投胎之後害死全家人: 8.父母教我明辨「是非」
經過呢次呢件事之後，個4條友仔都唔敢再蝦我。無計啦！打又唔夠我打，醒又唔夠我醒，仲敢係我面前得得戚戚咩！其他同學見到咁，都走嚟問佢地，又走嚟問我，我地係校長室發生咗咩事，佢地幾個梗係話咩事都冇發生啦！顧左右而言他，咁又係既，咁瘀既事，佢地自己點敢提！至於啲同學問我，我都冇講到，不過唔使我講，啲同學睇到咁既情況，都估到咩事啦！佢地一定係受咗教訓而家先咁收歛！而我就唔會同啲細路計較，得饒人處且饒人。令到幾個小毛孩係之後既中學生涯入面抬唔起頭都唔係啲咩光彩既事！我只希望佢地經過呢件事會反省下自己做錯咗啲咩，好好改過啦！
而係中三呢年既暑假，我父母竟然準備帶住我地搬屋搬去沙田區，因為我爸爸轉咗工係沙田，我同細佬本身都係沙田區既學校到讀書，所以為咗方便大家，佢地決定賣咗層樓，用筆錢係沙田買間細細地既樓住。
沙田！佢地都住係沙田，咁咪啫係代表我地會有機會再見？我搖搖頭，想將我呢種唔成熟既想法搖走。我又係到亂諗嘢啦！小鏡講得岩，我已經唔係蔡家偉，我係林詩賢，我地要各自過返自己既生活，冇咗彼此存在既生活！
父母同我講，係新屋到我同細佬會一人一間房，我聽到之係好開心，我可以有啲私人空間。睇書呀、練琴呀都可以自己一個係房靜靜地做。你知我實際年齡同我生理年齡差咁遠，有時我想做啲超乎我年齡所做既嘢，都好怕俾父母發現之後唔知點解釋。例如，我前世個時有自學意大利文同俄文，都學得唔錯，但我又唔想同父母講想學然後佢地帶我去學，又重頭嚟過，曬我咁多時間，於是我會係屋企偷偷用電腦睇同埋學。咁而家有房，我就唔使成日偷偷摸摸啦！又例如，我中意睇一啲西方電影，有啲係血腥，有啲又暴力，好似個套「300壯士：斯巴達的逆襲」我前世個時睇咗幾十次，仲買埋碟收藏。我前世既媽咪執嘢睇到我張碟既封面，都問我做咩睇埋啲咁血腥既嘢！我都唔知點講，反正就係覺得好正！
到咗搬屋個日，我到咗確實既地點，知道咗確實既地址後，我就發現我搬咗去前世住個條村既隔離個條村。我既新屋企係「日明村」，而細妹佢地就住係「月明村」。一村之隔，我地相遇既機會比以前又大咗！媽咪帶咗我去附近既商場行，個商場就係兩條村之間。個商場變咗好多，好多舖頭已經摺咗，開咗好多新店，以前簡陋既街市而家裝修成有冷氣，有廣播既市集。 望住呢到既變化，我驚覺自己離開咗呢個地方已經15年，一個充滿我前世生活點滴既地方，已經變到我唔認得咁樣。都好既，咁我就係呢個「新地方」製造新既回憶啦！唔好再令自己沉輪係以前既日子啦！
另外，我知道呢到附近有個青年中心，有開放自修室，亦唔係我前世去開個個，因為個個就係前世屋企既樓下，為免撞到佢地，我都唔打算去個到啦！諗住遲啲去附近另一個青年中心登記做會員，以係就可以多個地方做嘢！即使我地就生活係隔離村，但係我岩岩搬黎呢2個月，我出街買嘢，返學校補課，我都冇撞過佢地。我都叫自己唔好咁在意，因為就算撞到佢地，我都係只可以扮唔識咁走過！我更應該專心專注係我今生既人同事，因為佢地已經夠我煩！
係我今生既第15年，我同媽咪展開咗最長既一次冷戰，因為佢屈我。但其實佢屈我都唔係重點，重點係佢知道自己屈咗我之後，佢冇向我認錯，打算就咁不了了之。大佬呀！我因為你自己一個人既誤會，而俾你鬧呀！我係無辜架！唔通知道鬧錯人之後唔使道歉。而事緣係咁既，有一日媽咪發現咗自己係日本買返嚟既一套杯具唔見咗，佢好中意既！佢就問我有冇見過，知唔知係邊。我話冇，而呢個時候，我個個冇記醒既老豆又要加把嘴，話好似見過我拎嚟用。我就真係冇拎過嚟用，但呀媽就起勢捉住呢個點，問我套杯去咗邊？問係咪我跌爛咗唔講？我堅持話冇，佢問問下開始鬧我啦！話我成日用完啲嘢唔放返好，所以先會整唔見！我語氣有啲唔耐煩咁話冇，佢又問我咁樣咩態度！直到細佬係房入面聽到我地既吵鬧，出嚟了解原委之後，對媽咪講左句：「你之前唔係話反正放係到都唔係成日用，就送咗俾表姊既咩！」
佢聽完之後呆咗！之後轉而笑笑口咁講：「係喎！唔記得咗添！」之後就坐返低睇電視。咁點呀？扮冇事就得架啦！錯咗唔使道歉架？屈人唔使道歉架？我嬲嬲地咁入返房，但都聽到我父母係出面既對話。
爸爸：「都話你架啦！岩岩先仲咁惡！」
媽咪：「都怪你！邊個叫你話見到個女用過呀？」
過咗一陣，老豆㪣我房門入咗嚟，同我講：「乖女！對唔住呀！老豆記錯咗，累到你俾媽咪鬧！」
我仲係嬲嬲地咁講：「你（你呢個仆街老豆）係應該道歉！但媽咪（你個仆街老婆）更應該道歉！」
「你知道佢份人係咁架啦！算啦！當俾個面老豆，我俾多500 蚊零用你！」
「唔使！你而家話為咗就佢「呢份人」，我就要係呢間屋入面冇尊嚴咁生活，咁我就明啦！我知道要點做！」我說話不留一點餘地！
「都唔係咁既意思！你做咩咁講呀！」
「你就係咁既意思！尊嚴可以用500蚊買架！我俾500蚊你叫佢道歉好冇？」
「唔好咁啦！」
「你出去啦！我想瞓！」我趕咗老豆出去，心諗一啲道理都冇，仲敢勸我！
之後個幾日，我同媽咪之間都僅限於必要既交流，我要事先聲明，我冇對佢態度差，我只係將我地之間交流降到最低，對答簡而精，因為我真係唔知我應該點同佢「呢啲人」溝通。幾日後既晚飯時間，媽咪問我：「聽日使唔使補課？」我平淡咁答咗句：「唔使！」因為呢句，佢終於爆發，雖然我完全唔知佢爆發個點係咩！因為錯個個係佢，但俾佢攪到好似我錯咁！
「你咁既態度算點呀？⋯⋯都未出嚟養我就咁對我，以後仲得了既！⋯⋯（攪笑啦！咩態度呢？我又冇鬧你！又冇睥你！）唔同我嘢好同我走，唔好係到住！（WOW！我又俾人要脅啦！冇錯！我係應該為咗口飯就屈服既！尊嚴可以當飯食咩！）」
聽到佢既吵鬧，我冇作任何既反駁，好快咁食完飯，入返房！而呢次令我有小小動搖，諗緊自己係咪應該屈服，畢竟寄人籬下係事實！而係呢啲情況既呢啲時候，我細妹應該已經屈服咗！岩岩我媽咪講出個番話既時候，我差啲以為全世界既媽咪都有一份鬧女講稿，佢講個番話同我前世媽咪鬧呀妹既對白一模一樣。而家既我總算明白佢個時（個幾十次）有幾咁難受！可能我因為我前世本身就同媽咪交流少，冇啲咁既情況出現！而經過深思熟慮之後，我決定都係拖多陣先，唔好屈服住，我係父母既仔女，唔係佢地既奴隸！唔係附屬佢地，我既尊嚴都唔係要靠佢地先可以有。
又過咗兩個星期，似乎媽咪知道用硬既唔得，佢有晚入咗嚟我間房，想同我「講道理」。
佢問我：「知唔知自己錯咗係邊？」（唉！仆街了！佢又要同我講埋啲歪理啦！）
「唔知！」
「你覺得你咁樣既態度對媽咪岩唔岩？你係咪應該同媽咪道歉？」（仆街了！仆街了！⋯⋯我覺得我真係就嚟爆血管啦！點解佢錯仲可以話成我錯！父母唔係應該教仔女明辨是非既咩！佢教緊我啲咩！明歪理？NO！係佢眼中「其言如聖言，其言如真理！」）
我冇答佢，反而問返佢幾個問題：「不如你答返我幾個問題先啦！你屈我有冇做錯？你屈我係咪應該向我道歉？你屈我，我係咪連唔開心既權利都冇？我咩態度？我冇鬧過你！就當我真係係態度上唔好，你未為你自己既錯事向我道歉，就先要我向你道歉？」
「咁係因為你老豆亂講我先誤會啫！」（佢仲係到賴！錯咗就係錯咗！係咪咁就唔使道歉？」
我仲堅持理性咁同佢講：「嗯！冇錯呀！呢個係你屈我既原因，我可以去體諒你既原因，但唔係你可以唔道歉既原因。如果係咁你同之前個4 個屈我既姨姨冇咩分別？」
媽咪聽到呢到，又開始冒出火氣，大聲咁同我講：「你點可以咁同我講嘢？我係你呀媽！我同佢地點同！」
我掩住一邊耳仔，同佢講：「我講過講道理唔係鬥大聲比賽，溝通唔係咁架！」
佢顯得有啲難堪，但我冇理到再講，但放軟咗態度：「媽咪！如果你願意為咗你屈我而道歉，我都會為咗你所講既「態度」道歉！相信你會以身作則。」
之後佢都係死死地氣向我道歉，但顯現地佢有啲唔憤氣，仲唔知自己錯係邊。但又冇我乎！就係咁，我同佢之間就取得表面暫時既平靜！
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/