投胎之後害死全家人: 16.如果佢生存就係為左折磨我地，咁佢的確應該死
小鏡望向我，講：「咁你明唔明？」
「咁啫係咩意思呀？」我驚恐咁問。
小鏡望住手上剛剛揮落嚟既劍，鮮血沿住劍柄流至劍峯，一滴一滴咁滴落地下。佢緩緩開口：「死神，都有死神要遵守既規矩。死神只可以殺人，唔可以救人，任何擅自改變世界生死規律既行為都會得到懲罸，就好似我岩岩先咁。而呢個懲罸會一直延續，直到我親手將我原本所救既對象殺死。」
我默默咁望住小鏡，低頭流咗幾滴眼淚。見到佢咁樣，我心入面都唔好受，一切都係因為我太任性！視佢既警告如無物，以致傷害到我身邊既人。就連眼前呢個同我呀妹一模一樣既死神都係，其實死神做嘢又何須向我解釋，我又有咩資格要佢犧牲自己去救我呀妹呢！
「對唔住！」我同小鏡講。
小鏡冇話接唔接受我既道歉，只係抬頭望向天，自顧自咁講：「雨，越落越大啦！你快啲返返入屋啦！」
我點點頭，執拾下地上面既野，就行返樓梯落去。
————————————-
詩賢走左之後，一個擁有一對灰色翅膀既死神降落左係小鏡旁邊，微笑對住小鏡講：「有必要做到咁既地步咩！」
小鏡淡然咁講：「呢個只係計劃既一部分！仲差少少！」
另一個死神望望小鏡身上鮮紅既血，講：「好耐冇見過鮮紅既血啦！真係只差小小。真係有啲唔捨得你！」
小鏡調皮咁對佢講：「但係我一啲都冇唔捨得。」
————————————
到左呀妹死左既第7日，我估我「父母」應該已經收到我寫既個封信啦！唔知佢地睇到之後會傷心嗎？會痛苦嗎？會懺悔嗎？
我聽講呀妹之前做既個間青年中心會幫呀妹攪個悼念會。於是我著住黑色衫，去左參加。聽住佢既舊同事，朋友對佢既讚賞，望住投影機投影出佢既笑臉，個種開朗正面既樣貌，一啲都唔似細個既佢，亦都唔似我重生後認識既佢。就係咁樣一個大好青年，親手斷送自己既生命。
到悼念會完咗，我準備返屋企，但到我行經舊屋樓下，我見到好多人係地下向上望，於是我都向上望，隱約望到有個女人企左係天台，望真啲，個個係「媽咪」。佢係咪選擇死去懺悔呀！我問我自己。但就算佢懺悔，都太遲啦！
「睇嚟佢收到個封信啦！」小鏡突然出現係我旁邊，同我講。
我冇出聲。
「你唔上去勸下佢？」
我冷漠咁講：「你唔係講生死有命，我點做都冇用咩！」而且係我根本唔想救佢。
「嗯！雖然我知道你憎佢，但我估唔到你咁狠啫！」
我苦笑：「如果佢生存就係為左折磨我同呀妹，咁佢的確應該死，因為我，同埋我呀妹都已經唔係到啦！」
講完之後，我就轉身離開。
「呯！」
聽到巨響之後，我抹一抹眼角流出嚟既眼淚，勉強咁提起嘴角去笑，心諗：「果然！女人都係太感性！」
到咗第二日，我睇到報紙上面寫咗尋日「媽咪」跳樓既事，入面有一小格係講我老豆因為妻女相繼自殺，大受打擊，身體唔好已經被送咗入老人院！我望住份報紙，沉重咁嘆咗一口氣，心入面諗：點解佢仲唔去死？「媽咪」同呀妹都已經死曬，佢仲有面活落去？
「老豆」咁既作為，又令我諗起，佢以前見到有人自殺既新聞都會同我地講：「無論發生啲咩事都唔應該死，只要生存就仲有希望！」依家既我諗返起佢講既呢句話我都覺得好可笑，就係佢同媽咪逼死咗呀妹！希望？就係佢地將呀妹僅餘既希望都攞走！就係佢地親手將呀妹逼上絕路。
睇到單新聞之後，我就知道依家屋企一個人都冇，而佢地啲嘢好可能好快就會有人嚟收走。我皺住眉頭係到沉思，咁咪啫係呀妹既遺物會俾人掉曬！我手上除咗兩封信之外，就冇任何可以用嚟紀念呀妹既嘢！所以我決定去舊屋到望下！當我去到「屋企」門口，我左右張望睇下周圍有冇人，確認冇人之後，我就輕輕打開個窗口，我知道佢地一路都有收埋一條後備匙係到，順利拎到後備匙之後，我即刻開門入去，關埋門。
係冇人既情況下我入返我既舊屋，可以緻細咁望返呢個地方。我行入呀妹間房，同以前一樣，都係咁整齊乾淨，書櫃上面放住一個個大file，上面都清楚寫明入面係放咩既。月結單呀！信用卡單呀！同埋我見到一個寫住「大佬」既file，我拎咗出嚟睇，入面放咗我大學既成績表，畢業證書，身份證副本等等！的確，呢啲重要文件，我呀妹都會主動幫我keep，我要用既時候問佢拎。佢亦會keep 住我既身份證副本，有時幫唔係香港既我攪一啲手續。我忍住眼淚，將file放返去原位，再周圍望下，想睇下有冇啲咩有紀念價值既嘢可以帶走。我打開衣櫃，又打開櫃筒望。終於俾我望到係佢櫃筒入面收埋咗一條我送俾佢既手鏈，係我去意大利買返嚟既手信。佢係我去旅行既過程入面經常whatsapp 我「提」我買手信俾佢，順便提我注意安全，然後我行過某街頭見到條鏈幾靚就買咗！佢雖然冇話好中意，但我岩岩買俾佢個一年，佢都係日日戴，直到唔知幾時，佢先收埋咗冇再戴。
我拎走左條鏈，然後再行返入「我」間房到望下，我第一眼就望到枱面個部手機。我係到諗如果我睇返部手機，我就可以知道呀妹之前同我講過啲咩嚟！佢呢一路以嚟既心情如何！雖然睇咗之後我可能會好難受，但我都係拎走埋部手機。
臨走之前，我企係屋企中間再認真咁望多次呢個地方，呢個我曾經努力擺脫，但依家又有啲不捨既地方。呀妹走咗，「父母」都走埋，我以後都再冇理由返返嚟呢到。
再見啦！呢個令我痛苦既地方！
返到屋企，我收拾咗一下心情，終於打開左呀妹寫俾我「父母」既信。
老豆、媽咪：
對唔住，我係一個不孝女，唔可以陪住你地終老。
我真係太攰啦！已經再受唔住病痛既折磨，我冇同你地講過，我生左腦瘤。每日每夜，我個頭都痛到好似要裂開咁，就算食幾多止痛藥都冇用。醫生話可以做手術，但成功率好低，如果死唔去更可能落下病根，拖累你地，我真係唔想咁，所以我選擇左放棄。不過你地唔好咁傷心，對於我嚟講，呢個係一種解脫。
我愛你地，可以做你地個女，我覺得好幸福。
仲有既係，我銀行卡既密碼係957744，入面有50萬，我知道呢筆錢並唔多，但希望你地慳住使，呢個係我最後能為你地做既事！
不孝女
天琳上
我成身震住咁拎住手上個封信，再望向台面既另一封信。我用震抖住既手去拆另一封信。我一面開，一面係到諗：腦瘤！我完全唔知道呀妹病咗，原來佢成日食止痛藥係因為頭痛。佢星期六日都去補習，唔休息，就係想同父母賺多啲養老金。究竟佢仲有啲咩係我唔知架！
我打開咗第二封信睇埋落去。
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/