[愛情甜故] 因為一次睇到佢打飛機,所以我地變咗做炮友: 147.S332.微妙

「你好啲未？」眼前著住西裝嘅葉子朗問我
「嗯…好好多啦～」我微微笑點點頭
「嗯，咁我番上去公司先。」佢企起身
「我都行啦～」我笑一笑
我企起身，跟喺佢身後
今日又係一個如常番工嘅日子
我番到去自己嘅位度坐低，打開電腦睇今日嘅行程
周樂恆喺入面，我入去同佢匯報一下今日嘅行程先
「叩叩。」我伸手敲喺木門上
「我入嚟匯報一下今日嘅schedule㗎。」


我笑一笑
「嗯...」周樂恆望住電腦Mon，手指靈活咁放喺鍵盤上面，輕輕動着
「今日晏就3點你約咗天地集團嘅張總喺半島酒店，4點你約咗Stephen Li，然後6點半要同大周生食飯。」我手上拎住schedule book，一個專業嘅樣
「嗯，okay。」周樂恆嘅視線停留喺電腦螢幕上面
「咁我出番去先啦。」我往後踏咗兩步，然後轉身
「芷諾。」
喺我伸手握住門柄，打算打開門出去嗰陣，周樂恆將我叫停
「係？」我擰轉身望佢
「今日你okay嗎？唔…」周樂恆嘅眉頭輕輕一皺，一副欲言又止嘅表情
我輕輕抿唇，微微側頭表示我唔明白佢嘅意思


「陣間F&A上嚟開會，你…okay？」
原來佢擔心我又會見到葉子朗
聽到佢嘅關心，我嘅笑意溢出
「我真係冇嘢呀～」我望住周樂恆，用手掩嘴笑，「你唔洗擔心我，真係，方芷諾咁tough，你唔洗擔心佢～」
「嗯…」佢收起擔心嘅表情，露出微微，然後點點頭
我把門輕力閂上，番埋自己嘅位做嘢
陣間F&A會上嚟，咁即係又要見到葉子朗
其實我真係okay，要面對佢，其實我冇所謂
心情突然間有啲緊張添～陣間又可以見到佢
我坐喺自己位嗰度做嘢，望向隔離放住一個個黑色文件夾嘅位置，呢度係我今個星期要做嘅嘢


我抽出其中一份文件，然後打開灘平喺枱面，手放喺鍵盤上面開始打文件
做咗一陣，我停咗落嚟，雙手亦離開咗個鍵盤
我一隻手托住額頭，完全擋住咗我自己嘅視線
喺手下嘅我輕輕皺眉頭，我根本就專心唔到
我慢慢企起身，伸手拎放喺枱面嘅水杯，然後朝住茶水間行過去
我行入茶水間，將個杯放喺咖啡機嘅出啡口下面
我腦海入面嘅每一個角落都停留喺今朝早嘅畫面，我完全冇辦法控制到自己唔去諗呢件事，唔去諗葉子朗呢個人
最後一滴咖啡喺出啡口滴出嚟，我小心翼翼咁將個杯拎番出嚟
我拉開張透明膠櫈坐低，緩和一下自己嘅精神然後先再番去做嘢
一呼一吸嘅頻率都跟隨住葉子朗嘅一舉一動而改變
「Venus？」
一把從茶水間門口傳嚟嘅聲音令我緩緩抬起頭
「Wing？你都嚟酙咖啡呀？」我微微一笑
「唔係呀，嚟酙杯水啫。」Wing微微一笑，然後行入嚟，拎起放喺咖啡機隔離嘅水壺
Wing酙咗杯水，然後瞄咗我一下


「你有冇事呀？面色好似唔係太好咁…」Wing有啲擔心咁望住我
「我冇事呀，只係今朝有啲唔舒服啫。」我微微一笑，搖搖頭，「今日你係咪要同F&A啲人開會？」
「係呀，個project好忙呀…呢幾日都冇好好瞓過覺…」Wing皺起眉頭
「忙還忙，都要注意休息呀！」我笑住咁比個溫馨提示佢
「你都係呀！」Wing露出暖暖嘅笑容，「我番出去做嘢先啦，轉個頭就同F&A嘅人開會啦！」
轉頭？即係我好快就會見到葉子朗
我企起身，打起十二分精神，行番埋位度做嘢
過咗一陣，聽到阿Wing喺出面講嘢
「Joe？你咁快上嚟嘅？唔係1015先開會咩？宜家先1010。」
「冇呀，我Boss叫我上嚟交份嘢比你地Boss。」
佢講完就行咗入嚟呢條通往周樂恆辦公室嘅直路，走向我
「唔知道你地總裁喺唔喺度呢？」Joe對我眯眼一笑，「我受我上司所托嚟交份文件。」
「佢喺度。」我企咗起身，然後去敲周樂恆辦公室嘅門，「叩叩。」
「Come in。」好快就傳嚟周樂恆嘅聲音
「總裁，Joe上嚟交文件。」我簡單咁講咗句


「okay。」周樂恆點點頭，然後望住我，「你出番去做嘢先。」
我點點頭，然後出番去做嘢
「咦…？」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link