愛是恆久忍耐: 第六章

第六章
 
我同阿康去左一間任食既火鍋店,開左位之後,阿康第一時間就去雪櫃拎枝左幾罐啤酒。
 
笠返頂頭盔同講一個小知識俾大家知先~雖然香港暫時未有法例規管未夠十歲人士飲酒,但任食既火鍋店,我眼見既就通常個雪櫃放係度任人拎,只要你唔係著住校服去拎酒,應該都唔係太過理你夠唔夠十八歲。不過當然未滿十八歲既朋友最好唔好飲酒。
(註: 香港只有”容許未滿十八歲的人士在領有酒牌的處所內飲用酒類飲品即觸犯法律”《應課稅品(酒類)規例》)
 
「其實因為咩野事你會俾女飛既?從來只有你飛女,邊有女會飛到你架。」
 
「你岩呀!不過呢一次我竟然衰係第三者既手上,我覺得係一個恥辱。」




 
「竟然有男仔能夠威脅到你既男神地位重要搶埋你條女咁勁。」
 
「女呢家野,俾條仔搶左我又唔覺得係咩野恥辱,之但係搶我條女既係個lesbian。」
 
「竟然係俾lesbian搶走左條女。你有冇條女張相可以俾我睇下?」
 
「冇。我都想見識一下到底我係輸左係咩野女人手上。」
 
「你相又未睇過,樣又未見過,你點知條女有第三者,重要係個lesbian?」




 
「我既綫人話俾我知。如果唔係佢,我重俾條女呃左以為佢真係臨近考試要溫書唔得閒理我。」
 
「你綫人既料可信性有幾多先?」
 
「100%可信。」
 
「咁你之後諗住點做?」
 
「電視劇都經常有人講”正所謂天涯何處無芳草,唔好為左一棵樹放棄一整個森林。”出面大把女等緊我去溝,佢想跟過lesbian既話就俾佢跟飽佢。」開始到宜家,阿康其實只不過係飲左兩罐啤酒,但我發覺佢已經開始亂發嗡風。




 
「其實正常來講,呢兩句應該唔會同一時間講。你條友仔平時唔係話唔睇婆媽電視劇既咩?做咩突然間講呢d老土對白呀!」雖然明知佢發嗡風,但我真係忍唔住要同佢解釋一下。
 
「是但啦!我理得佢一句定係兩句話,你明就得啦! 話時話呢度可以俾你飲酒,你做乜唔陪我飲啤酒走去飲百事可樂。」
 
「唔係我想飲百事可樂,你估我唔想飲可口可樂咩。個問題係呢度得百事可樂飲咋。」同醉左既人係溝通唔到,所以我決定左佢講咩野我都亂嗡來回應返佢。
 
「妖!宜家講你唔陪我飲酒,你講乜鬼野百事可樂呀。」
 
「都未開始打邊爐你就飲左兩罐,一陣你醉左要嘔我唔會理你。」
 
「你識咩野,啤酒係鬼佬涼茶,打邊爐熱氣呀!你都拎啤酒來飲啦。」
 
「我一陣會拎真正既涼茶飲, 所以我唔會驚熱氣。另外,為免你一陣飲醉左,個銀包俾人偷左,我幫你保管住你個銀包先。」口就話驚佢俾人偷銀包,其實我比較驚佢一陣醉左俾唔到錢。
 




「OK!銀包俾你,你幫我好好袋住佢。」