傷痕累累（一場Kong U殘殺遊戲）: 34. 橋上狂人
「冇聽過。」事實上，我是知道Knowles大橋的傳聞，只是不願配合。
「冇聽過？你係咪讀Kong U架？」哈比晶瑩的雙眼映出失望。
他的每一個動作，都裝得如此可愛。
「好多年前，有個女學生用身體做利誘，求個Professor俾好Grade佢，不過……個女仔冇如願以償，付出左貞潔，但係得唔到想要嘅成績。」哈比說道：「結果，絕望嘅佢
就喺呢條橋上面跳落去！哈，點知，個頭喺窗邊卡死左……扯斷條頸，得個身跌落去。」
我聽到這裡，渾身一震。
「有一點幾有趣……事後警方只係搵到個女仔嘅屍身，搵唔到個頭。」哈比抬頭思考：「唔知個頭會喺邊度呢？」
「你捉我上嚟，單純係想講下鬼故？」我不屑。
「唔好咁心急，之後有好多『活動』等你。」哈比雙手合十，瞇眼歪頭，綻放可愛的笑容：「呢個地點好適合，夠隱蔽，氣氛又好，我非常鍾意。」
「你究竟有咩目的？明明你嘅任務……」哈比的所作所為根本不合情理。
「我嘅任務？係喔，我嘅任務係咩呢？」哈比自問自答：「呀！我記得啦！」
哈比抽出任務牌，內容寫著「割掉隨機一人的一隻耳朵。」
他拿到面前，撕開一半，然後，疊在一起，再撕開一半，分成四分，再疊置、撕開、疊置、撕開……
任務牌很快就變成紙碎，哈比吹向手掌心，紙碎立刻跑到我臉上，我只好閉眼忍受。
緊接著，哈比掏出真正的任務牌。
同時，眼神一轉，變得凌厲、可怕。
燒死三個人。
「嘻嘻，係咪估唔到呢？」哈比問。
「你……」我一時無語。
到底何時，哈比偷龍轉鳳，拿了一張假任務牌……
「一開始見到自己嘅任務牌，知道太過恐怖，好難搵到同伴，再呃人上當。所以阿熙打死人之後，我就乘機偷偷攞走個死人嘅任務牌，一睇，哈，個天都幫我。」
的確，知道哈比的假任務後，內心放下不少警惕。
從而造就往後的悲劇……
我亦想起，當時黃麗松講堂外人流洶湧，根本看不見所有人的動作。
難怪沒人發現。
「呢個時候，玩個小遊戲？」哈比笑得更燦爛。
他蹲到我旁邊，開啟手電筒，然後指著大橋左上角。
「吳懿，你睇下。」哈比期待著。
人類總是犯賤，明明有不祥的預感，偏偏卻要下意識依隨。
「嘩！！！！黐線！！」我大吃一驚，渾身一抖，失去平衡，連帶椅子倒在地上。
我看到一個女人頭。
人頭掛著牆上，雙眼瞪大，頭髮散亂。
最可怕是她直盯著我，彷彿還是活的。
「搬緊你嘅時候，有個女人阻住我，所以我殺左佢，割個頭出嚟，嚇下你。嘻嘻。」哈比輕描淡寫。
他的殘暴，遠遠比任何人恐怖。
哈比弄直椅子，讓我與人頭面碰面。
「變態，根本變態。」明明坐在椅子上，我卻不斷喘氣。
「玩下其他小遊戲。」哈比亮出撬棍，再次微笑。
難道……
「啊！！」擊中面龐。
「啊！！！！」另一邊臉。
我幾乎吐出大牙。
「嘻嘻！Knowles橋嘅地板係紅色，係因為當時個女仔嘅血灑滿地板，啲工人清都清唔到，就用紅色油漆遮住！」哈比一棍打向我的胸膛：「呢度簡直係玩遊戲嘅好地方！
哈哈哈哈！！！！」
「呀……」我感覺整個心臟都要吐出來。
哈比一邊大笑，一邊虐打，偏偏不直接打死我。
「好耐冇玩！好耐冇玩！好耐冇玩！哈哈哈哈！！！！！！」哈比瘋狂大笑。
而我，只有低吟和叫囂。
「你究竟……係咩人……點解要咁……」一字一句，都是用盡全身力量。
枉所有人都視哈比為夥伴……
原來，他是個人面獸心的瘋子。
「你想知點解我有呢個任務？」哈比問我：「好，我話你知。」
哈比暫緩攻擊，轉為環繞我的椅子，一邊兜圈，一邊說話。
「我天生就有種興趣。」哈比快活地說：「就係……虐待小動物。」
「從細，我都好鍾意見到啲狗仔、貓仔，痛苦等死個樣……」他撬棍一揮，背脊劃出一條血痕。
「呀！」我痛得大叫起來。
「呢種聲，我好鍾意，聽左之後好興奮，好似完全釋放自己一樣。」哈比再來一擊，勾破我的大腿血肉。
「你！呀……虐待狂……」我單眼閉著，忍受痛楚。
「我十歲都冇，就開始搵啲流浪貓狗，打佢哋、踢佢哋、割佢哋、切啲皮膚出嚟……」哈比用力踢向傷口，血液濺到地上。
「啊！！！！咳咳！！」我幾乎虛脫。
這一天來，我不知吐血多少次。
「呀……呢種感覺好正，好似高潮咁，好舒服。」哈比居然伸出舌頭，舔向我的脖子。
「唔……」哈比無比享受。
我面容扭曲，雙眼緊閉，根本無法忍受嘔心的感覺……
「之後，我發現火燒原來係最爽，過程慢，而且嗰種痛苦可以令任何生物崩潰。」哈比喃喃自語：「十二歲嗰年，我燒死左三隻狗，嗰日係我人生最快樂嘅一日。聽住佢哋
嘅吠聲，望住佢哋嘅可憐樣，真係最完美嘅享受。」
我已經不能說話，只能怒目而視。
哈比的本性居然是如此扭曲……
「好景不常，阿爸阿媽發現左我嘅樂趣，帶我去睇心理醫生。」哈比繼續說話：「佢哋居然壓抑住我呢種癖好，令我幾年冇得玩，我好痛苦，痛苦到想死。」
哈比看向自己的雙手。
他的眼神逐漸迷離，就如面臨絕望的人。
驀然，他又瘋狂大笑，重新注入活力……
「直到呢個遊戲出現，令我重新解放！哈哈！重可以虐待人！虐待人呀！呢種最有感覺嘅生物。」哈比緩緩轉頭，看向我：「嘻嘻，吠下啦。」
我知道不妙。
果然，哈比舉高撬棍，打中我的腦袋。
「呀呀！！」椅子再次翻側，倒在紅色地板上。
「而嗰場大火，我真係籌劃左好耐，明明就係個必死嘅局面。」哈比走到面前，扶直椅子，就是不讓我躺下休息。
「係邊個……救左你哋？」哈比蹲到面前，奇怪地問我。
「係你太睇少我哋。」我說。
哈比沒有說話，沉默地看著我，彷彿想讀取我的記憶。
「係修潔。」哈比說中答案：「我有冇估錯？」
他是如何猜到的……
「你同Janet兩條廢柴，根本冇可能自救。唉，早知再小心啲。」哈比概嘆。
接著，哈比站起，繼續居高臨下。
「原本個據點根本唔適合放火，地方太大，出口太多。我唯有貼啲警告，引『合作殺人隊』上嚟。」哈比說：「再懶係唔覺意咁，提議訪客中心呢個新地點，地方細得嚟又
得兩個出口。」
那些位於百週年校園的警告，根本是為了吸引「合作殺人隊」的注意，才不是有人好心提醒。
「我一早搵到汽油，用背囊孭住，帶去訪客中心附近擺低，見翻你哋之後，再搵個藉口出去。」哈比說出完整計劃：「我打暈阿熙，然後就分別去前後門灌油，點火，諗住
燒死你哋！」
種種提示，種種線索，終於串聯起來。
真相大白……
說不上精心佈局，只是利用了我們的信任。
寶貴的信任……
「過程之中當然有少少阻滯，例如『合作殺人隊』差啲就追到我，好彩有個Professor咁啱喺前面，我直接推佢落地，分散注意力。」哈比忽然抽出我給他的電擊器：「重
有，我原本打算放過你，引你出去，等阿熙同Janet佢哋去死。點知你唔領情，咁我唯有成全啦。」
哈比開啟電擊器，再次展現璀璨的笑容。
「吳懿你真係個好人，俾個電擊器我玩，嘻嘻。」
我盯著逐漸靠近的電擊器，內心失控跳動。
然而，我無法逃離命運。
只能後悔莫及……
「嗞……嗞嗞！！！」電流直湧全身，我卻無法掙扎。
「嘻嘻嘻，我都未玩過電！」哈比開懷大笑。
一陣白光呈現眼前，我只能默默熬苦忍痛。
畢竟，是我信錯他人。
電擊和火燒不同，電流會令神經暫時癱瘓，肌肉僵直，所以無法大叫。
「做咩唔叫！吓！！」哈比憤怒，電流刺激身體每一個部位，就連頭髮都豎直起來。
終於，哈比放棄電擊，拿走電擊器。
「都唔好玩嘅。」哈比當我如玩具。
我感受不到自己的軀體，只能隱約聽見聲音。
「既然一次燒唔死你，就唯有再接再厲啦。」哈比走到窗邊，撿起汽油桶。
然後，灑到我臉上。
「咳咳！」那些氣味絕不好受。
「我已經周圍貼左溫馨提示，話你喺度，好快你嘅同伴就會上嚟。」哈比一邊說，一邊將汽油倒在地上。
難怪哈比不直接殺死我，原來是要好好享受肆虐，而且想直接燒死三人，達成任務。
「既然你係個好人，咁我諗你一定好受歡迎，嘻嘻，幾個一齊變燒豬。」哈比興奮起來：「重要係一個咁神聖嘅地方，真係唔錯。」
剛才的虐打，彷彿在鬼門關外繞了一圈。
再來一次的話，我應該會直接斃命。
「到最後，吳懿，你有咩想講？」哈比問我。
「我睇錯你。」我只想到這句。
「冇啲建設。」哈比觀看窗外，好像發現了什麼：「咦？即講即到，兩個人，啱啱好。」
看來，我要連累他們了，內心牽起內疚的感覺。
「有你個女朋友添，哈哈。」哈比幸災樂禍。
「你由頭到尾，都演緊戲？」我問。
「唔？係呀，你以為我咁蠢？咁天真？」奸詐的笑容回到孩子氣的模樣：「呢個只係我嘅表面，用嚟隱藏，用嚟呃人。有頭到尾，天真嘅都只係你哋。」
「由一開始，你就存心要害死大家。」我不忿。
我曾可笑到以為，哈比是眾人之中最單純天真的一個。
「吳懿。」哈比從褲袋中拿出膠紙：「最高明嘅虛偽，唔係扮好人、扮有禮貌，而係扮蠢扮傻仔，等所有人都對你放下戒心。」
接著，哈比封住我的嘴巴，不讓我求救。
「差唔多上路啦。」哈比倒光剩下的汽油，進入黑暗，離開大橋。
當然，他是要隱藏起來，守株待兔。
紅色的地板滿是汽油。
想來，火焰的顏色也與地板頗為相襯。
還真諷刺。
「…」大橋寂靜無聲，我不敢望向人頭那邊。
與此同時，我也害怕著往後的發展。
若雨，你千萬不要來……
然而，現實從來都不會顧及人的感受。
Janet和尚義的聲音逐漸靠近，不消半分鐘就會到達Knowles大橋。
「呢度？」尚義問。
「係，要快，我唔想阿難有咩事。」Janet說。
他們從紐魯詩樓那邊過來，而通往圖書館的方向早已被哈比封住了。
那就是說，進入大橋後根本無路可逃。
哈比的任務非常困難，一人之力本來難以達成，他的機智和細膩卻不容小覷。
終於，尚義和Janet轉入大橋，跑到眼前。
「阿難！」Janet立刻叫道。
「唔……唔！唔！」膠紙貼著嘴巴，我不能警告危險。
待二人撕開膠紙，橋端的哈比已經用打火機點燃汽油。
「拜拜。」哈比揮手，然後退後，再次消失在黑暗裡。
「係汽油？」尚義驚訝。
汽油迅速擴散，火光再次映進瞳孔裡。
又是三人，又是無法逃離的困境。