[愛情甜故] 因為一次睇到佢打飛機,所以我地變咗做炮友: 143.S328.兩情若是久長時

「葉子朗嘅苦等，最後換嚟嘅，係確定咗佢喺你心入面嘅位置。」靜瑜嘅指尖放喺我左邊心口前，「你兩個就好似係「喺錯嘅時候遇上啱嘅人」一樣，佢等你嘅時候，你揀咗唔將佢當成一回事；到你發現咗原來佢喺你心入面係佔咗一個咁重要嘅位置，你對佢係有感覺嘅時候，佢就已經選擇咗放棄你…每次你兩個都係差少少就可以一齊，但就因為呢少少，你兩個又擦肩而過…」
「嗯…每次都係一樣咁擦肩而過…每次都係一樣。」我點頭，無力咁灘咗喺梳化上面
「機會係可以挽救番嚟㗎！今次你要鼓起勇氣直行，去挽回葉子朗啦！」靜瑜鼓勵我
「嗯！今次會成功掛…」我自己都冇乜太大信心可以挽回到佢，但係唔試過又點知唔得
「唉～」靜瑜突然間深深嘅嘆咗一口氣，然後無奈咁笑起嚟，「兜兜轉轉，始終都係葉子朗…」
我冇比答覆回應，只係微微一笑
緣份嘅嘢真係好奇妙，如果對上一個唔啱嘅人，就算對上幾多次都好，都係唔啱；但如果係一個上天注定啱嘅人，就算過程分合咗幾多次，有幾傷都好，最後仍然係會為佢回頭，最後都係會行番去佢身邊
「或者係天意啦…」我開口講
「既然係天意，咁你就順住天意嚟行啦～」靜瑜笑道
「但係我嚟緊應該要點做先啱…」我又有另一個疑問


我要點做先可以令葉子朗知道我嘅心意，睇到我回頭？
「呢個唔係應該由你自己決定㗎咩？」靜瑜無奈咁講
「唔知呀！」我企起身，「再諗下啦…」
「你今晚就早啲休息啦！」靜瑜搭住我博頭，「唔好諗咁多啦～你按自己嘅心意而行就啱㗎啦！」
「嗯…」我點頭，然後捉住靜瑜隻手，「多謝你呀…每次有事都喺我身邊…」
「多咩謝呀～識咗咁耐，我地係好姊妹嚟㗎嘛～」靜瑜微笑道
「咁我番去先啦～」我拎埋手袋，然後行出大門著鞋走
我要做啲咩先足夠令葉子朗知道我嘅心意係點呢…
由中五去到宜家我地24歲…原來已經有8年咁耐啦…
佢已經等咗我8年…如果有一個人等你8年，你會點？


佢唔會逼你同佢一齊，但佢只想你知道，佢心入面希望你可以比機會佢，佢淨係想同你一齊
做嘅一切，所有事嘅出發點都源於「你」
如果有一個咁嘅人，你會唔會感動到…？
我諗如果係女仔，一個普通嘅女仔，面對住一個等咗自己8年嘅人，內心都係會有一點小感動
兩情若是久長時，又豈在…朝朝暮暮…
我眼中嘅葉子朗，到底嘅呢8年入面係點樣？
葉子朗今日同我講嘅嘢，其實…都係一個事實嚟…
一直推開佢嘅人，係我…
一次又一次將佢拒諸於門外，一次又一次咁推開佢
係我唔相信佢對我嘅真心，覺得佢一直只係玩弄我嘅感情…


係我唔信佢，我對佢冇足夠嘅信任，明知道洛天恩一直中意佢，但係我冇好好守住佢嘅同時仲會責怪佢，話係佢嘅錯…
中意一個人，從來都唔係錯嘅事嚟…更何況捨得花8年時間去等一個明知會拒絕自己嘅人
我一直都冇正視自己嘅心意，因為我一直以嚟只係想要放低，放低過去，放低葉子朗，然後期待自己可以遇到一個更好嘅人
但有時候，最適合嘅人選其實一直都喺身邊，只係自己從未留意
心上嘅位置，早就已經留咁位比佢，咁樣算唔算係我後知後覺呢？
靜瑜嘅開解就好似一條鎖匙，解開咗一個又一個心鎖…
原來我並唔係一直否定葉子朗對我嘅感情，我所否定嘅，喺自己對佢嘅感情…
「一切都已經太遲啦。」今日葉子朗留低咗呢句說話
唔係㗎…唔係太遲㗎…一切都仲嚟得切㗎！
我即刻起行，跑到去葉子朗屋企樓下
一切都唔遲㗎！唔算遲㗎！仲嚟得切㗎！
我企喺佢樓下，諗緊我應該打電話叫佢落嚟，同佢講我有事要同佢講定係直接上去佢屋企㩒佢門鐘
點知擰轉頭一望，見到葉子朗喺遠處拎住個白色膠紙行緊番嚟
佢一直耷低頭睇手機，睇嚟冇見到我喺度
我鼓起勇氣邁步走，行去接近佢多啲嘅位置


佢發現有人企喺佢面前，擋咗佢前路嘅光，佢停咗落嚟然後抬頭
「我有嘢想同你講。」我怕佢會行開無視我，所以即刻講出我嚟搵佢嘅目的
「講。」佢拋出一個字，變起咗電話，一手插住褲袋，一手拎住膠袋
「我過嚟係想同你講，我…」我猶疑咗，我冇即刻講出我嘅心聲，話佢知其實我中意佢，我對佢係有感覺
「你咩？」佢即刻問我，彷彿係唔想再比時間我，想快啲完咗呢一切一樣

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link