投胎之後害死全家人: 10.生日禮物
「我想聽BigBang 既 ”if you”」
久違既小鏡偏偏就係呢個時候出現咗係我面前，不過就係因為咁我先可以肯定，呀妹真係呀妹。
普通人係見唔到死神既，我知道小鏡可以聽到我心入面諗咩！於是我心入面同佢講：「等我呀妹走咗再彈俾你聽好冇？」
「好！」
就係咁小鏡係到等到我補完習，呀妹走先再聽我彈琴俾佢。呀妹走咗之後，我即刻坐係鋼琴面前，開始彈琴。我上網搵呢首歌既琴譜既時候，都有睇過呢首歌既歌詞，好似好sad既愛情故事。我一面彈呢首咁sad 既歌，一面係到諗點解小鏡想聽呢首歌，係咪背後有啲咩故事呢？以我所見小鏡既表現，死神應該係有自我性格，有思想既，咁應該都係會有感情啦掛？咁係咪小鏡背後都有啲咩傷心既故事呢？但係，死神每日處理咁多單投胎，見咁多嘢，經歷咁多嘢，如果佢地都有感情咪可能成日都覺得好難受囉！
「專心彈琴啦！」小鏡係我身邊同我講。
我又唔記得咗小鏡係聽到我心入面諗咩既，於是我努力將思想集中係首歌到，啲音符到，專心咁彈。
彈完之後，我小心翼翼咁問小鏡：「彈成點呀？」
佢平淡咁講咗句：「唔錯！」但我見到佢聽完之後愁眉難展咁，究竟係我彈得唔好定係佢本身有啲咩煩心事，我都唔敢去問。
之後小鏡對我寒暄幾句就走左啦！
再之後係一次補習入面，補到差唔多完既時候，呀妹竟然問我：「詩賢，可唔可以借你個鋼琴彈下呀？我想錄首歌俾我朋友聽。」
對於佢突如其來既要求，我先係呆左一兩秒，然後就立即答應佢。佢得到我既允許之後笑笑，行去打開鋼琴到坐底。一面同我講：「唔該曬你！我屋企都有電子琴，但錄起嚟冇咁好聽！」
我好疑惑，呀妹佢都唔識彈琴既，唔通佢係呢段時間有自學過。
我問：「咩原來你識彈琴架？」
呀妹笑答：「唔算識！我只識彈一首歌。」
我冇問係邊首，因為我諗我知道係邊首歌。呀妹準備好手機錄音，放左係鋼琴旁邊，就彈起上嚟。
我真係估得冇錯，佢話佢識彈個首歌真係”Canon in D”。我坐係佢背後一面聽，一面諗。佢所講既朋友係邊個，佢要錄俾邊個聽，係咪要錄俾我聽？我突然諗到過多兩日我就生日啦！亦都係我既「死忌」，我死左既第15年。咁我可以好肯定佢係想錄俾「我」聽。望住佢彈琴既背影，生澀既彈琴手法，憂傷既琴音以錯落既節奏演奏出黎。呀妹冇睇譜咁彈，佢根本就唔識睇譜，我知道佢一定上網睇片，一個音一個音咁去記個位置。我一面聽，個心一面跳得好快，感覺自己雙眼好熱，有野想湧出嚟。不過我逼自己忍住，直到佢彈完之後，佢另轉頭尷尬咁問我：「彈成點呀？」
「好好，好好聽！」我露出欣慰既笑容，吞一吞口水先答佢，因為我怕岩岩想喊既梗塞感會令我講野走音。但其實我更想以呀哥既身份，拍一拍佢膊頭，同佢講：「ok 啦！有好大既進步空間！」好想當面表達我對佢琴音既「嫌棄」。
「我可唔可以錄多幾次？我想簡個最好既版本。」佢唔好意思咁問我。
「當然可以。」
佢再次彈起上嚟，我已經唔敢望住佢努力既背影，我另轉頭，用手托住個頭，瞇埋眼嚟聽。因為我知道，咁樣眼淚就流唔到出嚟！前世既我，從來都冇諗過呀妹會有一日彈琴俾我聽，我估唔到我會係咁既情況下聽到佢彈琴。心入面又欣慰，又內疚。而家諗返起，當年我地都冇好好講再見我就走左！當時對佢既打擊一定好大，但當時既我就只諗到投胎去邊到，同埋點樣經營自己既下世。都係因為小鏡經常提醒我唔好俾前世既人同事牽絆住自己。但係，我同細妹今世以呢一種方式相遇，出現係彼此既生命入面，都未嘗唔係一件好事，證明我地有緣份，我以後可以同佢以朋友既形式相處。如果佢需要幫忙既時候，我就可以助佢一臂之力。
到呀妹終於錄好一個滿意既版本，佢同我講：「唔該曬你呀詩賢！搵日請你食飯。」
我知道正常呢個時候我應該禮貌咁講：「唔使！」何況呢個只係舉手之勞。
但我就同佢講：「嗯！等你請我食飯。」我希望我地之後可以變得更friend，有更多既交流。
再之後，因為父母安排咗細佬係同樣既時間係屋企學鋼琴，又怕噪到我地補習，所以想呀妹改晏啲。但呀妹就面有難色咁講：「唔好意思！我之後都有幫其他人補習，改唔到時間。」
媽咪拜託佢：「小小時間都冇？唔該你啦！」
「sorry ！我都想幫你，但係詩賢之後我仲有3個小朋友輪住補，中間真係冇其他時間。」
我同媽咪聽到之後都o 咗，加埋我咪一日補4個，佢好等錢使咩？咁勤力，究竟佢係咪遇到啲咩困難？父母有大病？定佢自己想儲錢讀書？
係呢個時候，我為免失去同呀妹繼續相處既機會，我即刻提出其他解決方法。
「不如我同姐姐出去補啦！改去佢屋企補？咁咪唔使改時間囉！」
之後我地就等呀妹既回應，見佢猶疑咗一陣就應承咗。「都可以，呢段時間我父母都唔係屋企。」
咁就好啦！我都想知屋企而家情況點！計返，我「父母」而家都應該六十幾歲，應該都退休啦！唔通因為咁，屋企開支太大，所以呀妹要出嚟身兼幾職！我又係到諗，如果我係到，係咪就可以幫佢分擔一啲，佢就唔使一個人承受咁多呢！可惜，呢個世界冇如果。
到咗第一日上佢屋企補習既日子，佢驚我唔識路，落咗樓下間M記接我。搭緊笠既時候，我問佢：「姐姐，你父母去咗邊呀？點解呢個時候唔係屋既？」
「我老豆去搵朋友飲茶，我媽咪去行山。」
「哦！」（睇嚟真係都退曬休啦！）
上到「屋企」，前世既種種回憶一湧而上，因為呢到真係一啲都冇變，都係一樣既間隔，一樣既傢俬。我係房門口偷偷望入房，都見到房入面既陳設都係一樣，甚至我張床都係，我床上面雖然放咗啲雜物，但我床頭櫃個啲龍珠、logo公仔仲完整咁放咗係到。
就連規矩都一樣，而家正值夏天，我就咁行過嚟就出曬汗，但呀妹呢到都冇開到冷氣，只係開咗風扇。由以前開始，「我地屋企」就有不明文規定6點後先可以開冷氣。佢同我講：「我都知有啲熱，唔好意思。但我地屋企朝早唔開冷氣。」
「唔緊要！我一啲都唔熱！」我一面抺汗，一面答。
大概呀妹都俾我呢個狼狽既樣逗笑，笑住咁問我：「飲唔飲可樂？會舒服啲！」
「唔使啦！我唔飲甜野。」
之後呀妹就拎咗一罐出嚟自己飲。佢仲係同以前一樣咁中意飲可樂，雪櫃入面有好多存貨。佢又係櫃入面拎咗樽藥出嚟，用可樂餸左一粒藥。
我問佢：「咩藥嚟架？」
「維他命。」
「維他命都唔好用可樂餸，對身體唔好！」我苦口婆心咁講。
佢笑答：「我知道啦！」
補習中途，佢去咗次洗手間，我即刻去拎樽藥嚟睇下係咩藥。藥樽上面寫住"immobilising agent"，我就知道係止痛藥，呀妹經期一嚟都會食止痛藥，我都唔覺好出奇，但佢用可樂餸止痛藥就未免太唔錫身啦！
趁呀妹仲未出嚟，我又偷偷走入房睇，一入去我就望到我前世用既個部手機放咗係台面，我拎咗起嚟睇，用返我之前用既個個解鎖圖案開，竟然開到，入面既頁面咩都冇變。我見到手機左上角有寫服務供應商，啫係代表佢地到而家都仲有幫我交電話費。正當我疑惑之際，我聽到沖水聲，我就即刻衝返出去。我呢日見到咁多嘢，知道佢地仲記住我，咁深深咁記住我，我唔知道我應該開心定點。始終，我地要過各自既生活。而見到呢啲嘢之後，我心入面感覺有啲負擔。
-------------------------------------------
小鏡依然有不停時觀察詩賢既一舉一動。
小鏡：「人類真係愚蠢既生物。」
～「唔愚蠢就唔會俾你利用到啦！」
小鏡淺笑。
～「而你又點解要咁努力去令自己做返愚蠢既人類呢！」
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/