[真人真事][校園][純愛]《總有一天，會再次遇見》: 第十八章

跟住小息同埋食飯嗰陣,
我就周圍去隔離班嗰度搜尋朱古力
睇下有冇人有整有杏仁嘅朱古力
點知都係得個吉
成班人都係懶
晞澄:「搵唔到呢 」
我:「俾人食晒咋 」
晞澄:「實係咁啦 」
我:「成班人都唔識食
同你講都費事 」




晞澄:「有人嬲嬲喎 」
我:「冇,
不知幾大方 」
跟住我見到有條仔行咗埋嚟
就叫佢打靶仔啦,
事關佢都唔係啲乜野重要角色
我成日覺得佢係扮基溝女
最慘本身又多女仔埋,
啲女仔當佢係姊妹咁樣
打靶仔:「charlotte你真係整咗牛奶朱古力呀 」




晞澄:「係呀好唔好食呀 」
打靶仔:「好好食呀 」
頂你十足十好似嗰啲飮食節目咁樣
擦鞋
仲要狗公
屎忽鬼
晞澄:「原本我仲驚太甜添 」
打靶仔:「唔會呀
你真係好人,
一講你就整 」




晞澄:「哈哈,
我淨係識整呢啲咋 」
打靶仔:「仲有冇呀 」
晞澄:「有呀,
嗱 」
跟住個打靶仔仲撩我傾計,
打靶仔:「呀賢你食唔食 」
我:「唔食.」
打靶仔:「好好食喎真係唔食 」
我:「都話唔食,
你自己慢慢啦 」
打靶仔:「走寶喇你 」
我:「關你春事咩 」
跟住佢就行開咗,
晞澄:「做乜無啦啦鬧人 」




我:「話咗唔食仲要問
同埋我成日覺得佢係扮基溝女 」
晞澄:「又喺到抵毀同學,
明明人地咁好人 」
我:「你話點就點啦
改變唔到我對佢嘅評價,
佢肯定係扮基佬 」
跟住我見到晞澄都喺度陰陰嘴笑
我:「你都覺得呢 」
晞澄:「冇呀
諗緊其他野咋 」
我:「實係咁啦
人地叫你整係整,
我叫你就唔聽 」
晞澄:「唔關佢事囉好冇




佢叫唔叫我都係整牛奶朱古力 」
我:「哦.」
晞澄:「唔信就算 」
我:「明明尋日咁好聲氣.」
晞澄:「施主,
你講野太假喇 」
我:「唔好話你懶唔整 」
晞澄:「係喇係喇 」

放咗學之後,
晞澄:「喂你得唔得閒 」
我:「得嘅做咩呀 」
晞澄:「陪一陪我去商場嗰邊
想拎啲野不過有啲重,
同埋我驚我個書包裝唔落 」




我:「頂你當我係狗
唔制
返屋企打機唔好 」
晞澄:「今日唔幫以後功課食自己 」
我:「頂你講到咁樣,
即係冇計傾啦 」
晞澄:「你自己諗喇 」
結果最後我梗係去咗
仲話男仔要有志氣,
自打嘴巴
跟住我地就去咗商場啦,
原來佢係拎煮野食嗰啲野
晞澄:「我書包唔夠位,
你幫我袋住先得唔得
我聽日拎返 」




我:「有得話唔得咩 」
晞澄:「唔該晒 」
我:「你自己打開書包啦,
擺喺最大嗰格就得
跟住佢就將一個裏面裝住啲野嘅膠袋,
放咗喺我個書包度,
晞澄:「唔該晒 」
然之後就各自返屋企,
去到夜晚佢喺msn搵我
晞澄:「你得唔得閒去你書包睇一睇 」
我:「做乜 」
晞澄:「話說我唔見咗一個星星形嘅模,
唔知有冇唔小心袋咗落你書包個膠袋度
嗰個模唔係好大個 」
跟住我就去書包睇啦
拎埋個膠袋出嚟睇,
跟住見到裏面有個盒
乜春嚟架
唔通裏面就係收埋咗嗰個星星形嘅模
跟住我就打開,
見到有三粒有包裝紙嘅朱古力
同埋仲有一張卡
咁就梗係即刻睇張卡寫乜啦
我見到第一句就知道係晞澄寫,
我成日抄佢啲筆記同埋功課,
點會唔認得佢啲字跡
張卡內容如下,
「死人頭唔好話唔益你,
知唔知我尋日去咗幾檔先至搵到用嚟整朱古力嘅杏仁,
整完牛奶夜晚仲要整你嗰啲,
成一點先瞓,
你條友嗰啲口味真係麻鬼煩,
又奄尖,
嗱,
第一次整唔知好唔好食架,
就算唔好食都唔準唔食拎去扔呀,
俾我知道呢以後就唔再整.」
睇完之後我都喺度笑
原來佢真係整咗,
嗰一刻真係好開心
因為真係有人聽你講野
嗰個仲要只係一個普通朋友,
會心微笑嗰種開心
唔會放聲大笑,
但係會銘記於心
我心諗就算我真係扔,
你都唔知啦
不過唔會嘅,
佢條友煮野幾令人放心
跟住就擺落口,
果然冇估錯真係幾好食
好彩依家天氣涼,
即使擺咗落書包嗰度都冇溶
跟住我就梗係要多謝返佢啦,
我:「多謝晒 」
晞澄:「嗯
好唔好食呀 」
我:「好食呀 」
晞澄:「雖然你可能只係講笑,
不過都多謝先啦 」
我:「真心呀,
但係我唔見你個星星形嘅模喎 」
晞澄:「冇野嚕
啱啱搵得返
自己大頭蝦 」
喺嗰陣,
我以為佢真係自己大頭蝦,
我以為所有野都係巧合,
我真係以為有好多以為,
去到大個咗,
腦筍生埋咗之後,
我先知道當初佢係咩一回事,
不過我呢條蛋散真係好蠢,
隔咗咁耐先至明白,
講真邊度有咁多大頭蝦丫
有嘅,
不過嗰個唔係佢囉
呢三粒朱古力真係好特別,
特別在於買都買唔返,
有時錢真係唔係萬能
依家終於明呢句.