[愛情甜故] 因為一次睇到佢打飛機,所以我地變咗做炮友: 134.S319.這就是他心中的想法

(視角：葉子朗嘅日記，即係葉子朗)
嗰一刻我心入面只有一件事，就係唔可以唔做啲咩
見到佢比洛天恩摑一巴嗰一刻，我個心真係狠狠咁揪咗一下
但係我嗰一刻只係知道，唔為佢擋唔為佢企出嚟嘅話，我冇資格話我中意佢，亦冇資格話我要保護佢
我穿過呢啲影像，行到去我地以前嘅課室
我扭開門鎖，推門入去，今次嘅投影落喺最後嗰行嗰兩個位度
「喂！自己做啦！功課都要抄我！」佢對住坐佢隔離，落力抄緊佢份功課嘅「我」講
「唔制呀！」「我」無視佢嘅說話繼續抄
佢要收埋本嘢阻止「我」，「我」反抗，同佢就好似小學雞咁爭嚟爭去
「呀！好痛呀！你整到我啦！」


「邊度呀？邊度呀？整到邊度呀？」
「哈哈！厄你咋～」
「喂！功課簿呀！未抄完呀！」
都已經過咗咁年啦…呢兩個位唔再係我同佢坐嘅嗰個位…一切都已經唔一樣啦…
我離開學校之後周圍行下，行番以前番屋企嗰一條路
以前佢喺度過夜，第二日我地都會行呢度一齊番學
有時我會突然間攬住佢，佢會一臉慌張咁推開我，怕比人見到
有一次放咗學之後，我地行番呢條路番去，然後我好用力咁攬住佢，嗰次係佢第一次伸手回擁我
有時候回憶之所以美，係因為回不去
我地已經冇可能再番去以前咁樣…


有啲事我係知道，今時唔同往日
所以既然上天都想我同佢有一個了斷，咁就了斷啦…
拉拉扯扯咁多年，都係時候放低…
我聽日會堂堂正正咁去見佢，最後一次以「單戀者」嘅身份去見佢…
聽日見完佢…我就放低一切啦…
…
(視角：方芷諾)
一頁又一頁，一日又一日嘅日記，到底代表咗佢幾多？
6本簿，幾千頁紙，由我走咗到我番嚟，到琴日，日復日，年復年咁寫，風雨不改
記錄落嚟嘅，係佢對我嘅心意…但係佢地可以代表到佢咩？


可以代表到佢咁多年嘅心意咩？
我合埋本嘢，點解心入面會有一種講唔出嘅不協調感？
佢放低我，唔係我咁耐以嚟都想㗎咩？但呢種感覺係咩事？
之前葉子朗曾經話過我，冇中意過對方嗰個人係我，我唔係等人嗰個，所以我唔會明白等人嗰個有幾辛苦
咁多年嚟，其實唔知咩係愛嗰個…係我至啱…
呢種不協調感，或者只係我多心咗啫，我諗瞓一晚就冇事㗎啦～
我將呢本嘢，放咗喺書櫃上面，同其他書放埋一齊
或者一切都只係我多心…
只係因為我睇晒呢一本日記所以影響到心情啫，唔可以代表一切…
我呢個感覺都只係呢一刻㗎啫～聽日又冇事
佢可以放低我要替佢開心先係呀～
佢真係放低咗就好啦…或者我地之後見面都可以微微笑點點頭
睇嚟我同葉子朗之間真係可以嚟一個了斷啦
…
我一大清早就換好衫，諗住搭車番工


一落到樓下，我就行去麵包店買咗個包，打算過馬路去地鐵站嗰陣，突然有車響安
「呠呠！」
我即刻嚇咗一跳，望過去
「周樂恆？」我望到周樂恆㗎車停咗喺一邊，然後佢手仲放喺軚盤
我急急腳行過去佢車前，佢搖低車窗
「早晨喎～」佢笑一笑
「你點解仲會過嚟嘅？」我不解咁望住佢，我地唔係講清楚啦咩，佢仲會揸車過嚟嘅？
「咁再見亦是朋友嘛～我揸車嚟兜埋你得唔得？」佢微微一笑，「你要企喺度幾耐呀？上車啦！」
「哦…」我打開車門，坐上佢嘅副駕
我扣上安全帶，閂番個車窗
「我仲以為你放低咗添…」我望住倒後鏡，從倒後鏡中望佢
「吓？咁都要慢慢習慣以朋友身份出現嘅～」佢愕一愕然，然後笑一笑，「放低緊囉！都唔係一日就得㗎嘛！況且我都知道，我同你仲有幾大機會，所以放低啦放低啦！」
「放低就好啦～咁以後就可以繼續痴車坐。」我開玩笑道
「可以～日日番工兜埋你又點話～」佢點頭，「其實呀～我想見到你幸福就夠㗎啦～」
「祝前任幸福真係唔係個個都做到嘅～」我有啲似嘲諷佢，「慢慢嚟啦～來日方長。」



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link