愛是恆久忍耐: 第二十一章

第二十一章

搭完車返到屋企,放低手上面一袋二袋屬於Ashley嘅物品。

我坐咗喺梳化上,拎起手提電話,睇到最後上線嘅時間係佢打電話畀我之後。 我其實有衝動想whatsapp畀佢,但係我又唔知應該打咩好, 同埋我驚阻住佢。

「你走得咁急,冇乜嘢事呀嘛!」
「你而家返到屋企未呀!」
「我好擔心你,可唔可以send返個message報平安!」
「你如果唔開心既話,可以同我講。同埋如果有咩需要,可以搵我幫手。」




「其實我鐘意你,你可唔可以做我女朋友。」

以上我想講既message,我全部都有打喺whatsapp上面, 只不過係臨send出去既時候,我全部delete曬。

你哋可能覺得我係冇膽,呢個我認。 作為一個從來未拍過拖嘅人,我唔清楚咁樣send出去,如果佢真係有男朋友嘅話,會唔會破壞咗我同佢宜家建立咗嘅關係,我好驚到時連偈都冇得傾。

「唉!只不過係send個message咁簡單,點解你會咁冇勇氣㗎!」

我喺心入面鬧緊自己冇鬼用。 但隔左一陣,諗深一層。當人哋真係有男朋友嘅話,我自己又憑啲咩嘢可以同人哋男朋友對比,我越諗個人就覺得越down。