[真人真事][校園][純愛]《總有一天，會再次遇見》: 第十九章

第二日返到去,
循例上都要面對面講多次多謝架
晞澄:「有冇食晒先 」
我:「真係有
冇吹水 」
晞澄:「信你啦 」
我:「老老實實真係幾好食
其實你係咪學過整甜品 」
晞澄:「真係冇呀,
上網睇算唔算丫 」


我:「莫非你係甜品天才 」
晞澄:「可能女仔煮野食有啲天分啩 」
我:「唔係呀,
有啲人煮野好難食 」
晞澄:「邊個女仔咁好福氣整野俾你食 」
我:「以前家政堂嗰啲囉
頂你個肺真係好難食 」
晞澄:「唔好咁話人啦,
整埋俾你仲咁多野講 」
我:「咁真係唔好食 」


晞澄:「好彩我整嗰啲唔算難食,
如果唔係實俾你唱死 」
我:「我又點會咁呢
咁好人 」
晞澄:「你真係收啦
你一定會咁樣做 」
佢又真係幾醒目
好彩佢整啲野唔難食,
如果唔係真係係咁唱
我:「俾返張卡你先 」


張卡即係晞澄自己寫嗰張,
晞澄:「你袋住啦
邊有人自己寫完張卡,
會係自己收返架 」
我:「乜係嘅咩 」
晞澄:「咁有紀念價值唔好扔咗佢
知唔知 」
我:「痴線,
我真係扔你都唔知啦叻仔 」
晞澄:「扔咗你就知味道 」
我:「唔係下話
咁我袋住喺書包喇,
滿意未 」
晞澄:「咁就差唔多 」
我:「都唔知點解你要咁樣做,


痴線喺度管人地點樣對待張卡 」
晞澄:「講你都唔明啦 」
我:「我真係唔明.」
跟住嗰日放學我就請咗佢食菠蘿油,
都應該嘅
當係慰勞佢啦哈哈
佢條友真係好奇怪,
嗰日平時嗰間麵包鋪冇菠蘿油,
佢寧願行遠啲都一定要食菠蘿油
中途又係咁講菠蘿油同埋菠蘿包嘅分別,
老老實實咪差唔多
都唔知佢個腦裝乜
對呢啲野咁有執著.

跟住發生咗一件事,


令到我地嘅關係出現咗少少變化
依家諗返起,
其實呢件事真係幾無聊
不過咁,
我依家會話多得有呢件事出現
不過嗰陣梗係唔知啦,
完全唔覺得有乜野特別
都係嗰句啦,
唔同時期睇同一樣野,
睇法都會唔同
咁究竟嗰件事係乜呢
話說有一日,
食完飯返嚟嗰陣,
晞澄就咁樣同我講
晞澄:「放學得唔得閒 」


我:「做乜事
又想搵我笨 」
晞澄:「你講得啱
今次真係要靠你 」
我:「就算係搵我笨呀
你都要講下係咩事先得架 」
晞澄:「話說有位師兄好煩
成日想約我放學之後去街,
已經係咁拒絕
佢都聽唔入耳 」
我:「頂你高form都搵你喎 」
晞澄:「喂呀,
你講到好似係好野咁嘅 」
我:「證明你幾有吸引力 」
晞澄:「嗰次都係傾左一句計,


跟住佢就係咁搵我
頭先喺地下撞到佢,
佢話今日放咗學之後會上嚟等我一齊放學 」
我:「嗰條友乜水嚟 」
晞澄:「咪好高嗰個籃球隊囉 」
我:「嗰條友好似幾受歡迎
你執到喇 」
晞澄:「我真係執到就唔係咁嘅語氣啦 」
我:「你想我點先 」
晞澄:「陣間放學嗰陣呢,
我同你一齊行出去話陣間有野做
咁咪可以唔使同佢去街囉 」
我:「到時我可能話冇野做
等你同佢一齊
益你 」
晞澄:「你真係唔好呀
到時真係反面 」
我:「嗰條友幾好丫
你唔鍾意咩 」
晞澄:「唔鍾意
成日喺度講啲唔好笑嘅笑話,
啲話題都唔夾嘅 」
我:「咁多女都鍾意嘅師兄,
你竟然話麻麻地
你係得嘅 」
晞澄:「係咁架啦,
唔係乜都講條件架 」
我:「咁我陣間勉為其難幫你做戲啦
頂你咁似拍戲嘅.」
晞澄:「係囉哈哈 」