啦

偷食點會同人講 」

晞澄:「你明就好啦 」

跟住我就拎包檸檬茶飲啦

點知好死唔死拎錯咗

仲要俾佢發現

講真我真係拎錯唔係有心

晞澄:「呢包好似我架喎

你個包喺嗰度 」

我:「唔好意思唔好意思

真係唔好意思 」

晞澄:「唔使咁緊張

不過你冇聽過一個傳說 」

我:「咩傳說?

你講嚟聽下 」

晞澄:「飲人口水尾嗰個要聽返俾人飲嗰個講

無論講乜都要照做 」

我:「你邊度鄉下呀

我完全冇聽過喎 」

晞澄:「我就真係唔知你邊度鄉下

我淨係知你喺我屋企飲我包野

咁就梗係要聽返我講啦 」

我:「鬼叫我飲錯咩

你想點先 」

晞澄:「今晚我冇飯食

陪我食埋夜晚

如果唔係就告你擅闖民居

報警捉你 」

跟住我就一手捉住佢條馬尾

我:「頂你原來講呢樣

等我仲以為係啲乜野騎呢要求 」

晞澄:「唔好走數呀

同埋放手啦

雖然我都知你唔會放,

日日都玩 」

我:「幾時呃過你

不過真係想問點解你喺屋企都唔放頭髮落嚟 」

晞澄:「關你咩事啫

你自己諗下點解啦 」

我:「大佬我點知你點解唔放頭髮

都係好奇問句啫 」

晞澄:「我仲以為你會知添 」

我:「真係唔知 」

晞澄:「唉

快啲繼續整啦 」