愛是恆久忍耐: 第十五章

第十五章
一切已經準備好,我哋開始進行呢個大話骰遊戲。

如果係兩男兩女嘅情況下,阿康通常都會同其中一個女仔做拍檔。

當女生比例較多嘅時候,阿康就會同我一齊做拍檔。 讓所有女生都同一隊,令到個形勢睇落去好似公平一啲。

其實呢個世界並無公平啲兩隻字,我同阿康合其實一早已經set好左一啲暗號會對自己有利。

我哋嘅策略,就係頭兩局我同阿康都會輪流輸掉, 令到所有女生都放低戒心。( 一開始同阿康合作,本來諗住用四局的, 但後尾發現唔對路,我同阿康協議,只要佢買牛奶嘅話,我最多只會陪佢輸兩局。)





玩到咁上下, 我就會同阿康兩個人用暗號嚟溝通。(其實暗號並唔係好複雜,只係在叫骰既時候,拍打幾多下個骰盅,代表我呢個數到底有幾多粒骰。)

雖然有暗號嘅幫助,但我哋唔能夠做到100%贏得到,只不過係令到輸既機率減低。

今日mk妹Kelly一直唱歌既關係,所以只有我哋同 Amy和Bonnie四個一直玩。

我諗唱咗大概半個鐘頭左右,Kelly 開始唔夠氣再唱落去,我哋既大話骰又玩到咁上下。各人開始輪流選歌再插播。( Kelly點既歌偏向冷門少少既日文歌,所以冇人同佢一齊唱,係中間有啲大路既廣東歌,另外兩個女仔先有機會拎枝咪去唱兩句。)

正當我可以拎住個遙控器點歌嘅時候,我褲袋嘅電話突然間震咗兩下。





「Hello,你做緊咩呀？」Ashley 用whatapp發訊息俾我。

「我同啲同學唱緊k。」

「咁開心喺邊度唱k呀？」

「旺角。」

「 我又係咁啱出到旺角喎,咁你唱k唱到幾多點呀？」





「 其實我麻麻地唱k,所以我隨時都可以走得。」

「 我都麻麻地唱k,如果你隨時可以走得嘅話畀我哋去行街買衫好唔好。」

面對Ashley既邀請,我有少少猶豫不決,到底答唔答應佢好。

阿康個死仔八卦睇到我既message, 就搶咗我個電話。

「ok,邊度等。」阿康好快手就發出左短訊。

「頂你個肺,死仔康我冇諗住應承佢出呀!」

「難得有女約你,你就走啦,呢度我應付得到,你冇唱過k,唔洗俾錢啦!你去尋找你既幸福啦!」 跟住條死仔打開k房度門,送左我出去。