[愛情甜故] 因為一次睇到佢打飛機,所以我地變咗做炮友: 135.S320.完全相隔

「仲來日方長呀？過多幾年你30啦！都唔為自己打算下嘅…」周樂恆笑咗一笑
「我有事業呀！」我毫不在意咁笑起嚟
「女人淨係有事業唔夠㗎嘛～最重要嘅，係有頭家。」周樂恆話
「有頭家…都要搵到先得…」我望向窗外
周樂恆冇出聲，或者因為佢比唔到我，所以覺得自己都冇資格講啲咩啦
要有頭家…先算係一個女人嘅完整一生咩？
「你喺前面個路口放低我呀，我去買杯咖啡再番去。」我指住前面燈位
「好，咁你盡快番嚟。」周樂恆點點頭，然後將車駛到去前面就停落嚟
我推門直入咖啡店嘅收銀處落單
「要杯Mocha。」我比錢，佢比咗張飛我，我就行去後面等


我眼尾嘅餘光留意到喺我側邊行過嗰個人好面熟，我擰個頭過去望
我望過去嘅同時，佢咁啱拉門出去
著住銀灰色嘅西裝，帶住寶藍色嘅呔，手上拎住一杯咖啡行出去
呢個人…我一定冇認錯…
「葉子朗…！」我輕聲講咗出嚟，迅速再將呢幾個字吞番落去
佢啱啱眼尾都冇望我就直接行咗出去，佢冇見到我？
定係佢見到我，所以加快腳步走…
「方小姐，你嘅Mocha。」一個女侍應行到我面前，將杯咖啡遞比我
「唔該。」我接過咖啡，然後就行出去，離開咖啡店
佢一直行喺我前面，我望住佢個背影一直行到番公司樓下


行入升降機，我㩒咗樓層之後就企喺最角落位
佢同我同一架，佢企喺另一邊角落
有好多人湧入嚟，架升降機好不容易先閂到門
「叮咚！」升降機去到12樓，停咗，然後打開門，有幾個人走咗
終於有番少少鬆動位啦，大家都郁咗一下，企開咗啲
「叮咚！」升降機去到19樓，停咗，然後打開門，又有將個人出咗去
升降機入面嘅位又多咗啲，大家都開始企開
「叮咚！」升降機去到22樓，又停咗，然後打開門，剩低嘅人都出咗去，除咗我同葉子朗
升降機閂上門，宜家只係剩低我同葉子朗，仲有尷尬嘅空氣…
我用眼尾瞄一瞄佢，佢耷低頭望住手機


要唔要同佢打招呼好？但係佢唔應我嘅話，咪好尷尬囉…
琴日又咁樣之後…但唔打招呼又好尷尬…咁宜家點呀…
「早晨…」我微微咁抬頭望向佢
「嗯，早晨。」佢嘅視線從手機螢幕上移開，然後抬頭望咗我一下
佢講完之後又耷低頭繼續睇手機
今日佢嘅眼神同語氣…格外的冷漠…完全唔似平日嘅佢…至少喺高中之後，佢從來都冇用過呢種語氣嚟同我講嘢
佢呢個語氣就好似係機械式回應咁，就係你對住一種你冇感覺嘅嘢講一句冇感情、冇起伏嘅說話
平扁加上冷漠嘅聲線，令我地之間突然築起一道高牆…
呢個聲線令我渾身不自在之外，更令我心有啲唔舒服…
一日之間，起咗咁大嘅變化，有種無法適應嘅感覺…
佢耷低頭睇手機，一隻手拎住咖啡
佢嘅視線再冇離開過手機，落喺我身上…
每一個行為都係表現緊佢毫不在意企喺佢隔離嘅我，我亦唔再係嗰個可以令佢將視線放晒喺我身上嘅人
「叮咚！」升降機喺29樓停咗落嚟，升降機門打開
葉子朗抬一抬頭，見到到咗佢嘅樓層，然後行咗出去


頭也不回咁…行咗出去…
升降機門「呯」一聲咁閂埋，我個心都震咗一下
佢真係…完全放低咗我…點解…？
心入面出現咗一種平日唔會出現而且…從未出現嘅感覺…
點解…今次佢會咁輕易就放低我…？一日嘅時間…就完全成為咗陌生人…
我同佢之間嘅距離，突然拉到好遠好遠…
企喺後方嘅我望住佢嘅背影…離我愈嚟愈遠…
佢放低咗我，我要開心先係，但宜家呢種感覺係…
我…唔明白…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link