投胎之後害死全家人: 14.太遲啦！

「死個個應該係我至岩！」
睇到呢個訊息之後，我根本冇時間理咩身份唔身份，咩承諾唔承諾，我即刻用我自己部手機打俾呀妹，冇人聽。再用「我部手機」打去，都係冇人聽。
於是，我再傳訊息俾佢：
「你係邊呀？」
「我而家嚟搵你！」
「唔好做傻事呀！」
「我係你呀哥呀！我地見個面啦！」
我send 咗好多訊息俾佢都得唔到回應，於是我即刻跑上去佢屋企搵佢，但我拍極門都冇人應，連我「父母」都唔係到。咁我就更擔心啦！佢係咪就係突登簡佢地唔係到既時間去做傻事。之後我又去咗青年中心到搵佢，但個到啲人話佢已經辭咗職，前日係最後一日返工，但我竟然一啲都唔知。此時此刻我非常焦急，已經諗唔到呀妹仲會去邊到，只諗有個人（神）可以幫到我，就係小鏡。我係心入面呼喚佢，求佢出嚟幫下我。但係冇用，佢冇出到嚟。
於是我係青年中心即場借咗琴房用，彈起「if you」呢首歌，我彈咗一次又一次，緊張既我彈到手都震埋，又因為擔心開始流眼淚，根本就彈唔好，但我堅持繼續彈，希望小鏡會出現。我心入面一路諗：「小鏡！求下你！幫下我，救下我個妹，我求下你。」
似乎小鏡終於聽到我既祈求，出現咗係我面前。





「詩賢！你咁又何必呢？」
「小鏡！我呀妹依家係邊？」
「你去到都冇用，你想親眼見住佢死？你會後悔架！」
「唔係！我係要去救佢。」
「你救唔到佢！生死有命。」
「咁你都俾我見佢最後一面。」我改變自己既說法，希望小鏡會同我講呀妹所在既位置。
「我知道你諗緊咩！我可以同你講冇用！」
我終於忍唔住，跪咗係地下，飲泣咁講：「小鏡！如果我見唔到佢最後一面，我會後悔一世。求下你，講俾我知，佢係邊！」





小鏡嘆咗一口氣：「唉！我欲乘風歸去，又恐瓊樓玉宇，高...處...不...勝...寒...。」佢最後一句讀得特別慢。我諗我知道係咩意思，我即刻搭笠上天台。小鏡亦跟住我係笠入面，同我講：「我強調多次，你去到都只係能見佢最後一面。」之後就消失左係我面前。

到我上到天台，我果然見到呀妹危企係天台邊緣，係兩個呀妹至岩，兩個一模一樣既呀妹，無論衣著定樣貌都係。我知道其中一個一定係小鏡，佢想阻止我救呀妹。我行近小小佢地既位置停低，我驚行太近，佢地（佢）就會跳落去。我望住眼前既兩個呀妹，分唔到邊個先係真，邊個先係假。尤其佢地有時同步咁講嘢！有時左邊個個講完，右邊個個重覆，有時又右邊個個講完，左邊個個重覆。我知道咁樣做對可以睇穿人諗咩既小鏡而言，的確輕易易舉。
「呀哥，你嚟啦！」佢地同時向我講。
「你點知？」我驚訝咁問佢地。
佢地調皮咁搖搖手上面部手機，講：「你自己同我講話嚟搵我既！（沉默一陣）哥！你都唔好當我傻，由我收到你生日祝褔既時候，我就搵咗人去check邊個hack 咗個電話number。我就更確定你係我呀哥！ 」
「更確定？」
「一開始我仲係到諗呢個世上點會有一個人做筆記既方式咁相似，字體咁相似。我仲以為你地做筆記既方法都係睇同一本書學既添。（佢地皺一皺眉頭）直到我見到你係筆記簿上面畫既圖案，個個食人花既圖案。食人花上面有幾多牙齒，就代表個課有幾多個大重點。我問我自己，呢個都係巧合？」
我本來諗住一面聽，一面睇清楚邊個先係真細妹，但佢地講既説話真係聽到我呆咗。我從來冇同呀妹講過食人花公仔既含意，但佢竟然留意到，仲對我做筆記既方式了如指掌。相反地，佢依家企係我面前，我都認唔出邊個先係真正既佢。」
我忍住唔俾眼淚流落嚟，講：「對唔住！我係咪嚟得太遲？」




佢地低頭甜笑，左邊個個講：「唔遲！」
右邊個個接住講：「唔遲！一啲都唔遲！」
左：「一啲都唔遲！」
右：「估唔到我走之前仲可以見到你最後一面。」
左：「估唔到我走之前仲可以見到你最後一面。」
再一齊講：「知道你過得好，我就安心啦！」

我緊張咁講：「唔好，今日唔會係我地最後一面，既然我地相認返，我地以後就可以成日見。我知，我以前成日丟底你一個，對唔住！但以後唔會啦！我唔會再丟底你一個人。信我，唔好走，落返嚟！」

呀妹嘆咗一口氣：「我從來冇怪過你。（摸住自己個頭）但係我真係頂唔順啦！我個頭好痛，好痛，成日痛到瞓唔到（左邊既呀妹轉向右邊望向下面，右邊既呀妹轉向左邊望向下面），如果我跳咗落去，咁就唔會再痛啦！我就可以解脫啦！（佢地一齊再轉向我呢邊向我笑）呢次係我要丟底你先！對唔住！」

原來呢個先係佢成日食止痛藥既原因，究竟佢既壓力有幾大先會頭痛成咁。我真係好心痛！
「唔好呀！呀妹！」我喊住咁叫佢。
佢只係無奈咁笑，講：「哥！唔好喊！生亦何歡，死亦何苦。你教我架嘛！我唔怕！但最後想你幫我做兩件事，第一件事，我係你信箱入面放咗兩封信，一封俾我父母，一封俾你既。請你幫我交俾佢地。第二件事係，唔好望住我跳落去，我唔想你傷心。哥，忘記我地啦！唔好再俾前世糾纏你，放過自己。我祝福你！」





「生亦何歡，死亦何苦。」
細個我地去姑丈喪禮既時候，我同傷心既細妹講過。姑丈係長年病患，要成日食藥，成日出入醫院，好多病痛。我同呀妹講，唔好傷心。對姑丈而言，死，可能係一種解脫。

聽到佢去意已決，我已經喊到收唔到聲，只想盡力叫住佢。
「呀妹！嗚......唔係咁架！唔係咁架！我地可以重新開始，我地仲可以過得好開心架！嗚......唔好走，求下你，求下你。我依家再嚟過，嗚......仲未遲架！仲未遲架！我地仲有時間。唔好呀！」

右邊呀妹講：「太遲啦！」佢苦笑。
左邊呀妹望一望右邊呀妹，再向我露出笑容，講：「太遲啦！」
呢刻我就清楚知道右邊個個先係真正既呀妹，但我見佢地都同時企直左個人，兩個都準備放鬆自己跌落去。我衝上前想捉住佢，佢已經開始向後傾倒。
而小鏡就展開佢背後一雙黑色既翅膀，佢展開翅膀既個股風力大到將我吹跌左落地下。當我再次抬起頭望，見到漫天飄落既黑色羽毛，而呀妹，已經唔再企係天台邊緣既位置。
「呯！」
伴隨而嚟既係，重物墜落地面既撞擊聲。我唔敢相信眼前發生既事，我爬起身，行上前想望下呀妹既身影。但小鏡撥一撥翅膀，個股風力再次將我吹跌。
「詩賢，唔去望佢既死狀，係你依家唯一可以為佢做既事。」
「呀⋯⋯唔好阻止我呀！」我衝上前望落去，隱約見到呀妹，同個一攤血。





「小鏡！我知道佢會去投胎，求下你。俾我係佢投胎前見多佢一面。」我仲有好多野都未同佢講。
小鏡望望下面，對我講：「佢已經投胎啦！」
「去左邊呀？」我激動咁問。
「所有自殺既人，都會撥去畜牲之道，投胎為畜牲，100年之後先可以再世為人。呢個係對自行了結生命既人既懲罰。」

竟然，所謂既解脫就係生世為畜。點解呀？點解小鏡你唔救佢？明明你可以救到佢。
我緩緩企上天台邊緣，岩岩呀妹企既位置，講：「你講得岩，太遲啦！太遲啦！我地都返唔到轉頭。」

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/