愛是恆久忍耐: 第十六章

第十六章
「 不如約係朗豪坊等。」Ashley 回覆咗message。

「 ok冇問題,喺個樣衰雕像前面等。」

「 先到先等啦咁!」

雖然我好憎人多嘅地方,但係我更憎等紅燈過馬路。 所以我行落去地鐵站再過去朗豪坊。

我本身諗住旺角中心同朗豪坊其實好近,應該會快過佢。點知上到地面,佢已經響嗰邊等緊。





「hello。」離遠見到我去,佢已經對我揮手。

眼前既Ashley,紅色格仔恤衫搭配一條黑色牛仔褲我覺得著得好型。

「乜你咁快到嘅,本身仲諗住需要等你添。」

「hehe, 我whatsapp個時,其實係附近啦,你唔會快過我。」

「 得喇得喇知你叻喇! 你諗住行咩嘢鋪頭先呀？」





「 冇所謂呀,搭咗電梯上最頂層再慢慢行落嚟攞!」

「 要搭個條電梯呀？」 因為本人畏高嘅關係,每一次去朗豪坊我都好驚同避免去搭呢個咁長既電梯。

「 係呀,呢個係最快嘅方法,我唔想等lift呀!」

雖然搭電梯係會驚,但只要唔好望返落下面,我諗都應該冇乜咩問題。

不過好多時你諗唔代表事實係一樣。到真正我搭電梯嘅時候,全程都緊扼住個扶手。所以當Ashley同我講任何嘢,我都其實係聽唔入耳同俾唔到反應。





離開咗電梯嘅一刻,我隻手鬆開嘅同時,電梯扶手印有一個好濕嘅手印。

「睇你個樣嘢好似好驚搭電梯喎。」

「 呢條電梯又長,左右兩邊都冇嘢旁住,你唔覺得好恐怖嘅咩？」

「 我又冇畏高,我真係唔覺得囉,不過你又誇張左啲啲咁多,我見你手汗好勁下。嗱!拎張Tempo去抺手。」

「 唉!你唔明我嘅心情㗎啦。拿拿林搭埋個下半場佢啦!」我一面抺手一面向上頂樓既扶手電梯行。