[真人真事][校園][純愛]《總有一天，會再次遇見》: 第二十章

之後響起放學鐘,
嗰條友二話不說就上咗嚟我地班嘅門口
簡直係痴漢
跟住我指住佢同晞澄講
我:「就係呢條友 」
晞澄:「嗯,
咁快上到嚟嘅 」
我:「你睇下佢幾重視你
快過打針咁樣衝上嚟 」
晞澄:「仲好講 亅




其實嗰條友相貌唔差
又高大,
果然真係打開籃球,
擁有一身古銅色肌膚
其實我都唔知關唔關事哈哈
唔怪得有咁多女自投懷抱
更加估唔到晞澄唔鍾意,
不過喺呢個時候,
我個腦又諗起啲好無聊嘅野
嗰啲就係我頭先講過嗰啲





我:「到時我可能話冇野做,
等你同佢一齊,
益你.」

老老實實,
其實真係幾無聊
不過唔知點解覺得好好玩
好想睇下佢地係點樣相處
我嗰陣仲自己俾藉口自己,




話係想撮合佢地所以先咁做
等我陣間睇下晞澄個o嘴先
跟住放咗學,
我同晞澄就行咗出去班房門口,
呢個時候嗰個男仔就行埋嚟
就叫佢狗公啦,
狗公:「charlotte你放學嗱 」
晞澄:「係呀做咩 」
狗公:「冇呀諗住同你一齊去食野,
我有coupon 」
頂你用埋啲手段咁老套
用coupon溝女
如果唔係想玩晞澄,
我一定叫佢俾埋我去食
呢個時候我已經忍笑忍得好辛苦




之後晞澄話:「唔去喇我今日有野做 」
狗公:「我陪你做咪得 」
晞澄:「唔使喇我有佢
佢今日得閒 」
晞澄口中嘅「佢」亦即係我,
因為嗰陣佢係指住我講,
就係喺呢個時候,
我就突然出聲
殺到晞澄一個措手不及
我:「其實我真係唔係咁得閒
既然師兄你可以就等你陪佢喇 」
之後晞澄個樣好驚訝
首先係好愕然,
跟住開始黑面
係咁啤住我




佢個樣好似好嬲,
當然啦,
嗰陣我完全唔知玩出火
淨係覺得好好玩
而呢個時候我已經走咗
至於嗰個狗公就梗係好開心啦,
呢個時候我就返去搵呀邦
我:「走得 」
呀邦:「頭先你地出去傾乜
我見到有高form嘅 」
跟住我就一五一十講俾佢知,
呀邦:「頂你玩到咁大
唔驚佢嬲咩 」
我:「唔玩都玩咗,
佢應該冇咁小器嘅 」




呀邦:「我就食花生 」
我:「我都想食,
不如試下跟住佢地,
一齊啦冇咁明顯 」
呀邦:「好 」
中學時代就係成班朋友一齊喺度做啲無聊野.

之後我地就跟住晞澄佢地
出到去學校門口,
我見佢地去緊餐廳嗰個方向
點知行行下,
晞澄就同狗公分開咗
淨低狗公戇居居咁樣企喺度
而晞澄我估就應該返屋企,
因為佢個方向係佢平時返屋企嗰個




估唔到咁快散水
我見狗公個樣咁慘,
肯定係俾晞澄拒絕啦
冇花生食添
之後我地都返咗屋企,
第二日返到去,
一返到去就見到晞澄坐咗喺度
跟住我就梗係扮晒野問佢尋日點啦,
點知佢應都唔應我
好似當聽唔到咁樣,
呢個時候我就知佢好嬲
咁我就梗係扮死狗啦
我啲功課仲要靠佢
同埋坐隔離關係冇理由繼續俾佢惡化落去,
我:「唔好意思呀尋日玩大咗 」
佢都係扮聽唔到,
面無表情咁樣喺度寫野
我:「下次唔玩下次唔玩 」
跟住佢就擰轉嚟我嗰邊,
好嬲咁樣啤住我
晞澄:「可唔可以靜少少.」
之後就繼續喺度寫野,
死喇今次真係玩出火
佢真係好嬲.