投胎之後害死全家人: 5.如果，下世再做一家人，佢就太可憐啦！
彈琴係最可以令我平靜落嚟既一件事。
一日，媽咪帶咗細佬一齊落街買菜，我一個人留係屋企練琴。彈彈下突然感覺到有人係我後面，我直覺係小鏡係後面。於是我冇理到繼續彈，直到我彈完首歌。
「好好聽！睇嚟你係到生活得好開心咁，仲練得一手好琴！」
果然係小鏡，佢一面講，一面係我旁邊坐底。
我亦對住佢笑咗笑，問：「好耐冇見你大駕光臨！要唔要點歌？」
「可惜！我想聽既歌你唔識彈，我最近好中意聽BigBang 既”If you”呢首歌！你得閒就練下啦！如果我下次再嚟探你既時候聽到就好啦！」小鏡甜笑對住我講。
我點點頭，應咗聲：「好！」死神大人提出既小小要求，我又點會say no.
為咗知道自己可以有幾多時間準備，我又問：「小鏡，咁我地下次幾時再見？」
「隨緣啦！」語畢，小鏡又消失咗係空氣之中。
詩賢見狀，嘆咗口氣，又徑自彈起"Canon in D”呢首歌。其實係岩岩點歌既時候，小鏡都見到詩賢聽到佢既答案後失望既表情，心入面亦清楚詩賢所期望既答案。
而小鏡並冇走遠，係遠處聽住詩賢彈既"Canon in D”，搖搖頭講：「可惜！可惜！呢首歌我係你呀妹個到已經聽到好悶！」隨後細語：「前世今生互相牽掛既兩個人，真係唔想你地相遇！好似會製造啲麻煩俾我！」
時間又過咗3年，我已經12歲，準備升中，我自己並唔係太擔心，以我既成績，想入到我個區既名校卓卓有餘。但唔知媽咪係邊到聽到大埔林村既許願樹好靈，話要帶我去個到許願求升得好中學。雖然我同媽咪講叫佢唔好咁迷信，但佢都話要帶我去，求個安心，咁我就唯有跟埋去啦！
我地平日去，人都唔算好多，我地先入去廟入面上柱香兼添啲香油錢先。就係我地排隊既時候，我竟然，竟然，竟然見到我前世既呀媽同呀妹係我前面不遠處排緊隊，我見到佢地都手執3枝香準備上香，前面啲人一路上完香離開，條隊越縮越短，我越行越前，而我同佢地之間既距離係冇縮短到既。但我既心就越跳越快，越跳越快，越跳越快，由見到佢地個刻，我既視線都冇離開過佢地。直到佢地上完香往回走，呀媽同呀妹同我擦身而過，我先終於見曬佢地既正面。我數數，不經不覺我已經死左12年，呀妹已經30歲，想當年18歲既佢成個初中生咁，而家30歲既佢看似成熟左好多，但個樣仲係二十頭咁樣，同以前一樣冇咩點變。如果唔係，我都唔會一眼就認出佢。唔知而家佢地過成點呢？我真係有衝動衝上去問佢地呢十幾年過得好唔好！但我知道我唔可以咁做！我眼見佢地越走越遠，媽咪又拉住我繼續向前行去上香。
到我地上完香，行出廟之後，我又即刻東張西望尋找呀妹既蹤跡，最後係一檔買寶碟既小店見到佢地係到買寶碟，我拉住媽咪去買左一個。買完之我搵咗個係佢地附近既位置寫願望係寶碟上面。其實都只係我媽咪係到寫，我依然望實我細妹佢地，我亦見到係「媽咪」係寶碟上面寫字。我同細妹由細到大都係無神論者，唔信呢啲嘢既！相信佢都只不過係俾「媽咪」叫嚟既啫！我媽咪係寶碟上面寫咗「升上XX中學」，之後就叫我親手掛上去許願架上面，我望住個許願架，先記起好似早係幾年前就已經以保護樹木為由，唔再俾人掟寶碟上樹，而係設置咗許願架！我一面掛上自己既寶碟，一面留意住我「媽咪」將個寶碟掛咗係邊。
掛完咗之後，我呀媽話要洗手間，我就留咗係原地等佢。隨住呀媽、「媽咪」同埋細妹走遠，我慢慢走近「媽咪」掛既寶碟個到。我翻開佢嚟睇，上面寫住：下世再做一家人。我睇到之後有啲震驚，有啲無奈，有啲憤怒，又有啲傷心。我將個寶碟拎咗落嚟坐埋咗一邊，我知道自己此時既表情表現得有啲厭煩。
下世再做一家人？
佢地有冇問過我想唔想？佢地到而家都唔知道我一畢業就返大陸做嘢既原因，就係因為想逃離呢個畸形既屋企。佢地竟然係我死咗之後都唔肯放過我，仲想同我糾纏到下世。雖然我知道佢地咁樣做根本影響唔到我既下世，我都已經投咗胎。但而家俾我知道佢地有咁既想法都令我有啲嬲，有啲難受！我一面諗，一面不知覺間捉緊手上既寶碟，揸到個寶碟皺曬！
「妹妹！」
此時，我聽到呀妹把聲係我面前響起。我抬頭望，佢就企咗係我面前，我因而露出驚訝既表情。
佢做咩返轉頭？係發現咗我既身份？冇可能！我再望望我手上拎住既寶碟，完全唔知道應該點同呀妹解釋，覺得非常緊張。
但呀妹並冇表現到好嬲，佢冷靜平淡咁講：「妹妹，你做咩拎咗我個寶碟？」
「我...」我呆咗咁望住佢，完全唔知點答佢。
「你都想許願？」但佢反而幫我諗咗個理由。我順勢羞愧咁點點頭。
佢隨後伸咗隻手出嚟，示意我俾返個寶碟佢，我雙手奉上，並向佢道歉。
「對唔住！對唔住！」
「算啦！下次唔好啦！......好在你今次遇到既係我，我唔會為難你，如果你今日拎走既係其他人既寶碟，佢地就未必咁順攤放你走。」
「嗯嗯！真係好對唔住！」我都明白，亦知我細妹係天生就好好脾氣，好難得罪到佢。
之後，佢望望手上既寶碟，將佢撕開兩半，再丟咗係旁邊既垃圾筒到。我有啲疑惑，行上前問佢：「你做咩丟咗佢？」
佢只係嘆咗口氣，講：「如果，下世再做一家人，咁佢就太可憐啦！」講完佢就走咗！佢大概覺得我一個細路女點會明白佢話中既含意，但我知道我唔係一個普通細路女咁簡單，作為同佢一齊係畸形家庭成長既呀哥，我又好似有啲明白佢點解會咁講！
我一面望住呀妹遠走既背影，一面係到諗，佢地呢十幾年究竟過成點？即使屋企有幾咁不堪都好，佢都好顧家，好珍惜我地。係咪我死咗之後發咗啲咩事，會令佢對「一家人」咁抗拒，睇到佢岩岩丟咗寶碟個時落莫既神情，真係一啲都唔似佢。
見到佢行出咗門口，我心入面真係好掙扎，此時我心入面只有一個問題，就係：呢段日子你究竟過成點？我真係好想知，好想知！我終於按耐不住追咗上去，我跑到門口左望右望，見到佢係人群既遠處行緊，我一面避開啲人，一面跑過去，隨住我地既距離越嚟越近，佢又轉咗彎，又消失咗係我眼前，我加速追上去，去到一個人少啲既位置，我忍唔住叫佢個名，想佢停底。
「蔡天琳！」
佢聽到之後果然停咗係到，佢另轉頭望住我。我跑到佢面前，露出一個緊張又尷尬既笑容，佢起初望住我既表情係愕然既，但隨即就向我露出一個狡猾既笑容，對住我講：「詩賢！你知唔知你咁樣會為我製造好大既麻煩架！」
「小鏡！」原來係小鏡，並唔係呀妹。
小鏡無奈咁搖搖頭，講：「好在我一路睇住你，引開咗你啫！如果唔係你諗住做啲咩？你唔記得咗你對我既承諾啦！」
「我...」差啲違承諾既我無言而對。
「你仲同我講你想過好你既今生，你實在令我太失望啦！」
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/