投胎之後害死全家人: 9.巧合
我好快就適應搬咗新屋既生活，登記好附近青年中心既會員證，得閒就落個到自修室溫書，又搵咗附近既康文署健身中心，放學就去個到做陣gym先返屋企。呢種刻板既生活好似好正常，又好似好唔正常，但我又講唔出邊到唔正常。我覺得我應該為咗呢啲安穩既生活覺得快樂，但我就唔知道點解自己就係開心唔起嚟！我諗諗下，可能係因為我冇朋友掛，以前前世既時候，我都話有幾個知心朋友，但而家既我係唔想識朋友，大概係因為我同周圍既人年齡差太大，代溝大，我覺得佢地唔明白我，亦都冇人會明白我。唔知再大啲之後，呢個情況會唔會好啲呢？
另外，前世既經歷已經令我唔再相信家人呢樣嘢！但我又唔係個啲冇血性既人，我今世既父母對我既好，我又點能夠視若無睹呢！但同時我又同自己講唔好投入咁多感情，因為同佢地越親，佢地就越容易傷害你！但點都好，我同我自己講我一定會報答佢地對我既養育之恩。但一個人只係為咗自己一個而活又有咩意義呢？人畢竟係群體生活既！所以我一路以嚟腦入面都有激烈既思想鬥爭，唔知係唔同既關係入面自己應該點投入，投入幾多。但大多數時間我都係選擇逃避，似乎咁樣係最簡單既，免卻好多麻煩。
然而，正當我已經漸漸唔再在意我同細妹住緊隔離村呢件事既時候，我又再同佢相遇。就係我去開既個間青年中心到，其實我已經去咗個到既自修室兩個星期，但而家先遇到佢。個日，我去自修室既洗手間既時候，係洗手盆既位置見到佢，呢件事發生得幾咁突然，我努力咁鎮定住自己，一面洗手，一面望住佢，見到佢身上掛住個員工證咁既嘢，原來佢係到做！佢似乎察覺到我望住佢，轉頭望向我，對我露出一個打招乎式既微笑。然後用紙巾抺乾手就走咗！而我亦慢慢係後面跟上去，想睇下佢係到做啲咩職位！我係後面見到佢用身上既員工證拍咗拍一間房門口既拍卡器，之後就入咗去，我行上去望咗望，門口上面寫住「社工室」。我好驚訝！我個妹竟然做咗社工，以前問佢大個想做咩！佢都會話：「咩都好！反正唔好叫我去幫人既工，好似社工個啲，最怕做好人！」而依家佢竟然做咗社工。不過我覺得我都唔使太驚訝既，始終人係會變既，更可況已經過咗咁多年！
但而家至少俾我知道佢已經有份穩定既工作，咁我都安心啲！如無意外，我地以後仲有機會見既。個日，正當我要離開青年中心既時候，我見到門口塊壁報貼咗好多呢間嘢舉辦既活動。有一啲運動課程，藝術課程等等。我見到有啲課程下面寫既負責人係蔡天琳姑娘。於是，我情不自禁咁報咗一個課程，係整香薰既課程。我知道我其實唔應該咁做。但我都只係想望佢多兩眼，睇下佢過成點啫！我諗咁樣唔會違反我同小鏡之間既承諾掛！到咗上堂個日，冇咩人，都只係得7個同我差唔多年紀既中學生，個課程就係我細妹負責教。真係估唔到，佢連呢方面都涉獵埋，做埋導師。我一面聽佢講解，一面觀察佢，聽佢都教得有板有眼。我心入面暗嘆：都係既，佢已經唔係當年我見到18歲既細妹啦！佢而家已經係33歲既成年人。但我對佢既印象仲停留係好多年前！唔知佢而家結咗婚未呢？但我覺得未，因為佢仲住係到。咁有男朋友未呢？佢係個點既人呢？對佢好嗎？我好想同呀妹講而家仲唔結婚，過多幾年，就更難嫁得出啦！雖然，佢個樣一啲都唔顯老！
唉！我又搖搖頭，我又係到諗咩呀！呢啲嘢即使我仲在生我都理唔到，更何況我而家對於佢嚟講咩人都唔係。到咗睇完示範之後，自己做既時候，我集中精神做，見到佢一面巡，一面睇下啲人做成點，幫佢地，又同佢地傾下計咁！係既，做青年中心既社工就係要同屋村既青少年打好關係。見佢地都有講有笑，睇嚟佢同呢班細路既關係都唔錯。之後佢行咗嚟我到撩我傾計，佢問我：「你叫咩名呀？第一次見你嚟參加活動！」
我微笑住答佢：「我叫林詩賢！」我貌似鎮定，但內心早已激動不已！
「詩賢！我認得你！（認得我？我個腦快速運轉，佢點有可能認得我呀！唔通兄妹之間真係會有心靈感應？呀！唔係呀！，3年前我地係林村許願樹到見過，個時我偷咗佢個寶碟。）你成日嚟呢到自修室，真係好勤力。（咁咋！嚇得我！睇嚟佢都唔認得我）你而家中幾呀？」
「嗯！我9月升中四！」如果係其他社工係咁套我料，我晨早反佢白眼，唔理佢啦！不過見在係你我先會表現得咁好架咋！之係我地都係一齊閒話家常，傾下傾下呢個課程咁就完咗啦！到走既時候，我又行咗去接待處到，報咗另外一個都係呀妹負責既課程！係呢啲相處既過程之中，我並無更了解佢既生活，佢對自己既家庭同私事隻字不提，反而係佢越嚟越了解我！又係既，佢做咩要俾我呢啲小毛孩知道自己咁多嘢呢！我以前就已經聽佢講過，佢話以後出嚟做嘢，要生活同工作分明，唔將生活帶入工作，亦唔會將工作帶入生活。咁我就好奇啦！對於依家既佢嚟講，同我呢個中學生相處，係咪就只係單純既工作呢。諗到呢到，我不免感到有啲失落。
終於到九月，我升到高中，我就好似前世咁簡咗理科，有個底係到，我相信我以後會做得更好。唔係！係最好至岩。但我父母始終唔明白我既能力，怕我岩岩升上高中會跟唔上，於是幫我請咗個私人補習老師，話係朋友介紹既，隔個星期六嚟我屋企補兩個鐘。媽咪仲話個個老師正職係一個社工。我心諗：唔係咁巧合呀麻！點知到咗第一日補習，真係咁巧合，個個補習老師真係我呀妹！我地互相認出對方既時候，我地各自都嚇咗一跳！我問佢：「咩原來你有秘撈架！（但我更想問佢係咪好等錢使，點解有時間都唔休息或者出去玩，要撈多份兼職。）」
但佢義正嚴詞咁同我講：「係合法兼職！ok！」
我笑笑應道：「ok ok！」
媽咪知道我地係識既，就更加開心啦！亦因為佢係社工既關係，我媽咪覺得佢好信得過，好放心將我交俾佢。俾我地兩個單獨留係屋企到進行補習。而媽咪呢段時間就出去買菜，飲茶，做自己嘢咁！
我地相處既機會因為咁而又多咗，但我對佢既了解並無因為咁而增加，佢依然唔向我提起佢任何私人事。我亦都冇走去問佢，因為咁樣好奇怪，我呢啲咁既細路，點可以走去八大人既事，有啲唔係幾禮貌。但其實我又唔可以話我完全冇更了解佢，我唯一知道既係呀妹到依家都仲記住我。
我點知道？就由佢教我既手法上面，佢會用我以前既一啲教法去教返而家既我！啫係抄我！我見到佢咁做都笑咗笑，諗返起我地以前相處既日子。雖然我個人好醒，根本唔使補習，但為咗令呀妹繼續有工開，我都有時「扮」下有啲嘢唔識，要佢教！有一次，我唔小心係寫英文既時候，錯咗gramme。好似咁 "he make people to line up.” 呀妹見到我錯咗之後同我講：「詩賢，呢到make 之後唔使用to 架！好似個首歌咁！you make me cry, make me smile, make me feel the love is true. 你唔會講成you make me to cry, you make me to smile 架麻！」
「明白！」我點點頭。心入面百感交雜，同樣既說話我都曾經同佢講過！
仲有一次，我「扮」我唔識一條計概率既數學題，就走去問佢。係要計擲某數目骰仔既概率，呀妹睇完個問題，用筆係紙上面畫咗骰仔個樣，一面同我講：「拿！4個面就有4點（佢用筆點咗4點）5個面就有5點（佢用筆點咗5點）。⋯⋯但，我做到呢步就已經錯咗啦！你知唔知錯咗係邊？」
我疑惑咁望住佢，先岩岩開始解題，我真係唔知錯咗係邊。
佢認真咁話：「骰仔5個面係角落4點，中間有一點！（而佢係係紙上亂咁點）。」
我聽到真係笑咗出嚟，呢個根本就同條題目無關係。但我以前就曾經咁樣整蠱過我呀妹，一臉認真咁係教佢既時候講埋啲無聊嘢！佢聽到之後反曬白眼，但又好好笑！
由呢啲事上面，我就知道呀妹係到用佢既方式去記住我。我都好想同佢講，我一直都有記住佢，但我知道我唔可以。
之後我地一直keep 住補習好多次，有一日我見到佢望住我屋企廳個部鋼琴，問我：「你識彈鋼琴？」
「嗯！你想唔想聽？可以點歌。」我自動請纓想為佢彈首歌。
「唔使啦！繼續做啦！」但呀妹佢禮貌性咁婉拒我。反而係我因為咁而有啲失望。
我一面係佢面前做功課，一面諗返我同細妹相遇以嚟所發生既事，咁巧合我搬返去隔離村，咁巧合佢就係我去個間青年中心到做社工，又咁巧合佢就係我媽咪新請既補習老師，呢啲巧合真係巧合咁簡單。我心入面突然衍生出一個恐怖既想法，就係佢根本就唔唔係呀妹，係小鏡。係小鏡為咗試我而扮成呀妹，想考驗我會唔會信守承諾。
但就係呢個時候，我聽到客廳既角落位置傳嚟另一把聲：「我想聽BigBang 既 ”if you”，我轉頭望過去，另一個「呀妹」企咗係客廳角落，係小鏡。」
好在，呢一切真係單純既巧合，單純一連串既巧合。呀妹就係呀妹，小鏡就係小鏡。但當時既我並唔知道，呢一連串既巧合會係不久既將來引領我跌落絕望既深淵！
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/