[愛情甜故] 因為一次睇到佢打飛機,所以我地變咗做炮友: 98.S241.救星

我打開冰箱，拎咗袋冰出嚟
「嘶。痛呀...」我將冷放到臉頰上，有小小疼痛感
「阿囡，你番嚟啦?」媽媽喺睡房行出嚟，行到我隔離坐低，「做咩敷冰呀?整親呀?」
「冇事呀，唔洗擔心我。」我微微笑，臉頰即刻痛咗一下
「有心事呀?係咪發生咗D咩事?同媽媽講...」媽媽握住我隻手
「冇事...」我強忍住淚水，微微笑，搖搖頭，「我冇事...」
我望住媽媽一臉心痛嘅樣，我都唔想講自己嘅心事比佢知，我心知道，其實佢都仲關心我
呢個時候，放喺隔離嘅手機喺度響響
我望一望個聯絡人，係葉子朗...
我拎起咗電話，然後㩒咗接聽


「喂?」我好似用咗一個好冷漠嘅語氣去做開場白
「芷諾...」一個懺悔嘅口吻，卻無法打動我嘅心
「點呀?」
「可唔可以出一出嚟?我有D說話想當面同你講。10分鐘後見。」
講完佢就收咗線，我着番對鞋，帶咗手機同銀包就出咗去
「媽你早D瞓啦!」我臨出門口之前講
我一落到樓下，就已經見到佢喺度
佢見到我即刻行到嚟我面前
「我...我...對唔住...」佢望住我講
「對唔住有咩用?唔發生都發生咗啦!對唔住有用咩?」我都係講事實啫，「唔係你講對唔住就得㗎!你講對唔住有咩用呀!」


「我...」佢偶爾抬頭，無意中發現到我紅腫嘅臉頰，佢伸手輕撫我塊面，「點解你塊面紅咗㗎?」
「拜你所賜...洛天恩嚟發我悔氣，打我一巴。」我一手打開佢隻手，「葉子朗，我唔應該對你有期望，以為你會同我一齊，淨係中意我一個。」
「我真係淨係中意你一個㗎咋!」佢雙手捉實我雙臂
「你講嘢呀?淨係中意我?咁洛天恩呢?」我冷笑道
「我真係淨係中意你，你知㗎!」佢同我講
「我真係睇唔出!你中意我，所以要我被第三者呀!?乜嘢邏輯嚟㗎!」
我真係覺得好不可理喻，中意我，但逼我做咗第三者，咩事呀?
「我真係好中意你，你睇到㗎!我等咗你咁耐啦!先可以同你...」「你又想講等咗我咁耐先可以同我一齊呀!?你唔好講笑啦葉子朗!」
我打斷佢講嘢，因為我早知佢會咁講
「你等我...等咗一日定兩日呀?然後同咗洛天恩上床呀嘛!我知道呀!」我用力掙扎，推開咗佢兩隻手


「芷諾...點解你就唔可以比多次機會我呀?」佢反問番我轉頭
我都想比機會，但我點接受一個背叛我嘅人呀?
「葉子朗...」我深呼吸，「你想我點樣比多次機會你呀...」
「同番我一齊，一次機會!我一定會好好對你!」佢好肯定咁講，然後捉住我
嗯...講呀嘛...
「你放手啦!」我想甩開佢隻手，不停轉動我嘅手腕
「你應承我同番我一齊，我就放手!」佢開條件
「痴線㗎!放手呀!」「喂!葉子朗!」
突然聽到有腳步聲，個人企喺我後面捉住咗佢隻手，然後用力分開咗我同佢
我一擰轉頭，望到佢
「Alvin!」我一臉訝異
周樂恆分開咗我同佢，然後將我拉到佢身後
「又係你周樂恆!點解我同芷諾嘅事，永遠都關你事㗎!?」葉子朗瞪住周樂恆
「Venus嘅事即係我嘅事，你同Venus分咗手㗎啦!警告你以後唔好再纏住佢!」周樂恆指住葉子朗警告佢
「你以為你中意佢，佢就會同番你一齊呀?」葉子朗撥開周樂恆隻手，然後行近咗一步，喺周樂恆耳邊好細聲咁講，「呢個女仔比我食過㗎...你真係中意佢，定係唔甘心比我搶咗佢咋?」


我聽得好清楚，但佢講得冇錯...我同葉子朗...又真係上過床...而周樂恆捉住我隻手嘅力度，開始遞增
「佢比你掂過又點，重要嘅係佢個心冇變過，唔會因為你同佢做過嘅事而改變咗佢。」周樂恆為我講說話，「身體比你沾污咗，但佢個心冇，佢嘅思想冇，所以就算你咁講都好，我都唔會放棄佢...我唔係你。咁所以請你...唔好再煩住Venus。」
葉子朗望咗佢一眼，然後望一望我，之後咩都冇講就走咗
我企喺周樂恆嘅身後，聽到佢咁樣維護我，幫我，我忍住唔喊咗出嚟
「好啦，我陪你番去...」周樂恆轉身過嚟，微笑望我，但似乎因為我喊，所以佢呆咗一下，「做咩喊呀?」
「周樂恆...」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link