[愛情甜故] 因為一次睇到佢打飛機,所以我地變咗做炮友: 142.S327.先後悔的是我

我急步行去靜瑜屋企，因為我感覺到我嘅眼淚已經唔忍得幾耐…
「叮噹！」我按下門鐘，聽到入面有腳步聲從遠到近
「你嚟啦？」靜瑜打開門，一臉擔心
見到靜瑜同望到佢咁擔心嘅表情，我即刻上前用力咁攬實佢，眼淚瞬間決堤，已經冇辦法再忍住啦…
「做咩事呀？發生咗啲咩事呀？」靜瑜閂埋門，一手攬住我，拍拍我嘅背，一手由上至下順住摸我頭髮安慰我
「靜瑜！葉子朗佢…」我已經講唔到落去，界為已經喊到喘晒氣
「唉…」靜瑜嘆一口氣，然後鬆開攬住我嘅手，「都估到一定關佢事㗎啦…過去梳化坐低先啦！」
我行過去梳化坐低，靜瑜酙咗杯水同拎住盒紙巾坐低喺我隔離，將盒紙巾放喺我同佢中間
「飲啖水先啦…」靜瑜遞咗杯水比我
我接過水杯，然後呷咗一啖，跟住就將水杯放喺梳化隔離嘅小木枱


「葉子朗做咗啲咩令你喊到咁呀？」靜瑜問我
「今日我番工…」
我將今日發生嘅事都同靜瑜講，一字不漏咁全都講
「佢仲話一切已經太遲啦…」我嘅眼淚又開始打轉，我拎紙巾抹去眼淚，「佢對我變得好冷漠…以前佢都唔會係咁㗎！一手就要推開我咁樣…佢問我當佢係咩，我都唔知答唔到佢…我唔知自己要點樣先至啱！」
我嘅眼淚又止唔住啦…
「芷諾，一直以嚟佢等嘅時間已經足夠證明佢對你嘅心意，但係佢嘅等待得唔到回報，所以佢先會心灰意冷。」靜瑜冷靜咁講，「你今日嘅一切行為，都係出自內心，你依據內心嚟行事。既然你係跟住你嘅心意去做，點解就唔肯承認你對佢係有感覺呢？」
「我…我唔知呀…」我搖頭，「佢從來都冇咁對我㗎…但係今日嗰種冷漠真係令我好難受，佢嘅說話好似一枝枝利箭咁，每講一句我個心就被狠狠咁插咗一枝箭…我好難受呀！但係佢問我當佢係咩嗰陣，我根本就答唔出…」
「你宜家想點樣先，對佢嘅話。」靜瑜問我，佢想幫我拆細啲問題，唔洗一次過堆埋
「我想…我想…」我個心好亂，唔知點算，根本就諗唔到任何嘢
「你今日同佢講話想挽回佢係咪？」靜瑜問


「嗯…我都唔知點解我會衝口而出咁樣同佢講，但係我已經講咗出口啦…」我仍然喺度喘住氣咁喊緊
「我覺得…你衝口而出嘅說話同埋你嘅一舉一動，已經代表咗你嘅心係點諗，同埋放葉子朗喺咩位置。」靜瑜微微一笑
我冇講任何嘢，只係任由眼淚滴下
「你睇完葉子朗嗰本日記之後你唔開心，佢對你嘅冷漠令你更加心痛，呢兩點已經證明咗你個心入面一直都有葉子朗嘅位置，只係你一直都否認佢嘅存在。」靜瑜握住我嘅手，「你唔係想要放低，你係一直都逼緊自己放低。」
我一直…都係逼緊自己…？
「因為你一次又一次比葉子朗傷害，你覺得同佢冇結果，所以你一直都要自己放低葉子朗。」靜瑜遞咗張紙巾比我，「人嘅心係最誠實，口會講大話，但心唔會，就好似你今日嘅舉動已經足夠證明啦…你宜家首先要做嘅事，係要了解自己個心想點樣。」
我抹乾眼淚，沉思着靜瑜講嘅嘢
我唔去承認心入面有佢嘅位置…係因為比佢傷害過好多次，所以我要忘記佢，連同過去嘅一切都拋棄
但係…佢突如其來嘅改變令我震驚同時，更冇辦法再掩蓋自己嘅心意，令自己嘅內心都起咗變化
直接以內心行事，我自己都未搞清楚發生緊咩事…


「以前嘅我，身心都比晒你啦…但你係點對我？」
「一切，都太遲啦…方芷諾。」
「放手。」
「挽夠啦，你仲想挽回啲咩？」
行為反映內心…我…葉子朗…始終係佔咗一個重要嘅位置…
只係諗起葉子朗，就成個腦都係佢嘅身影…
「認清楚啦…就去搵番人，同人講清楚啦！」靜瑜微笑道
「但係，一切都已經太遲啦…」我耷低頭
「仲有機會㗎芷諾！」靜瑜拍拍我頭，「你肯就可以㗎啦！」
「我肯…？」我抬頭，一臉不解咁望住靜瑜
「佢等咗你咁耐，係為咗要證明佢嘅心意，佢對你嘅愛；咁宜家倒番轉，你追番佢，去證明佢喺你心目中嘅重要！」靜瑜話，「同埋最重要嘅係，證明你對佢嘅心意呀！」
我做到咩…？佢會睇到咩…？佢會接受咩…？

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link