[愛情甜故] 因為一次睇到佢打飛機,所以我地變咗做炮友: 148.S333.是他不是他?

我望到喺我枱上面有一個附近coffee shop嘅麵包袋，上面夾住張紙「To Venus」
啱啱我入去嗰陣都冇㗎，一出嚟嗰陣又會突然間出現咗個袋嘅？
我拎起個麵包袋，個袋仲暖粒粒㗎，我打開嚟睇，入面放咗一個香腸煎蛋芝士多士，係我一直以嚟都中意食嘅嘢
我下意識望一望周樂恆嘅辦公室，唔通係Joe放嘅？
但…冇理由呀，佢都唔會知我中意食呢個，況且，佢啱啱行嚟嗰陣，手上得兩份文件，冇其他嘢喺手上拎住
咁到底係邊個放佢喺度…？
我拎起已經冇晒咖啡嘅水杯行出去，打算酙杯水飲
我行到出去茶水間，Wing就喺位度企起身，然後行去茶水間隔離嘅小型會議室
「開會啦？」我望住Wing
「嗯！」佢點點頭


「加油！」我比咗個加油嘅手勢佢
佢推門入會議室，我喺個推門嘅嗰一個瞬間望入去，我見到入面只有葉子朗一人，冇其他人
腦海中一個閃光飛過，唔通我枱面上嗰個包…！
唔會係佢嘅，又點會係佢？
但係…真係只有佢一個同Joe喺度，但Joe啱啱手上咩都冇拎住
算啦算啦，都係唔好多心啦
葉子朗又點會特登買個包比我，佢宜家當我係陌生人咋…
我酙完水就番位坐低，我打開個紙袋，然後拎咗個仲暖嘅多士出嚟
一望住呢個多士，就諗起葉子朗，不禁覺得係真係佢買比我，因為冇人知我中意食呢個包
其實仲有一個人知道，嗰個人係周樂恆


但佢一直都冇離開過佢間房，所以唔會係佢
一諗到有機會係葉子朗買比我，我嘅心又忍唔住噗噗噗亂跳
如果真係佢買比我，就算咬一啖都會覺得幸福喺餡料之間溢出嚟
仲可以證明，佢其實仲關心我，仲著緊我
雖然一切都有機會只係我諗多，但係一下幻想都已經令我好開心，好心足
我一口一口咁咬落個包度，食埋最後一啖，突然間就好精神，一啲都唔攰，精神都番晒嚟
我好似又「重新振作」啦～
「咚咚。」放喺枱面嘅手機震咗一震，螢幕著咗
我望向手機，然後將個身傾斜過去望下
一條whatsapp嘅訊息，我拎起手機，㩒咗一下嗰條訊息，然後用指紋解鎖


原來係靜愉send咗訊息比我：「陣間一唔一齊食lunch？」
我諗咗兩秒，然後揚起嘴角回覆道：「好呀～」
…
靜愉約咗我喺附近嘅一間茶餐廳度食晏
我一放lunch就拎埋銀包手機出去，反正我手上要做嘅嘢都做得七七八八
我whatsapp靜愉：「你放lunch未呀～未嘅話我就去攞咗位先啦！」
轉個頭靜愉就回覆：「你嚟啦，我到咗啦～」
我見靜愉話到咗，我就加快咗腳步行去嗰間茶餐廳
我推開玻璃門，行入茶餐廳，見到靜愉坐喺一個窗邊嘅卡位度
「嚟咗好耐啦？」我行去靜愉對面嘅梳化位度坐低，「我已經盡快行過嚟㗎啦～」
「你心情好似好好喎～」靜愉好似明白咗啲咩咁露出淡淡笑容，然後遞咗個餐牌比我
「okay啦～」我諗起今日嗰個包，不自覺咁就露出笑容
「今日有咩開心事呀？」靜愉就係嗰個只用一眼就可以睇穿我嘅人，「快啲從實招來呀！」
「叫咗嘢食就同你講啦～」我舉高手叫侍應過嚟落單
等到侍應落完單，靜愉就面帶笑容望住我


「係時候從實招來啦～」靜愉將餐牌放喺一邊
「冇咩特別嘅～」我又諗起嗰個男仔，嘴角自動揚起，「今日我胃唔舒服呀，比我發現咗佢仲有帶水同帶胃藥喺身嘅習慣。」
「一定唔止咁少事嘅～」靜愉眯着眼望我
「嘻嘻…然後F&A要上嚟開會呀，我喺周樂恆間房出番嚟嗰陣，發現枱面多咗個包，但係入去周樂恆房交文件嗰個人手上冇拎嘢。」我解釋比靜愉知，「點知喺我去茶水間酙水，經過會議室嗰陣，留意到會議室入面只有葉子朗一個。」
「你覺得個包係葉子朗買比你嘅？」靜愉諗咗一陣問道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link