愛是恆久忍耐: 第三十五章

第三十五章

當胡鬧的傢夥離去,病房之中只淨低我同幾個病人,正當我以為一切歸於平靜的時候,喺我隔離病床既老伯撩我傾偈。

「後生仔,你女朋友都幾關心你啵,我見佢呢兩日一到咗探病時間就坐喺度等你醒返,重有心過我伯爺婆。第時好返記得要對佢呀！」

聽到阿伯咁講之後,我竟然有少少感動,但事實上我同Ashley重未表白,佢專登來探我有可能係因為我俾車撞既時候,係在我同佢約會期間。佢覺得係佢令到我受傷,所以就想知道我既情況,未必係佢對我有意思。

我係一個咁悲觀既人,萬一我真係餘生都會全身癱瘓,我到時候又可唔可以俾到幸福佢呢！當我一諗到咁,我就又覺得個人好鬼失落。





「阿伯你誤會啦！個女仔唔係我女朋友嚟,我同佢只不過係同學關係,加上我宜家咁既樣情況,其實同個廢人冇咩分別,我唔想連累到佢之後要照顧我呢個廢人。」我講出嚟同我心入面諗既係完全相反,雖然口講話唔想連累到人,但實際上我完全唔想佢因為咁樣而離開我。

「如果佢真係介意既話,就唔會日日過嚟搵你啦！佢有同你屋企人講話放心交俾佢照顧你。」

「阿伯你會唔會誇張咗少少呀！我唔太需要佢照顧,呢度又有醫生又有護士應該冇咩需要佢照顧既地方。」

「有醫生護士照顧你嘅地方只有醫院,你唔會無了期咁住醫院,你總會有出院既一日,你女朋友仔講既照顧其實係指之後既日子照顧你。」

之後既日子照顧我?我同佢非親非故,有冇呢個必要為左我呢個廢人去照顧我呢一生人,咁樣做真係值得咩？





隔離床老伯見到我冇反應,可能以為我睇唔開,所以就勸我唔好諗咁多,宜家既醫療技術咁進步,一定會有好返既一日。

同老伯傾完之後,我一整個晚上都訓唔到,我睇唔到我既將來,假設我真的變成終生殘廢,我又會唔會想繼續生存落去。

諗下諗下我差啲忍唔住就喊左出嚟,但係一諗到我喊既話抹唔到眼淚,我就強迫自己唔好喊出嚟。

最尾我迫自己合埋對眼,叫自己咩嘢都唔好諗快啲去訓,但越叫自己去訓就越訓唔到,加上夜晚既病房熄曬燈既情況,好陰森恐怖加埋隔離床病人既鼻鼾聲,想訓到訓唔到。