投胎之後害死全家人: 13.佢地幾時先死！

「你真係同我「呀媽」一模，一樣。」
媽咪聽到之後，有啲愕然咁望住我。的確，我又因為嬲得制而口誤，不過佢地兩個都一樣咁唔講道理。我所遇過既兩個呀媽都係咁唔講道理，單純將自己既怒火發泄係我身上。我真係受夠啦！
之後發生既事可想而知，我地又冷戰，過一排，佢又背返佢既鬧人對白出嚟。
「你咁既態度算點呀？⋯⋯都未出嚟養我就咁對我，以後仲得了既！⋯⋯唔同我嘢好同我走，唔好係到住！」
而我只係淡淡咁講：「你除咗識要脅我之外，你仲識啲咩！」
佢聽到之後更加嬲，講：「咁你同我走，即刻走！」
我淡定咁講：「你放心，到我有能力走既時候，唔駛你趕，我都會即刻走。」
佢聽到之後都啞咗，冇嘢講。

呢件事都未完，一日我突然收到呀妹send 落「我手機」既一個信息，令我好擔心。




「究竟佢地幾時先死！」
佢地？佢地係指邊個呀？我只諗到我既「父母」。
因為小學既時候，呀妹都問過我咁既問題。
「究竟佢地幾時先死！佢死咗之後，我地就可以去孤兒院，咁我地就唔使受苦啦！」
我答佢：「冇咁快！男人平均壽命係七十幾歳，女人就八十幾歲。」
見呀妹聽完後沉默，我再講：「但等我地大啲我地就可以自己搬出去。」
「咁我地一齊搬出去，你會帶埋我架可？」
我點點頭。
事實大家都知道，搬走既時候，我冇諗起過呢件事，個次留底咗佢，就係永遠。
而最近係咪又發生咗啲咩事，點解佢會講到咁，我真係好擔心。




但我去佢個到補習既時候，又唔見佢有咩異樣，不過佢畢嬲有事都唔會表露出嚟，但我又唔可以問，我都唔知點做好。

充滿煩惱既我，唯有係到彈琴減壓，諗起好耐冇見既小鏡，我彈起「if you」呢首歌。到我彈完之後，小鏡已經企咗係我後面。果然，佢真係成日監視住我。
我問佢：「小鏡！你係咪會睇到所有人既死期？」
「嗯！」
「咁我「父母」會幾時死呀？」
小鏡皺眉問：「你知嚟做咩？」
「冇！」我只係想知呀妹幾時可以解脫啫。我冇講到出嚟，但我諗小鏡都聽到。我坐底再彈多次首歌。
彈完之後，小鏡好似俾我收買咗咁，同我講：「只能同你講好快，好快。」
聽到小鏡講我前世既「父母」好快就會死，雖然我係好憎佢地，但會覺得有啲錯愕，佢地仲未老到要死，唔通會出啲咩意外？




走咗既小鏡低語：「如果俾你知道，你呀妹比你「父母」更早死，唔知你會點呢？」

---
係巴士事件一個月之後，呀媽都冇我辦法，應該就私下搵咗呀妹幫手，所以呀妹有開導下我。
「詩賢，我好明白你既感受，但我想知道你心入面想唔想同你媽咪和好。」
「想！（冷戰我都唔好受，但唔通我次次都要屈服）」
「點解？」
「因為我怕我到咗我18歲，佢會唔肯供我讀大學。」
呀妹先係呆咗，之後微笑住同我講：「詩賢！你係我見過既細路之中最聰明個個。如果將你同媽媽之間既關係當成一條數學題嚟計，你同佢一齊開心既時間多啲，定唔開心既時間多啲，我相信你好清楚。人之間相處終係有啲磨擦，而你地之間只係各自需要一個落台階。你媽咪個邊我都會落啲功夫，相信聰明既你知道應該點做。」
呀妹就唔似啲大人咁覺得仔女一定要聽曬父母話，冇逼我。相比起我既事，我更想知道佢最發生咩事。我問佢：「咁你有冇好憎你父母既時候。」
佢都係微笑講：「有！我細個好憎我父母，我諗一定比你更憎！」
「咁你依家呢？」我順勢問。
佢稍為猶疑咗陣，答：「過去既我好憎過去既佢地，但依家既我唔憎依家既佢地。em…….啫係有時，現實世界對我地根本唔重要。」
我露出疑惑既表情，講：「我唔明！」
而佢唔諗住再作解釋，拍拍我膊頭，講：「我希望，你大個啲會明。」




咁啫係點呀？我唔明呀，大個啲，佢唔知我而家已經過咗40歲啦！仲要大到幾時先會明呀！既然佢話「依家既我唔憎依家既佢地」，咁點解佢問「我」佢地幾時先死？另外，現實世界又點唔重要呢？咁咩先係重要呀？
我真係有啲無奈，好想呀妹俾啲邏輯咁答我。但我只能就咁不了了之。

-------------------

「太太，恕我直言，你真係覺得你自己係呢件事上面冇錯？」
媽咪唔好意思咁講：「我係可能有小小錯，但唔通叫我做媽咪既同個女道歉咩？」
「好多父母都同你一樣，好抗拒同仔女道歉，覺得冇面。但我並唔覺得咁樣有咩可恥，真誠咁為自己既錯誤行為認錯係一個好既行為，亦會成為仔女既榜樣。」
媽咪聽後沉默，呀妹繼續講：「詩賢係一個好聰明既細路，好有主見，好理性，對於岩既事會據理力爭，相信你比我更清楚。對於不同性格特質既子女，應該有不同既相處方式，佢更適合大人既相處方式。你逼佢，只會適得其反。」
「啫係叫我屈服啦！」媽咪有啲不滿咁講。
「我唔明點解太太你會用「屈服」呢個字，你覺得你個女係強權咩？人之間相處之間就係有好多要互相遷就既地方。而且換個角度睇，如果詩賢唔重視你，佢唔會咁嬲，聽你講佢之前已經多次提點你，因為佢知道咁樣係錯既，可能會俾人話，所以佢先想更正你，避免你俾人話。」

--------------------

我唔知呀妹同媽咪講咗啲咩，但我地之後好普通咁好返咗。食飯既時候，佢夾咗舊雞翼俾我，我又夾返條菜俾佢，咁就好返咗。唔理佢係真係明白佢有錯，定係唔想再俾我話，佢都冇再係街到大聲講電話，講既時候都壓底把聲，好似睇我眼色咁。




唉！你估我想話你既咩！我只係想你成為更好既人啫！

到之後一次既補習，我同呀妹講，我同媽咪好返咗啦！佢一臉已經知道既樣，笑住點頭。我心諗，你幫咗我，咁你自己又點呀，訊息入面煩既事係咪完咗啦？

之後因為放唔底呀妹個訊息，又咁岩到咗7月7日佢既生日，我忍唔住用「我部手機」send 咗個信息俾佢，好似以前咁，想俾啲鼓厲佢。反正我係用個部手機，佢唔會知係我，只會覺得係「我」顯靈。
「七月七日長生殿
夜半無人私語時，
在天願作比翼鳥，
在地願為連理枝，
天長地久有時盡，
此恨綿綿無絕期。」
就好似以前咁，send 咗九唔搭八咁既詩俾佢。

個晚我就即刻收到呀妹既訊息。
「大佬！你過得好嗎？」




咁我係一定要同佢講好，令佢放心。
「夠啦！」
但正當我諗住覆佢既時候，我聽到小鏡把聲係我耳邊傳出。但我轉身卻見唔到佢，不過我知道呢個係佢對我既警告。我又一時忘記咗自己既身份，自己既承諾。於是，我都係冇將個訊息send到出去。

但係，過咗一個星期之後，我再次收到呀妹既訊息。竟然係：「死個個應該係我至岩！」


#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/