投胎之後害死全家人: 6.我竟然畸形到咁既地步！
【前世今生】【 6 】- 我竟然畸形到咁既地步！
「你仲同我講你想過好你既今生，你實在令我太失望！」
其實唔止小鏡對我失望，我自己都對自己好失望。的確係我違背我地之間既承諾，咁樣既我又點樣去追求新既人生呢？但個時，我真係抑壓唔住自己，我都只不過係一個普通人，對自己既過去有所牽掛都好合情理啫，更何況個個人係同我一齊生活咗十幾年既細妹。 小鏡一如以往好似睇穿我心入面既想法咁回應我。
「牽掛，的確係人之常情，但你應該知道，依家既你已經冇資格咁做！依家既你係林書賢，並唔係蔡嘉偉。而且，依家既你同佢相認之後又如何？你俾到啲咩佢？你咁做只會擾亂你地各自既生活。只會令你地各自都痛苦！你係個聰明人，你應該知道你之後要點做，唔好再挑戰我既底線！」
返到屋企之後，我反省返今日我做過既事同小鏡對我講既嘢。我知道我自己唔可以再望返轉頭，應該好好經營今生，我要過好自己既人生先再諗其他嘢！ 已經升中既我，係自由度上面都已經提升咗好多，於是我空餘時間都用嚟睇下書增值自己。另外，我前世個時已經好鍾意做運動，成日去跑步同做gym，甚至去咗學自由搏擊，個時既我就已經覺得身體既鍛練係非常重要，普通人要，好似我呢啲冇人冇物，咩都要靠自己既人更加要，我要令自己更強先可以一個人去克服唔同既困難。而家既我都唔例外，依然覺得鍛練身體非常重要，會早啲起身去跑完步先返學，隔日放咗學去康文署既gym room 到做重力訓練個啲。有啲人見到我咁細個女仔過嚟做運動，都會眼望望，覺得我係玩玩下，三分鐘熱度。不過我既堅持證明咗俾佢地睇我唔係玩玩下。而家甚至有啲人走嚟誇奬我，話我年紀輕輕就咁有毅力。仲有啲人見我係到用一啲高強度既訓練設備既時候，企係旁邊睇住我，怕我受傷。另外，我本身飲食就好健康，於是係一年內我就練到個身形好firm，好大隻就唔敢講，但手臂同大腿一用力，啲線條就出曬嚟！
但其實都好慶幸我父母冇阻止我成日去做運動，你知而家好多父母都覺得除咗讀書之外，其他所有活動都係曬時間架啦！但佢地冇咁覺得，我爸爸仲好支持我恆常運動，可能因為佢係物理治療師既關係啦！佢都好明白運動既重要性，仲會教我做唔同既練肌動作。
日覆日，我升上咗中二，終於嚟咗第一次大姨媽，係我重生而嚟第一次咁強烈地感覺到自己真係一個女仔。要嚟既總要嚟，我見到之後有啲感嘆，但亦好冷靜咁去媽咪間房到攞M巾用。我係廁所到研究個M巾要點用。打開一睇，見到佢啲黏貼位，我諗都不外乎都係包住貼起佢。平時我見到呀妹嚟既時候痛到就嚟死咁制，面青青，手腳又會變到好冰，但之後個幾次我嚟M既時候都冇痛到。係個肚會脹脹地，覺得有啲唔舒服咁。我諗係因為我成日做運動，體質比較好既原因掛！但呢幾日都要帶住個條片，又濕又怕漏，勁唔舒服，攪到我心情都有啲差。到我嚟M嚟咗半年之後，有一次我去媽咪間房到拎M巾，媽見到我拎就問我：「你拎嚟做咩呀？」
佢問我個刻我先驚覺，我竟然冇同媽咪講過我已經嚟咗第一次M。而家我既實質年齡係36歲，呢啲咁既小事我一個人都可以處理好，完全冇諗到呢啲嘢要同媽咪講。但咁樣一啲都唔似一個普通細路女既反應。
但我都係鎮定咁答媽咪：「因為我嚟M！」」
「你嚟咗第一次啦？唔同我講！」
「唔記得咗！」
「你識用M巾咩？」
「我聽啲同學講過點用！」
「哦！你真係呀！咁大件事都唔同我講！嚟咗幾多次啦？會唔會覺得唔舒服呀？」
「兩次啫！唔會呀！」為免媽咪覺得唔開心，我將半年講成只嚟咗兩個月。呢件事就咁就俾我輕易咁蒙騙過去。
初中既日子入面，我都係專注咁睇書，做運動，增值自己，同周圍既同學都冇物交流。三十幾歲既我同十幾歲既同學，個代溝真係大到我難以想像。佢地成日講埋啲嘢又係冇內容，冇營養，同佢地傾計真係好悶，唔係幾想曬時間應酬佢地。因此，我由幼稚園到而家都同我班同學冇咩交集，食飯小息都係一個人。自己一個人都冇咩問題，仲自在，我可以善用自己所有既時間。只係，啲中學生唔知係咪悶得制，玩到冇嘢好玩，見我成日一個人，唔合群，冇靠山咁，有四個男仔就成日整蠱我，不外乎丟我啲書落地，係我張枱到寫字呢啲嘢！係我眼中只能用「幼稚」兩個字去形容佢地，呢啲咁既小毛孩只係識透過欺負弱小去表現自己。而其他同學因為唔想都成為另一個被欺負既人亦唔會對我伸出援手，我都明白，呢啲都係軟弱既表現，唔想惹麻煩上身。 呢幾個小毛孩想同哥哥玩，我就唔信我連幾個細路都攪唔掂。對於呢啲欺凌者，就係唔可以對佢地既行為俾太大既反應，佢地就係中意見到被欺凌者難受，或者嬲。於是一開始我對佢地既行為都係默默忍受，睇下佢地會唔會玩到冇癮就自己收手。但佢地冇，仲越玩越過癮，似乎誓要玩到我向佢地投降為止。佢地啲行為亦越嚟越挑戰我既底線。
又有一次，其中一個當住我面將我個筆袋丟咗落地，我去執起咗佢，然後望住沾沾自喜既佢露出不屑既笑容。佢見到行到我面前講：「你笑咩呀？」「笑你幼稚！」我輕挑咁講！佢聽到之後面上冇咗笑容，大概估唔到我會反抗佢，又覺得我咁樣令佢係其他同學面前好冇面，於是佢舉起右手，想巴我個頭。但我反應好快咁擋住咗，佢既面色因而變得更難睇。咁岩老師已經到咗課室門口，我冇理到佢坐返位，點知個四個細路係返埋位個時，趁我唔為意，輪流拍咗我個頭一下。老師都見到咗，但佢冇出聲，我唔知點解，可能以為我地玩下，亦可能覺得教書重要，唔想曬時間去處理呢啲嘢！我當下勁嬲，但我忍住咗。心諗你幾條仆街，真係欠教訓，但係老師係到，我而家郁手，分分鐘惹上事端，俾人鬧！呢個唔係一個好既時機！
個堂我都冇聽到書，一路係到諗岩岩先既事，亦回憶起以前既事。以前既我唔知道叫做軟弱，定係叫做識審時度勢，我係一個係某啲情況下好識忍既人，我可以俾我「老豆」用粗口鬧十分鐘，不停侮辱，即使唔係我錯都唔出聲，因為我知道如果我駁嘴，佢只會更嬲，鬧得更耐，我只會更痛苦。所以係個幾細路整蠱我既時候，我同我自己要忍，以前更甚既我都忍過咗，而家我都可以。但而家我突然覺得自己咁既想法有啲可怕，我竟然畸形到咁既地步，將我「老豆」對我無理既壓逼視為訓練 ，甚至有種對自己忍耐力既自豪。我一面諗，一面係到笑，我諗我一定係癲咗定啦！我已經重生啦！仲要忍落去！
我又記得，以前我「父母」成日係屋企鬧交，於是我成日去樓下個個自修到溫書。本身屋企日日不得清靜，我已經好煩，有日我離開自修室，準備返屋企既時候，同門口既一個街童有眼神接觸，佢隨後就兇我：「望咩望呀！想打呀！」我心情唔好，於是個時我惡狠狠咁望住佢，而佢見到咁就衝咗過嚟打我，佢地一行四個人，個時既我已經高中，仲要比而家身為女仔既我大隻好多好多，我一個膝頭頂咗落衝過嚟既人既肚到，佢即刻就痛到仆咗係到郁唔到！佢個幾個朋友見狀即刻衝過嚟幫拖。可惜！好似佢地呢啲又冇樣，又冇實力既細路，瘦到呢，廢到呢到，我三兩下打到佢地流曬鼻血。臨走之前我仲踩住俾我打到伏係到個個人塊面，講：「攞嚟賤！」個時既我唯一可以反抗既地方就係我生活圈以外，佢地要嚟招惹我，我唯有奉陪！
終於到下一堂體育堂，大家都走曬去換體育服，我既思緒亦由回憶中返返嚟！我慢慢咁執嘢，其他人都已經走曬，得返我同個四條友仔。我都估到佢地又係到等我！其中一個過咗嚟扯我條辮，我心諗係你郁手先架！我同媽咪講咗好多次，我想剪短頭髪，佢就係唔俾，因為呢件事我心情都麻麻，你仲敢攪我條辮！我用手捉住佢個隻手虎口位，然後屈佢隻手，佢痛到即刻縮手。
「呀！呀！呀！」
「道歉！」
佢並冇，而且另外個三個細路亦衝上嚟！
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/