投胎之後害死全家人: 12.愁起心頭不知恨

而佢只係淡淡咁應咗句：「哦！」敷衍我。
咁我而家咩身份，只係佢一個學生，又點會管到佢，但我都只係擔心佢。我地一面食飯，一面傾下閒計。呀妹一啖又一啖咁飲可樂，反而飯就食得好小。令我諗起佢以前成日係我面前講既一句：「飯可以唔食，但可樂唔可以唔飲！」
但較以往唔同既係，以前既佢每飲完一啖可樂，表現出黎個種係好爽，好舒服既感覺。但今日見佢飲可樂，飲到好似飲酒咁，舉罐暢飲，每飲一啖，就嘆一口氣。令我直覺佢有好多嘢煩緊。見到佢咁，我忍唔住問：「coke 入愁腸愁更愁，你係咪有咩唔開心呀？」
「未到恨時難知愁」佢聽到我咁講之後，突然吟起同一首詩前幾句。
而我又口快快咁接咗下一句：「愁起心頭不知恨。」
佢聽到我接咗下句之後竟然笑咗出黎，輕輕咁笑，笑到成個人搖搖晃晃咁！我心諗呢條女，唔係真係醉Q咗呀嘛！於是我望一望台上面個兩罐嘢！我好肯定佢只係飲緊可樂。於是我再問佢：「你⋯⋯冇事呀嗎？」
佢終於唔再搖晃，同我講：「我只係因為你諗起一個人。」
「邊個呀？」我諗都冇諗就問佢。
「我呀哥！佢以前成日都九唔搭八咁吟詩，好似你岩岩咁，真係好好笑。」呀妹講完又笑咗出黎，但我既表情反而變得僵硬。照道理我應該自然地問佢：咩你有個呀哥既咩？點解我從來冇見過。但我問唔出，我唔想勾起「我地」既傷心事。我只係尷尬咁應咗句：「係咩！」





返到屋企之後，我係到諗物我以前成日對呀妹九唔搭八咁吟詩咩！又真係令我諗返起以前既一啲攪笑野。
佢去韓國餐廳食人參雞湯，我就whatsapp 佢：「人參難測。」
又有一次，成日唔洗頭既呀妹，用個個乾洗噴霧噴到成頭白Q曬，我對住佢講：「君不見高堂明鏡悲白髮，朝如青絲暮成雪」。到佢梳返好個頭之後，我又講：「青風又綠江南岸，青絲又烏天琳頭。」
到我聽到佢同兩個朋友去長州玩既時候，我話：「三人行，必有我師焉。擇其善者而從之，其不善者而改之。」
又好似真係有啲九唔搭八既，我一面諗一面係到笑。

hea 下 hea 下又一年。又放暑假啦！之後我就升中五，呢一年發生好多事，我見返呀妹，我透過同佢既相處對佢多咗了解。但唔知點解我依然覺得好不安，我唔知我地呢個「師生」關係仲可以維持幾耐。我已經開始係到想像往後既日子，佢老過我，會早死過我。又或者，我唔再需要補習，佢唔再接補習，我地係咪就冇理由再見。仲有，我其實係想見佢過得好，但見到佢放假都去賺外快，同埋鄰居對佢既批評，我就知道，佢唔止要面對生活既重擔，仲要面對畸形家庭既壓力。咁既狀況下，佢點會過得好，我真係放唔底。明明生前就已經狠心咁一個人離開呢個令我抖唔到氣既地方，丟底佢一個。點解反而重生後既相遇，會令我咁在意，係因為親情？定因為內疚？我都唔知道。

點知前世既嘢已經令到我夠煩，今世既呀媽又令我咁唔省心。繼上一次冷戰，我地又係暑假既時候經歷咗一次世界大戰。事沿係咁，我呀媽成日都係街到傾電話，火車呀，巴士呀，餐廳呀！仲要傾到鬼死咁大聲，我都唔係第一次話佢架啦！
我成日都細細聲係佢耳邊同佢講：「媽咪！細聲啲啦！」但佢都唔理我。




返到屋企我又同佢講：「媽咪呀！你可唔可以唔好係街到講電話講到咁大聲呀？」
佢卻不以為然咁講：「做咩啫！講電話都唔俾呀？」
「唔係唔俾，但可唔可以唔好咁大聲。」
「唔咁大聲，對面都聽唔到。」
「如果係咁你就唔好係街到傾電話啦！其實冇人想知你啲家事，私事，你明唔明呀！」我躁躁地咁講。
但佢亦躁返我轉頭：「我講又唔係你講，唔關你事！唔好成日你呀媽做咩都噪住曬！」

唉！我冇再駁佢。於是，之後咪出事囉！
一日，媽咪又係巴士上面大聲講電話，我又係佢耳邊叫佢細聲啲！佢又係一貫咁嫌我煩。之後佢就俾一個唔識既大叔話！個大叔叫佢：「喂！師奶，你講電話唔好咁大聲啦！好噪呀！」
我以為呀媽對住我先咁肆無尼憚，但由佢既回答，我先知道佢真係傻架！自己理虧仲唔收線，仲駁人。




「做咩啫！講電話都唔俾呀？」
「唔係唔俾，但可唔可以唔好咁大聲。」
「唔咁大聲，對面都聽唔到。」
「如果係咁你就唔好係街到傾電話啦！其實我唔想知，亦冇人想知你啲家事，私事，你明唔明呀？」
「我講電話又關你咩事呢！你唔好噪就真！」
我已唔敢再聽我呀媽廢噏，而且又有其他人加入罵戰。
另一個女士對我呀媽講：「太太，你明唔明呀？呢到係公眾地方，你咁大聲講電話影響到其他人。」
佢仲不知悔改，話：「都唔係得我一個咁做！」（以前覺得佢冇邏輯，點知過左咁多年，佢依然係咁，定係佢個人本身素質有問題，根本唔關邏輯事。我好想同佢講，而家唔關多唔多人咁做事，人冇公德，唔通你就要跟住冇公德，做人唔係做到你咁架！）
佢咁無理取鬧，周圍既乘客都睇唔過眼鬧起上黎。

而我都好嬲，心諗呢個女人係都要係丟架！我講咗咁多次唔肯聽都算啦！人地講又唔聽，係都要噪，出事啦而家！我都唔敢抬頭望有冇人拍片，我自己扮唔識佢咁行到車門，諗住下站就落車，我真係唔想俾人放上網公審呀！
下站一到，我即刻落車，頭也不回咁一個人走咗，自己行返屋企。而媽咪應該就堅持坐到站先落車，所以早過我返到屋企。我返到屋企，佢第一句問我：「你做咩自己一個落車？」
「因為我覺得丟架！」我嘆氣咁講。
「丟架！我係你呀媽嚟架，你點可以唔幫我，仲話我丟架？」佢嬲嬲地咁講。
「你有錯在先，我點幫你呀。人地話你，你仲要死同人噪。我唔係第一次話你架啦！但你次都唔聽我講。依家出事啦！怪我？」




「我冇錯，我就真係唔明我錯係邊啦！講電話都有錯？」（聽完呢番話，我腦海得一個念頭，就係呢個人已經冇得救。）
我亦都發晦氣咁講：「係呀！你冇錯！我都冇錯！我係你個仔（女至岩，口誤添），所以我忍你大聲講電話，但我諗我唔使陪你一起俾人批鬥掛！」
啪！呀媽摑咗我一巴！睇嚟我踩到佢既底線，但佢又可嘗唔係踩過曬我既底線。
我掩住被打個邊面，心如死灰咁望住佢講：「你係因為講唔過我所以打我，因為你知道根本就冇道理，想我收聲所以打我。女人都係講唔過人就摑人，你真係同我「呀媽」一樣。」

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/