投胎之後害死全家人: 17.就等我永停留係個個23歲既我到
詩賢：
詩賢？大佬？我都唔知應該點叫你好！至今我都未能相信我地仲有機會再見，我覺得呢個一定係上天對我呢個將死之人既眷顧。能夠再次見到你，我好開心，亦都覺得好可惜。如果你仲在生，你唔係詩賢，而係我呀哥，我地就就可以一齊體驗下，原來我地屋企都可以有清靜既一日。如果你仲係到，我覺得你都會覺得幸福。
我地，仲有我地父母都成長得太慢啦！但我最終都等到呢一日，我所講既成長係思想上既成長，可能佢年紀都大啦！都知道唔可以咁樣折騰落去，佢地既關係緩和咗好多，我終於有清靜日子可以過。係呢個時候，我第一個就諗起你，如果你都係到會係幾好。
（睇到呢到，我已經淚流滿面，呀妹你究竟知唔知自己講緊咩呀！你既意思係你佢地已經改過啦！你已經原諒咗佢地！點可以？你點可以咁輕易就原諒佢地？佢地毀咗我地既童年，你點可以咁天真，單憑佢地係我地已經可以獨立自主既時候改過就原諒佢地，佢地唔配！就算我係到，我都唔會覺得幸福，我都唔會原諒佢地！）
最重要既係，我都學識咗「現實世界係唔重要」，重要既係我既內在世界。如果我依然為咗以前既事（以前既現實世界）耿耿於懷，咁我就享受唔到依家既平靜（呢刻既現實世界）。所以我既感受主要取決於我點睇，既然人生總係要過，點解唔開開心心咁過呢！
大佬！我都希望你可以開心！我死咗之後，你唔需要覺得自己有責任去幫我父母，你就當我地彼此係陌路人，你好好過你既人生，佢地都會好好過佢地既人生。
對唔住！再見！
妹
天琳
睇完之後，我喊咗出聲。我唔明，亦唔信呀妹所寫既一切！佢地一定係為咗我同父母可以係佢死咗之後過得安心先會寫啲咁既大話出嚟。咩嘢「現實世界唔重要」，根本就冇可能！如果佢講呢一切係真既，佢死並唔係因為家庭既壓力，而係因為佢個病。佢想「父母」可以好好咁生活落去，但我就誤會咗，重寫咗一封信寄出去，間接令我「呀媽」自殺。冇可能！冇可能！
我一面默念冇可能，一面開咗岩岩係舊屋拎返嚟既手機，開返我同呀妹之前既訊息記錄。我不停咁向上碌，只希望搵到證據去證明呀妹係個兩封信入面講大話，證明我所想既先係岩既。但真相係幾咁恐怖，殺我一個措手不及。
我一直碌到，今世既我仲未同呀妹見面既日子。
大佬！我個頭真係好痛，食咗止痛藥之後就好好多啦！一日食咗都唔知道幾多粒，真係M痛都未試過食咁多，哈哈！（呀妹仲發咗個好cute 既表情符號俾我，我真係好心痛，佢都係咁，「傷心既事要笑住黎講，開心既笑就要大笑住黎講」，佢幾時先可以真正咁，好好咁表達自己。）
大佬！我諗好啦！我會由依家開始賺多錢，等我就算死咗，佢地都可以有啲錢榜身。
（知道自己就死都仲係諗咗屋企人先，你叫丟低你一個人既我情何以堪？）
大佬！what the hell of this world doing？我好唔容易先等到屋企有清靜既一日，好唔容易先令自己唔再對以前既事狄狄於懷，但個天就同我開咗一個天大既玩笑。我竟然有咗腦瘤！我應該要點做至好？我可以點做？
（呀妹佢真係有病，佢真係為咗病而死？唔係為咗屋企既壓迫而死？）
大佬！呀sir 教到點樣對以前既事釋懷，佢話對於人嚟講「現實世界並唔重要」。呀sir 仲幫我催眠，解決咗我對舊事既介懷。
（催眠？我唔信！邊有可能就咁催眠一次就會可以對以前既事釋懷，現實世界點會唔重要？）
大佬！今日我地同學互相練習催眠，我叫同學幫我解決成日飲可樂呢個問題。佢幫我做年齡回溯令我回想起，有次佢地打架既時候媽咪俾咗錢我落去買可樂，佢話買完返嚟就會冇事。的確，自此以後我就對可樂上左癮，想戒都戒唔到。但係我冇俾同學幫我完成個催眠過程，除咗唔想俾其他人知道呢啲事之外。我自己都唔想再諗起以前既事，會令我覺得好難受。雖然依家屋企平靜咗好多，但偶爾我都會諗返起以前既事，都會覺得有啲耿耿於懷。我成日都想忘記以前既事，因為相比起以前，我知道我依家好幸福，我應該覺得好幸福至岩！
（我完全唔知道有件咁既事，呀妹以前從來冇同我提起過，我仲成日話佢咁飲落去會變成一個大肥婆。呀妹，以前既事我都冇忘記到，點解我地要釋懷呀？唔通佢地變咗，我地就一定要覺得幸福？錯既係佢地！）
大佬！上堂個個呀sir好好笑！一啲都唔悶！
大佬！我上網報咗個催眠課程。好似幾有趣咁，遲啲上咗堂再同你分享下！
大佬！呢幾年嚟，佢地既關係緩和咗唔小，難得既清靜。我成日都係到諗，如果你仲係到會有幾好。
………………..
………………..
我一路碌，一路碌，碌到我死個時，呀妹send嚟個句：「大佬！你下次幾時返黎？」
我用手掩住雙眼，大喊起上嚟！睇完曬呀妹send 嚟既訊息，我真係感受到呀妹對以往舊事既釋懷。啫係我做錯咗，我違背咗呀妹既意願，害到我地「媽咪」自殺埋。由始至終，走唔出嚟既就只有我一個。毀咗我呀妹幸福既，係我至岩！應該死既個個係我至岩！
我唔理天色已暗，拎住手機同兩封信出門，行上天台。為免又為我呀妹帶嚟麻煩，我求其搵咗家人，將手機同信放咗係佢地門口既垃圾袋入面。
我企係天台既邊緣，感受住夜幕下既微風，見到小鏡慢慢咁降落係我身邊。
我絕望咁問佢：「你一早就知道呢一切，係咪？」
未等到佢答我，我再質問佢：「將我玩弄係你股掌之中，係咪好開心！」
小鏡淡然咁講：「唔係！」
「你又想同我講生死有命！但係我眼中，呢個更似你設下既圈套。」
小鏡冇回話。
我自顧自咁係天台邊緣行走，一面痴痴呆呆，淚中帶點笑意咁講：「小鏡！我就唔明啦！點解現實世界並唔重要，現實世界點會唔重要，點解我呀妹會咁講？唔通小小既改變既就可以蓋過曬以前十幾年既事，咁樣公平咩？」
「呢個世界從來都冇公平呢回事！你呀妹捨棄以往既事，呢個係佢既選擇，而且呢個對於佢嚟講係最好既選擇，咁樣佢先可以安穩咁面對將來。"現實世界並唔重要" ，就好似你咁（小鏡苦笑），係你未知道真相之前，你有你相信既嘢，你有你既想法，因為呢啲想法，你有你既決定，你既做法！而呢一切一切都唔係現實世界、真相所引致你有咁決定。如果唔係你今日知道咗真相，"現實"永遠都唔會影響到你。」
「歪理！歪理！全部都係歪理！」我向住小鏡鬧。
小鏡繼續講：「事實上你一直都冇成長過！你以為你過咗咁多年，你生存咗40年，你年紀已經好大，但你冇經歷你呢個年紀應該經歷既野，有好多野你都冇你呀妹睇得咁通透！無論係我眼中，定係事實上，你都只係個個岩岩出嚟做野既23歲年輕人。你從未成長過！」
「哈哈！哈哈哈哈！.......(我瘋癲咁大笑）成長？成長就一定要選擇原諒？成長就一定要釋懷？我諗永遠都做唔到，我永遠都唔會成長！（我望住小鏡，背向天台邊緣）就等我永停留係個個23歲既我到啦！」
講完之後，我就向後倒，任由自己跌落絕望既深淵。失去意識之前，我見到小鏡望住我跌落去，向我講咗幾個字，但我聽唔到。
------------------------------------
（以下的「我」為小鏡）
「詩賢！多謝你！」
詩賢跌咗落去之後，死咗之後我個雙黑色既翅膀開始燃燒起嚟，雖然係好痛苦，但我心入面係極期待！
當我既翅膀燃燒炲盡，另一個死神朋友降落係我面前，同我講：「小鏡！我嚟送你最後一程。恭喜你！你可以投胎啦！」
我終於露出釋懷既笑容。
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/