投胎之後害死全家人: 7.如果真相真係咁重要
「道歉！」
另外個三個細路亦衝上嚟！
既然佢地唔肯道歉，咁就唔好怪我啦！我就好似以前對付個幾個街童咁，先一個膝頭狠狠咁頂落我面前俾我捉住手既細路個肚到。佢即刻痛到伏咗係地下，郁都郁唔到。因為以前俾老豆頂過幾次，每次都痛到我。唉！都係唔好提啦！
然後，我一腳踼落衝緊過嚟既其中一個細路個肚到，佢就彈咗落地下，仲有一個佢一拳打埋嚟，我一手擋住，再一拳打埋去佢個鼻到，佢即刻摸住個鼻，跌坐咗落地下，而我諗佢都流硬鼻血架啦！就好似我以前俾老豆打咁，個鼻俾佢打到麻痺，然後就會流鼻血。正當我唔為意既時候，淨底最後一個細路竟然一手大力咁捉住我條辮，向後拉，痛到我呢，差啲叫救命，心諗：又扯我條辮，你條仆街，我要殺咗你。真係唔係講笑，我好似拍緊電影咁，一手捉住自己條辮，一個旋轉面向佢，然後用另一隻手捉住佢隻手，將佢個手掌向反關節既方向扭，痛到佢即刻鬆手，成個過程非常之快，我趁同佢之間拉開一段距離，我又諗住踼佢個肚。點知佢反應好快咁捉住我隻腳。
咦！我心諗呢條友仔又反應幾快喎！
可惜！我即刻借佢手既力，一個旋風腿用另一隻腳踼佢個頭，踼到佢成個人飛咗落地下。
我道氣仲未下，行過去佢到蹲低，扯住佢啲頭髮，一字一句狠狠咁同佢講：「我同你講，女仔留長髮唔係俾你扯架！知唔知道？道歉！」
「對⋯⋯對⋯⋯對唔住！」佢驚驚青青咁向我道歉。
之後我企返起身再講：「我同你地講！我已經一而再，再而三咁忍你地（我用手指指住佢地），但你地就一而再，再而三咁挑戰我既底線，所以唔好怪我，係你地自己攞嚟架！」
呢刻我望住俾我打到坐曬係地下既4條友仔，突然清醒過嚟，心諗：今次仆街了！攪成咁，如果佢地講出去，我點收科呀？希望唔好有瘀傷啦！唉！唔理啦！佢地都係自作自受。而且係佢地挑釁我在先，佢地有面講出去咩！更可況俾個女仔一打四打到咁，咁冇面既嘢佢地都敢講出去，我都真係無話可說！講出嚟都未必有人信！
於是我鎮定咁拎住自己套體育衫，瀟灑咁離開咗課室！
我落到去之後過多10分鐘，佢地先落嚟，佢地扮曬咩事都冇發生咁！但對我既眼神就閃閃縮縮！
唉！呢啲人都係要俾啲教訓佢地先知乖既！
直到第二日，上上下堂個陣時，個四個同學仔同我俾人叫咗落去校長室到，我行緊落去個時就已經估到件事已經爆咗出嚟！我一路行，一路諗對策，究竟我應該認咗佢，定死口唔認呢？然後我就聽到其中一個人趾高氣揚咁講：「今次你仲唔死！」
原來係班細路故意洩漏件事出去既！聽到之後，我即刻改變我既主意，本來仲想大事化小，既然係咁，我要令佢地以後係學校都冇立足之地！反正當時冇其他人睇到，咁我陣間就死口唔認就得啦！
當我地5個去到校長室，我就見到各自5位既媽媽都到齊曬，仲有我地既班主任，坐咗係到！而我地就入到去一字排開企係大家面前，我企最左手邊，佢地四個企我右手邊！
校長開始發言先：「你地四個係咪都話林詩賢同學打你地？」
佢地四個都點頭。
「林詩賢同學，你點解要打佢地呀？」校長問。
「我冇咁做過！」
「但佢地都一致話你打佢地喎！你點解釋？」
「我冇做過！點解要解釋？有證據咩？」
呢個時候，個4個媽媽已經坐不住！開始對校長噪起上嚟！
媽媽A：「校長，你使物同佢講咁多！佢打到我個仔瘀曬仲唔係證據！」
媽媽B：「係囉！係囉！如果今日唔俾個交代我，我係唔會走架！」
媽媽C：「退學啦！收埋啲打人既學生咁危險既！」
佢地你一言，我一語咁！噪到呢！我呀媽見到咁都不甘示弱，佢當然相信我唔會打人啦！於是佢又去駁返佢地：「你地唔好亂講呀！我個女唔係啲咁既人，佢好乖架！⋯⋯」
佢地之間爭論不休。而我就叫停咗我媽咪！
「媽咪！媽咪！唔使再講啦！」啲人聽到我咁講都以為我要自首，但我繼續講：「唔講我仲以為而家係鬥大聲比賽，（我沉穩咁望住個4個師奶）唔係事實既野，係唔會因為你大聲講同不停講而成為事實！同樣地事實亦唔會因為你講唔夠人大聲就變成唔係事實！（我望返向我媽咪）就算係，你話你一把口，點夠人地4把口講呢！」
我媽咪就好醒目咁停咗冇再講嘢！而個4個師奶都仲要啲面，靜咗落嚟！
「校長！咁你嚟處理啦！如果處埋得唔好，我一定會去教育局到投訴！」其中一個師奶同校長講。
WOW～由字裏行間，我都聽得出佢係到要脅緊校長，佢仲要係家教會主席，係家長之間既影響力都幾大，分分鐘激起群情洶湧。我見到校長面有難色，然後同我講：「林詩賢同學！其實而家四位同學都指認係你打佢地！你仲唔認！一啲悔意都冇，再係咁我就真係可能要你休學或者退學架啦！那！如果你而家肯誠心咁向俾你打既4位同學道歉，我就可以記你一個小過就算！」
呢個時候，我見到個4個師奶嘴角上揚，亦見到我媽咪焦急既表情！睇嚟，我要出大招啦！
「校長！既然學校唔能夠為我主持公道，咁唯有報警啦！（我知道校長一定唔想攪大件事）我冇做過，就由警去證明啦！」
「同學！你知唔知落假口供係犯法架！我地校方會配合調查真相，如果到時證實你係講大話，就唔係退學咁簡單啦！」（想大我，睇下邊個大邊個）
我冷笑「如果真相真係咁重要，你地而家就唔會淨係聽佢地既說話，就斷定我有打佢地啦！不過！我身正不怕影子斜，睇下最後個結果係真係我打佢地，定係佢地自己係出面打交然後屈我！（我大返佢轉頭）而且調查下，問下啲同學就會知道呢幾個人一路以嚟都係到欺凌我，成日扯我頭髮，丟我書包。咦！欺凌都好似係罪行嚟架喎！唔知使唔使入男童院呢？（個4 個同學同佢地媽咪開始面有難色）報警，一定會引起傳媒既訪問同報道，到時佢地問起我俾同學欺凌，老師有冇發現同提供協助，我都唔知點答好，唔通照實講老師見到我俾同學蝦都視若無睹咩！（我扮曬苦惱咁）」
對於我一口氣講咗咁多嘢！佢地所有人都唔係好俾到反應，應該會好驚嚇我呢個中三既細路講嘢咁大膽，咁似大人，句句都篤中佢地既死穴。不過我都唔理得咁多，要我對呢幾條友仔道歉，咁冇尊嚴既事我真係做唔出。
「媽咪，手機！」我示意媽咪報警。
「咪住！」校長緊張咁叫停。
而幾位師奶亦開始轉肽！
「校長呀！可能真係我個仔自己整親，無謂攪大件事！」
「係呀！衰仔講大話我都唔知，不過佢仲咁細，你就原諒佢啦！」
校長：「詩賢同學！件事攪清楚啦而家，唔使報警啦！咁佢地欺凌你既事我都會搵老師跟進架啦！（轉頭望向我媽咪）林太！件事就咁處理，你話好冇呀？」
媽咪佢又望返我。
我就話：「而家我俾佢地屈，佢地至少要向我道歉啦，校長你話呢！」我媽咪都點點頭！
4個同學向我道完歉之後，我再忍住笑對個4個師奶禮貌咁講：「雖然姨姨你地都有份屈我，但我媽咪由細就教我要尊重老人家，所以我都唔會嬲你地既，亦唔使你地道歉！」佢地聽到似乎有啲嬲，但又唔敢向我發火。
離開校長室之前，為免攪到得罪校長咁，我行去校長面前笑得好燦爛咁同佢講：「校長，多謝曬你呀！幫我主持公道！」見到佢聽到之後羞愧個表情，我就知道，佢都知道自己受唔起我既多謝。
到我終於離開咗校長室，我呀媽即刻攬住我，我抬頭見佢流住眼淚，問我：「女呀！做咩係學校俾人蝦都唔同我講？」
見到媽咪咁緊張我，攪到我都眼濕濕，但我將個頭另埋一面，講：「我又唔係媽寶，我可以自己攪掂！」
我一面感動，一面諗佢地聽到我句「媽寶」會有幾情何以堪，又不自覺嘴角失守啦！
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/