愛是恆久忍耐: 第二十二章

第二十二章
好唔容易,終於到左星期一嘅朝早。如同之前嘅習慣,我第一個返到教室。 好期待Ashley係第二個返到嚟,咁樣我就可以有機會問佢,星期六究竟發生咗啲咩嘢事。

不過我嘅願望落空咗,佢不單止唔係第二個返到嚟學校嘅人,佢直頭連學都冇返到。

到底有咩嘢事令到佢唔返學,呢個問題纏擾咗一整日。

我望住前面空空如也嘅枱面,我突然好掛住佢,雖然只係分開左短短兩日,但我真係好懷念住佢講野嘅聲音, 更加懷念佢撥頭髮時所產生淡淡既氣味。

我上堂嘅時候拎電話出嚟,佢WhatsApp最後嘅在線時間,依然係星期六,我想像唔到呢兩日究竟發生過咩事。





喺放小息嘅時候,我去咗搵阿康佢傾下呢件事。

「你可唔可以幫我分析一下,到底係咩原因令到最後在線時間會係兩日之前。」

「 有乜嘢好分析啫,一係佢個電話冇開到whatsapp,一係佢個電話就開唔到。其實分析完之後又可以點呢？ 佢就算顯示左在線,你都唔會打電話畀佢或者send message畀佢㗎喇!」

「最起碼我想知道去安唔安全,同埋咩原因令到佢唔返學。」

「你連send message嘅勇氣都冇,唔好講你直接打電話問佢,喺呢個情況之下,你又點樣可以知道佢究竟發生咩嘢事？」





「 我唔知應該send咩野message畀佢,所以咪send唔到出去囉!」

「你拎個電話畀我,我幫你send出去啦!你咪當關心朋友咁send一個關心嘅message咪得囉有幾難呀!」

阿康拎左我個電話撳咗一輪之後,就畀番個電話畀我。

「我好唔習慣冇咗你嘅課室,我等緊你返黎同我一齊上堂, 希望你快啲好返啦!」我見到佢send咗呢一段既既message出去,我就知道呢次奶嘢啦。

「大佬呀,呢個點睇都唔似係關心佢啦,你係咪玩鳩我呀？」





「咁樣有乜嘢問題啫,我不嬲都係咁樣send去關心人㗎。」

「呢個係你關心人嘅方法,而唔係我關心人嘅方法。」

「又有咩所謂喎,呢個message可以表達到你有幾關心佢。」

「呢次我真係俾你累死喇。」

「無嘢嘅,到時佢回覆你既時候,你就會知道我用心良苦㗎喇。」

「宜家都send出去啦,咁我可以點啫。」

「咪就係囉,唔send都send咗出去囉,咁你咪等下,睇下佢點樣覆返你囉。」