愛是恆久忍耐: 第二十章

第二十章
Ashley 離開咗大概20分鐘左右,佢用whatsapp send咗個message畀我。

「 對唔住呀,我有緊要嘢要走先啦!今日我買嘅嘢,想寄存喺你屋企先,我要遲少少,先再搵你攞呀!」

「放我屋企？定係我逐少逐少咁樣攞返學校交畀你呀？」

「 唔好啦,我買咗都好多嘢,我遲少少再搵你攞返啦! 我唔講住啦!拜拜。」

「 咁好啦!拜拜。」





對於Ashley 走得咁急,我好難避免唔會諗埋一二邊。 所以我立即send message畀阿康。

「康哥,如果一個女生,突然走得好急,所有嘢都唔拎到就走左,你知唔知底係咩嘢事？」

「 有兩個可能性,第一,係佢男朋友搵佢,所以佢驚起上嚟就唔想攞住咁多嘢俾佢懷疑。第二,佢真係有啲緊要事,或者有其他原因,令到佢唔想攞住啲嘢周圍行。」

「即係佢男朋友搵佢？」

「唔一定,我只係講出個可能性。同埋人哋就算有男朋友對你來講都係好事,因為可以睇清楚成件事,如果佢真係想搵你做兵嘅話,你可以盡早死咗條心!」





「我好似冇講過,話一定要同佢拍拖。」

「隨便你啦!我哋仲未走,你會唔會返過嚟一齊唱k呀？」

「 我諗住返屋企算啦!我而家拎住好多嘢唔方便。你同班女仔玩得開心啲呀!」

我發覺我問咗之後,更加諗埋一二邊。本來諗住睇嘅漫畫書,宜家都冇心情再睇落去。我拿拿聲飲完杯咖啡之後,就決定埋單走人。