投胎之後害死全家人: 18.我既世界並唔重要
有日，我既一個朋友小然帶咗我去一個催眠中心到。
「喂！你帶我嚟呢到做咩呀？」
「小立！我同你講呀！我係呢個催眠師到做過前世回遡，我見到我前世係一個將軍，所以今世先至咁女子漢！好準呀！你都俾佢催下啦！」
「車！呢啲都係你想像出嚟既啫！我都唔信有前世既！」
「喂吔！唔嚟都嚟咗啦！試下啦！我會陪住你架！唔怕！」
「好啦咁！你要係我旁邊睇住喎！唔准走開呀！」
「放心啦！」
-----------------------
「1，2，3，飄起！你會飄入時間既隧道，去到你既前世⋯⋯⋯⋯小立！你而家係邊？室內定室外？」」
「室外。」
「邊到嚟架？」
「天空！」
「天空？你係天空到？你周圍有咩人呀？」
「嗯！我有一對灰色既翼，我係天空到飛緊！我旁邊有一個有黑色翅膀既人同我一齊飛緊！」
「個時既你叫咩名呀？另外個個人又叫咩名呀？」
「小鏡！我個時叫做小鏡！另外個個人叫小語！」
「之後呢？之後你地發生啲咩事？」
「我地係到傾計。」
「你地講咗啲咩呀？」
-----------------------
「小語！最近點呀？好忙咩？成日都唔出現既？」
「冇咩呀！都係咁啦！」小語笑笑答我。
「你好似有啲嘢咁喎！」我有啲擔心咁問。
「冇呀！真係冇嘢！」
「真係冇就好啦！咁你就唔好成日摺埋一個人啦！」
「知道啦！我仲有幾個case要跟，走先啦！」
講完之後，小語就飛走咗先。
我總覺得佢有啲奇怪，但佢咩都唔肯講，我都冇辦法。唯有遲啲睇下點！
但我估唔到過咗一排之後，我由其他死神口中得知佢既情況，我即刻飛去睇佢。而佢變到神唔似神，鬼唔似鬼咁。身體上面有大大小小既傷口，好似有生命咁既傷口，啲傷口會變到時大時細，又會轉移去身體唔同既位置，亦會流出鮮紅既血。個時既我就唔明白，死神既血唔係黑色既咩！啫係好似我咁。而且我頂多見到有啲死神既血係深紫色，未見過有紅色既。但我都唔得閒理住呢個問題先。我要先解決咗小語既傷勢先，呢啲傷勢所引致既痛係持續既，唔會癒合，我見到小語已經被折磨到精神仿佛咁。然後，每隔一段時間，傷口移動或者改變大小既時候，小語都會痛不欲生。
我望住得返半條神命既小語，驚訝究竟佢變成咁幾耐。同人類唔同既係，我地唔會死。如果我地唔搵返問題既根源，呢啲痛苦會一直折磨佢，直到永遠。
我問小鏡：「小語！究竟發生咩事？」
而小語只係淺笑搖搖頭，講：「冇事！」
「冇事！咁叫冇事！快啲講，你講咩事我先可以幫到你架！」
小語依然搖頭。
我恍然大悟，問：「小語！你係咪救左人類？」
小語唔出聲。睇嚟我冇估錯，佢真係救左人類。我鬧佢：「小語！你明知救人係死神既大忌，點解你仲要咁做？你救左邊個？」
佢淡淡咁講：「你唔好理我！」
聽到佢咁講，我更嬲：「唔理你！要我眼白白咁望住你受苦？冇可能！小鏡，你唔好咁天真啦！死神同情人類係冇好結果架！你攪成咁，個個人知唔知道？佢幫到你啲咩？有人會同情你咩？走！我地依家就去搵佢殺左佢，咁就會冇事啦！」
「唔去！佢都唔知道我會變成咁！」
見到小語意志堅定，我同佢講：「就算你唔同我講，我都會搵佢出嚟！」
然後我就飛走咗，亦聽到小語係我背後講咗句：「冇用！就算你搵到佢，我唔親手殺死佢都冇用。」
呢點我都知道，但至小我要搵咗個個人出嚟先。呢個好易啫，只要我向其他死神打探下，就應該可以知道。問過其他死神之後，佢地都一致咁話小語經常去某個地方，我去到個個地方調查，發現個到有幾個小語處理過既投胎case，但我唔知道邊個人先係。直到我聽到其中一個人有時會彈"if you “呢首歌，我就估到就係個個人。因為小語都好中意聽呢首歌。我有啲驚訝，咁樣一首歌，小語你就俾人收賣咗？
個個年輕人叫做言天，我係佢彈緊琴既時候企咗係佢後面，佢似乎感受到我既存在。係佢彈完琴之後，佢笑住咁另轉面講︰「小語！」
但見到我唔係小語之後佢表情就僵住咗。
我對住佢鄙視一笑︰「原來係你！」
「你係...另一個死神？咁小語呢？」
「你仲好意思問小語！你知唔知你害到佢好慘！為咗救你，佢攪到自己痛不欲生。」
「你咁講係咩意思？」
我對眼前呢個白痴人類冇好氣咁講︰「救人！係死神既大忌，佢會受到相應既懲罰，呢啲懲罰會一直持續到，佢親手殺死你為止。即使係你投咗胎之後，懲罰都唔會停止，所以只要你仲生存係呢個世界上一日，佢都會係到受苦。」
佢聽到好愕然︰「我...唔知道會咁！小語冇同我講過！」
「你當然唔知啦！你只會為咗救你自己！我今日嚟，就係要你還返條命俾小語！」
佢有啲猶豫，同我講︰「我會還返條命俾佢，但可唔可以俾啲時間我？」
「唔可以！你係呢世多生存一日，小語就受折磨多一日。」我態度強硬咁講。
「求下你！俾多一日時間我，一日就夠！」
見佢咁講，我就算勉強帶佢返去，小語都未必肯殺佢，倒不如我由佢去完成未了之事後，再由佢去勸小語。
於是我應承咗佢，亦相約後日一齊係天台見，到時我會帶埋小語過嚟。
到咗個日，本身小語唔肯跟我嚟，但我同佢講︰「如果你唔嚟，我都會將佢殺死！」小語聽到之後，都跟咗嚟！但去到天台，我發現唔止言天一個人嚟咗，佢仲帶咗個女仔嚟！唔通佢知道自己要死，所以帶個人上嚟道別。
但當我同小語降落咗係天台之後，個女仔對住言天講︰「哥！呢個就係你講既個個死神？」我先知道，原來個個係佢呀妹。
言天點點頭。之後佢呀妹就對住我旁邊既小語講︰「多謝你救咗我！累到你受咗咁多苦，好對唔住！」
直至呢一刻，我先了解到原來小語救既個個人係佢呀妹，並唔係言天本人。
言天亦向小語講︰「對唔住！多謝你為我地既付出。我地已經諗好啦！我同呀妹會一齊去死。我會陪佢一齊了結此生。其實我一路都明白，畸形人係唔會有幸福架！我希望到下世我同呀妹都可以重頭再嚟過！郁手啦！小語，我唔會怪你。」
畸形人？我都知道言天係孤兒，唔知背後係咪又有啲咩事呢？不過唔理得咁多啦！我拎出一把銀灰色既長劍，遞俾小語，示意佢郁手。
但小語冇接到劍，佢向言天講︰「唔關你事！係我自願既。我唔使你地還返條命俾我。」
言天亦凝重咁講︰「今日我地係一定要還返條命俾你架！明知你犠牲咁大，我地自己就若無其視咁過新生活，我做唔到。」
小語激動咁講︰「你根本就唔明！如果你自殺，你會被撥去....」
「夠啦！郁手啦！你唔郁手，我就會郁手架啦！」未等小語講完，我就打斷咗佢想講既嘢！我真係唔想呢件事陣間有咩變數！說時遲，那時快。言天應該知道小語係落唔到手，佢企埋天台邊緣，準備跳落去。傷勢慘重既小語想阻止都阻止唔到。言天果斷咁跳咗落去，而小語只能眼白白咁望住佢跌落去死去。旁邊既細妹就流淚企咗係到叫小語郁手，佢合埋眼講︰「帶我去搵我呀哥啦！我準備好啦！」
望住小語淚流滿面咁望住眼前言天個妹，我知道原來死神都會流淚既。呀妹見小語遲遲唔肯郁手，於是都企埋係天台邊緣。我見到之後心入面都有啲焦急，因為如果佢就咁自殺，件事係唔會完。小語要係佢投胎之後再殺佢，懲罰先會解除。我皺眉將劍遞俾小語，呢件事唔可以再拖啦！
眼見言天個妹就要跳落去，小語果斷咁拎起我手上把劍，用僅餘既力氣舉起劍砍落去，令呀妹頭身分離。只見小語殺咗呀妹之後，跌坐咗係地下，身上既傷口慢慢癒合，但眼神變得空洞。我明白心軟既小語相比起解除自己既懲罰，佢更怕會害到呀妹同佢呀哥一樣被撥入畜牲之道，所以先會狠心殺咗呀妹。
正當我以為件事已經告一段落既時候，我見到小語既個對翅膀突然燃燒起嚟，直到化為灰燼。冇咗翅膀既小語抬頭向我微笑，同我講︰「小鏡！多謝你！」
之後就有另一個死神降落係我地身邊，佢同小語講︰「走啦！我帶你去投胎！」
望住遠去既小語，我將最近所發生既所有事串連起嚟，終於明白一切。原來死神都可以投胎，當我地草夠人類死前既絕望能量，我地就可以再世為人。而逐漸變黑既翅膀同埋變鮮紅既血，就係代表我地所收集絕望量既進度，收集得越多，身體結構就變得越似人類。見到岩岩小語釋懷表情，不禁令我懷疑呢個係小鏡自設既局，就係為咗收集更多既絕望能量。但係佢又點解會喊？岩岩既眼淚都係佢既演技？唔理咁多，雖然佢有可能利用咗我。但至少佢既事，俾我發現到一條出路。就係，我都可以利用愚蠢既人類。
-----------------------
「一，二，三，返返去再近啲既時間睇下發生咗啲咩事！當時既你，啫係小鏡，你係到做緊咩呀？」
「我係天台到同緊一個叫做蔡天琳既女仔講嘢。」
「你地講咗啲咩呀？」
-----------------------
「天琳，你呀哥上緊嚟！」
「嗯！多謝你俾我見佢最後一面。」
「我有件事想問下你，既然你話你已經對以前既事釋懷，點解你仲要死？留底，話唔定你就可以渡過呢個難關！」
天琳淺笑，無奈咁講︰「我只係有啲驚！我已經想像到，我父母係我病床旁邊吵鬧既景像。一諗到呢到，一諗到個個無能為力既自己，我就有啲驚。我真係好怕失去我依家所擁有既一切。如果最終會係變成咁，我寧願早早了結！」
「咁你仲講現實世界並唔重要？」
「我冇講錯！現實世界真係唔重要，我既現實世界真係唔重要...我既世界並唔重要！」
「我明白啦！」
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/