愛是恆久忍耐: 第五章

第五章
基於阿康係住得好近學校,有時我會放左學去佢屋企打機打通頂,所以我有一套替換用既便服放左佢屋企。
 
「喂!我同左老媽子講出街食啦!係唔係上左你屋企換左衫先出去呀!」
 
「係呀!上左我屋企再講。」連byebye都冇句阿康就已經收左我線。
 
「叮噹~叮噹~」
門鈴響左冇耐,阿康就開門俾我。睇住佢個樣,我好難想像得到平時溝死女既阿康,竟然會有頹廢到爆既一日。
 




「嘩!咩野事你個樣好似殘左咁多既。你幾時散左,做咩唔話我知呀!」
 
「唉!呢幾日我都不停諗方法同佢箍煲,一日未散我都唔會去通知其他人。」
 
「即係話你呢幾日都冇返過學呀?你又話一日未散一日都唔會通知其他人 .但係你宜家又要我同你傾訴既?」
 
「佢今日將我個電話black list左,所以我決定放棄呢段感情。」
 
「你同佢散其實係咩野原因攪成咁?」
 




「唔散都散左,醫左個肚我再慢慢話你知。任食火鍋岩唔岩?」
 
「反正你請我食,食咩野當然係老闆話事。不過你俾我換左衫先落去得唔得。」我說完之後,阿康第一時間就拎左套衫俾我換。 
 
「你呢?你唔諗住換衫呀?」我換完衫之後發現阿康拎好所有野開定埋門等緊我。
 
「雖然我個樣頹,同冇返幾日學。但係我每一日都有換衫沖涼。何況你又唔係女,我著緊個件又唔係校服,唔洗換衫咁麻煩啦。」
 
「個頭你真係唔梳一梳先出門口?」
 




「唔洗啦!男人老狗咁鬼婆媽既你。再講既話我立即鎖你係屋等你走唔到。」
 
「得啦得啦!我唔講啦!鎖門啦你。」我一邊講一邊行出屋外。