[真人真事][校園][純愛]《總有一天，會再次遇見》: 第四十一章

跟住落嚟都就快去到聖誕

代表我地呢啲學生哥又有一個悠長假期

其實所謂嘅悠長假期都只係兩個禮拜啫

同時間我地距離會考已經愈嚟愈近

得返唔夠三個月,





放聖誕假之前同往年一樣,

都會有個聖誕聯歡會

唔知大家仲記唔記得啦,

晞澄上年佢就整咗芒果布甸

我仲話好好食嘅呢





其實唔止我話好食

有份食嘅同學又或者老師都係讚晞澄整得好好

今年我就醒

一早問定佢會唔會整先

會嘅話我都可以食多幾個丫嘛





我:「喂你今年會唔會整芒果布甸呀 」

晞澄:「喂喂聲冇名你叫呀 」

我:「晞澄同學

請問你今年會唔會整芒果布甸呢 」

晞澄:「咁就差唔多哈哈

會呀 」

我:「真係 」

晞澄:「早幾日班主任問我會唔會整





咁老實講我又有時間

咪應承咗佢囉 」

我:「整多幾個啦

唔夠食呀上年 」

晞澄:「上年你咪嚟咗我屋企樓下拎多幾個囉

仲唔夠食 」

我:「唔夠





最好食半打 」

晞澄:「一係就食死你

一係就做死我

你係咪玩野呀 」

我:「講堅呀呃你做乜 」

晞澄:「到時先算啦 」

過咗一兩個禮拜

都就快搞聖誕聯歡會





唔使問我就梗係問晞澄啦

我:「唔係講笑你真係可以整多半打

我同你清晒佢 」

晞澄:「特登為咗你整到半打我就唔想喇

除非咁啦,

一陣同我去買定啲野

仲要幫手拎埋





咁就可以諗下嘅 」

我:「實得啦大佬

有得食喎 」

晞澄:「聽住先啦 」

去到放學嗰陣我就同佢一齊去咗超級市場買野

老實講我對煮野食就一竅不通

我就完全唔知要買啲乜

基本上佢話要乜我就幫佢拎

就係咁簡單啫,

其實我極懷疑佢當咗我係阿四

根本就唔需要買咁多野

佢見有條友俾佢用,

有乜就買乜

連嗰啲朱古力都買埋

我就打死都唔信整芒果布甸要用朱古力

我指住排朱古力同佢講:「小姐

呢個想問有咩用呢 」

晞澄:「廢話

咪食囉 」

我:「依家唔係話要買整芒果布甸嗰啲野咩 」

晞澄:「所以話你唔識就真係唔識

冇朱古力我就冇能量整

咁你仲點樣食先得 」

我:「ok

你贏 」

晞澄:「梗係啦 」

不過原來同佢去超級市場買野食都幾過癮

兩條友輪流推住架車

之前係完全冇呢個體驗

平時亦都唔鍾意咁樣同屋企人去超級市場,

不過今日就調返轉

我都知我係不孝架喇

結果最後買咗好多野

好彩佢都有人性,

冇叫我拎晒全部

一人一半咁樣拎

去緊佢屋企嘅途中(因為我諗住幫佢拎到去佢樓下先走)

晞澄:「其實我諗過喇 」

我:「做咩呀 」

晞澄:「不如聽日你上埋嚟幫手啦 」

嗰陣係禮拜五

聖誕聯歡就係禮拜一搞

我:「上你屋企 」

晞澄:「唔通去你屋企咩呀叻仔 」

我:「唔好預我喇

你搵呀穎佢地啦 」

晞澄:「你估我冇搵咩

就係佢地唔得先搵你丫嘛

佢地要拍拖仔呀 」

我:「原來佢地都係有異性冇人性 」

晞澄:「正常嘅

我都唔會怪佢地

唔好講住喇聽日你得唔得先 」

我:「理論上我就冇乜野做

不過你知啦,

我唔識煮野食又唔係好鍾意上人屋企 」

晞澄:「我知你驚乜

聽日梗係屋企冇晒人先搵你啦

放心啦 」

我:「咁都好啲

你知啦見到屋企人都唔知講乜好

不過咁喎,

我都係唔識整野食 」

晞澄:「我叫你做乜你咪做乜囉

使乜識姐 」

我:「到時唔好鬧我呀 」

晞澄:「得啦,

我志在有條友幫手啫

因為係你叫我整多啲俾你食

原本我都冇諗住整咁多,

依家咁樣就梗係搵你啦 」

我:「咁我聽朝起身搵你囉 」

晞澄:「好,

你預晏晝啦

到時再約時間 」

我:「你話點就點啦 」