投胎之後害死全家人: 15.辜負
「你講得岩，太遲啦！太遲啦！我地都返唔到轉頭。」
我望住下面，跳落去係咪就好似呀妹咁如願得到所謂既解脫啦！一切都係我既錯，如果我再早啲同佢相認，如果我再關心佢多啲，我地係咪就唔會攪成今日既地步。佢，今日就唔會死。到我企係到望住下面，我覺得自己終於有啲明白呀妹既想法。死！又有咩好怕呢！最怕就係生無可戀，絕望令人行屍走肉咁生存。
我望左小鏡一眼，再背向街邊企合埋眼，準備瞓落去。
「你當然可以就咁瞓落去，所有既野一了百了，但你就會辜負左你今世既父母。我已經警告過你，要好好認清自己係為今世而活。唔通你要你父母一齊為你既前世負責，承受失去個女既痛苦？」小鏡對我講。
我張開眼講：「我父母仲有我細佬，但我呀妹就只有我。」我再次合埋眼，準備瞓落去。但小鏡焦急咁再講：「你咁做辜負最深既就係你呀妹！」
我聽完皺住眉咁望住佢。佢回復冷漠，毫不在意咁繼續講：「如果你而家跳落去，聽日既報紙會點寫？一個社工同佢既補習學生係同一個位置前後腳跳樓，你估報紙會點寫！啲人會點睇你呀妹？到時不但冇人會可憐佢，佢仲會背負好多既罵名，你學校既老師會怪佢，你既父母會恨佢。而呢一切都係因你而起。」
小鏡呢番話如雷貫耳，我緊握自己既拳頭，不憤時至今日我連選擇死都唔可以，但為左呀妹既名聲，我知道我應該保護佢既名聲，我唔想有任何人誤會佢。於是我即刻離開天台，沿樓梯行返落去，依家我甚至唔可以俾人發現呀妹死個刻同我一齊，如果唔係報紙又唔知會點寫。落到樓下，見到呀妹條屍，我抑壓住衝上去既衝動，一面喊，一面掩住面衝左返屋企。
我一返到屋企，媽咪就見到我喊曬咁，緊張咁問我咩事。呢刻我既情緒終於崩塌。
「呀⋯⋯嗚⋯⋯媽咪呀⋯⋯」
媽咪問我咩事，我都冇講到，只係不停咁喊，喊到喘曬氣，仲喊到嘔。而我媽咪就攬住我，陪住我。佢等到我稍為平靜返小小既時候都有嘗試再問我發生咗啲咩事。但我冇講到，因為我唔可以講，講咗佢亦唔會信，信亦唔會明白我此時此刻既心情。我之後就一個人入咗房靜下，但我成晚都瞓唔到。腦入面全部都係係天台所發生既事，一路係到諗如果我早啲同佢相認，如果我再早啲上到天台，又如果我勸到小鏡出手，呀妹就唔會死。呢一切都係因為我，因為我做得唔夠好，呀妹先會死。
如果，如果，如果⋯⋯
我默默咁瞓係床上流眼淚，直到第二朝我太攰不知不覺瞓咗一陣，到我9點幾既時候我醒一醒，突然醒起呀妹同我講過佢寫咗兩封信放咗落我信箱到。於是我即落樓，將信拎入房。我望住兩個信封，其中一封上面呀妹字體端正咁寫住「林詩賢收」，另一封就寫住「媽咪、老豆」。我摸摸信封上面既字，又忍唔住喊咗出嚟。我實在唔敢開嚟睇佢寫啲咩。雖然以我對呀妹既認識，佢一定係係入面寫啲令我安心既話，佢一定會話唔後悔，唔怪我，但佢又點會知道佢呢啲説話根本就安撫唔到我，只會令我更內疚。而家既我仲未夠勇氣打開封信，於是我諗住等一排先再開嚟睇。然後我又望一望呀妹叫我轉交既信，係到諗要點樣交俾「媽咪」，放底信箱定直接俾佢好。
正當我諗緊點做之際，我又諗到呀妹寫俾「父母」信既內容一定就好似我咁諗法，入面一啲都唔提自己所承受既痛苦，叫佢地唔好傷心，好好咁過埋下半世。
但，憑咩呀？佢地逼死咗呀妹，仲想好好咁過埋下半世。點可以得我同呀妹痛苦，佢地仲可以自以為自己咩都冇做錯。我唔容許！我唔容許！我一定要佢地同我一齊沉入痛苦既深淵，一世都係咁。於是，我亦冇拆開個封信，我憑住我呢段日子補呀妹既經驗，模仿佢既字跡寫咗另一封信，信入面只係短短幾個字，因為我已經諗唔到更多既字句去表我既恨意。
封信就係咁：
「我恨你地，係你地逼我架！」
我一面寫既時候，一面諗呀妹你恨佢地嗎！係咪恨到要死？
我寫完之後，冇即時放到去佢地既信箱到，因為我怕俾樓下保安見到。所以我將信放入郵筒寄出去。咁隔幾日之後，佢地就會收「呀妹」死之前寄俾佢地既信。
之後大概因為媽咪都睇到新聞上面報導「呀妹」自殺既事，於是佢都冇再問我咩事，但就極留意我既狀態。
到咗呀妹死咗既第三日，個天橫風橫雨，我既心情仲未平復，但得知天台俾警察解封咗之後，我著咗雨衣，拎咗把傘，仲拎住屋企部細細個既電子琴，走咗上天台，想係天台彈Cannon in D。如果正如小鏡所講，呀妹已經投咗胎，佢唔會聽到我彈琴俾佢聽，但我依然想係到彈。
我將琴放左係地下，開左一把傘放係琴上面擋一擋雨水。我就坐係地下一面彈，一面默默流眼淚，冰冷既雨水打落我塊面到，將我溫熱既眼淚都瞬間變得冰冷。而我成個人亦越坐越凍，越彈越凍。彈彈下，我見到有一片黑色既羽毛仔飄左落琴鍵上面，抬頭望，只見小鏡企左係之前呀妹企既位置，佢將黑色既翅膀收起背後。同個日唔同，佢係輕輕地收埋，冇引起一點風，安靜地。
而我一啲都唔歡迎佢，當時就係因為佢阻止我，呀妹先會死。我同小鏡相視許久，冇講到野，直到我撇開頭，同佢講：「你走啦！以後都唔好出現係我面前。」
佢冷漠咁講：「念在你而家咁傷心，我會原諒你用咁既語氣同我講嘢，但僅此呢次。」
聽到佢咁講，我惡狠狠咁望住佢。
佢見到我咁，嘆左一口氣：「雖然我覺得我冇必要向你解釋，但係我地依家咁既關係不利我地以後既溝通。你起身行過嚟，我有啲嘢俾你睇。」（佢招手示意）
我不情願咁起身行過去。佢指一指佢腳旁邊既石縫，我望過去，有棵野草生長係石縫之間，但岩岩已經俾雨水打到貼曬地，就嚟被打出石縫。係呢個時候，小鏡伸出一隻手放係小草上面，幫小草擋雨水。只見，小鏡隻手既手背皮膚突然冒出煙，表皮好似被烤咁變紅燃燒。直到小鏡伸手捉住棵草，將佢係石縫中掹出嚟，佢隻手先正常返。
我疑惑咁望住佢：「咁啫係咩意思？」
佢苦笑：「仲有，你再睇下！」
天空突然落出一道閃電，我見到空中有一隻雀仔被閃電既花火輕輕打到其中一隻翼，漸漸飛唔起，跌跌撞撞咁準備跌落地下。但係佢跌落到小鏡身邊既時候，小鏡伸手接住左。一切發生得好似閃電咁快，小鏡接住雀仔既個隻手出現好似地震後地面分裂既傷口，個傷口好似閃電咁由手掌到劈向前臂、上臂、膊頭、頸、面、到眼個到成隻眼裂開成朵花咁既血肉。我嚇到倒退幾步。
只見小鏡擦擦嘴角既血，舉高另一隻手，個隻手慢慢冒出一把銀灰色既劍，而小鏡接住雀仔個隻手將雀仔拋向空中，握劍之手手起刀落，斬落去，將雀仔斬成兩半。然後，小鏡身上既傷口又再慢慢癒口返。但岩岩濺係佢身上既血仲係到，冇消失到，向我證明岩岩係我面前發生既一切都係真既。
小鏡望向我，講：「咁你明唔明？」
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/