人渣誠自傳（完整版）: 二十九
我望望佢手上份卷，六十六分，真係咁啱低我一分。
天意如此。
「呵呵，找數。」
林優怡冇理我，拔腿就跑。
「頂你丫，又想走數!?」
「我唔係好明你講緊咩。」你條男朋友又扮野。
「食屎啦你啦!」我一招排雲掌打在林優怡頭上。
其實，我都預左佢會走數架喇，會找數既，就唔係林優怡啦。
「Bye~」
就咁睇，佢個笑容又幾靚喎...
同振威食飯既時候，林優怡既笑容係我腦海中揮之不去。我都唔知點解..
「振威啊，你覺得...我係咪鍾意左林優怡啊?」
振威放下手上既飯盒，說，
「以我識你咁多年，我覺得你就係既...」
「...」
「你諗下，你唔開心想揾人吹水，第一個諗起既人係邊個丫?」
「你囉。」
「Hi，女呢?」
「咁啊，林優怡囉。」
「咪臭係囉。」
朋友黎架姐。
「你諗下自己係邊個身邊，你會有個句講個句，同佢一齊唔會扮勁哂野，覺得相處上黎好舒服既，你就自然有答案架喇...」有女之後，振威講野變得好man。
係邊個?
唔洗講到咁白喇掛...
想了一會兒，我得出了答案...又或者，我心入面早有答案，只係唔敢承認姐。
好啦，我也就認了，
「我係鍾意佢。」
我鍾意左林優怡。
「林優怡，我有野同你講。」我說。
「咁啱既，我都係喎...」
「咁你講先啦。」我真係好禮讓。
林優怡停頓了一會兒，紅都面埋，
「其實呢...」
其實....?
「我鍾意你。」
媽啊!!林優怡同我表白啊!!
「我都係啊!我都鍾意你啊!」
原來我地係兩情相悅架，有情人終成眷屬喇，我同林優怡可以係埋一齊喇。
我地會行街，睇戲，食飯。夜晚既時候，一齊返屋企，跟住...
「跟住點啊?」振威期待住三級既情節。
「跟住，我就訓醒左喇。」
「Hi!」
係，我發夢咋，我邊敢同林優怡表白丫。
雖然我知道自己既心意，但係，我都係唔敢同佢表白。
「媾佢啦。」
「你都on勁既，邊敢丫。」依刻，我覺得我仲懦弱過振威。
「點解唔敢啊?」
點解?
唔敢囉，有得解架咩，驚衰囉。
我係邊個啊，我係人渣誠啊。林優怡係一個好女仔黎，你覺得佢會睇得上我咩?
就算退一萬步講，佢真係睇得上我啊，我都襯佢唔起啦。
「鬼叫我係李志誠咩...」
「咁你唔諗住追佢啊?」振威一再追問。
「想既...」
我點會冇諗過追佢丫，不過只停留係想 既階段囉。
但如果因為要追佢，而令到我失去同佢依家既關係，我寧願唔追。
係我生命中，已經有唔少人因為男女關係而離開我，唔想連林優怡都冇埋。
倒不如維持依家既關係啦...
「咁你就同佢表白啦!」
「遲啲先啦...」總有一日，我會同佢講既。
應該......
但依家，就繼續做住朋友先啦。
暗戀，既浪漫，而又痛苦。
「點啊，有冇溫書?」鍾意林優怡之後，我成日都會用唔同既籍口揾佢。
其中一樣，就係學術問題。
當然啦，邊有咁多學術野傾丫，傾傾下就會傾左第二樣。其中一樣會傾既，係傾波...
「Rose bb真係好型啊!」林優怡係羅斯死忠。
「低端，識睇一定係睇咖哩哥。」
「一定係Rose勁啲。」
「On勁!」
可能因為自己都鍾意打波，我覺得一個同你講波經既女仔，真係好正。
林優怡真係冇得頂，做女朋友實一流。
一個咁好既女仔，你覺得我會唔想擁有佢咩?
每次見到佢，我都好想同佢講我有幾鍾意佢，幾想同佢一齊。有幾次，我差啲講左出口......
其中一次，就係我地吹緊水既時候，
「好想有真愛啊!」我對真愛既渴望，係你地冇辦法想像。
「其實點解你咁想要女呢?」林優怡問。
「想揾個人陪掛。」
其實，我係想你陪。
「其實呢，有樣野我想問你好耐。」我道。
「咩呢?」
「其實你係咪she she黎?」
林優怡既好，又點會得我一個發現到丫。傳聞佢唔聲唔聲，都有唔少人鍾意佢，但佢好似全部都冇興趣。
係，佢A0。
去到中六，一個咁多男仔既女，一係就變公廁，一係就做左娘娘。唯獨佢最特別，居然冇拍過拖，做一個毒到出汁既絲打。
不禁令同行友人都懷疑佢既性取向。
「Stop la啦!我鍾意男架!」佢唔講，我真係唔知。
「真心一問，點解你地咁多人覺得我係les?」佢問。
「咁多人追你，你都唔so人。」
「咁都要睇對象既，個啲真係冇feel，not my type。」
「咁你鍾意咩type呢?」
「依type。」佢send左張相過黎。
一睇，咦，Mads Mikkelsen!?
Hi啊?
你話要米八，我可以打多啲波，拉下筋，話唔定仲有希望。
你話鍾意鬼仔，我可以用我帶有美國腔調既英文，同埋黝黑既皮膚黎扮下nigga。
你話要六塊腹肌，我每日慢跑一粒鐘，瘋狂做sit up，絕對冇問題。
但係Mads Mikkelsen喎，中年阿伯黎架喇，我點樣一秒變老啊??
「不過我知冇可能有咁完美既人架喇...」
係咩，你諗通左喇?
「咁即係點呢?」
「我諗我都係揾個好愛我，好錫我既人就夠架喇。」
好愛你，好錫你既人...?
我可以啊，讓我來!
係個一刻，我真係好想同佢表明心意，話佢知我可以做佢所講既人。但係，我冇。
你係女仔啊，你都唔會信我啦。人渣誠同你講佢會好好愛你，好好錫你，揾鬼信咩...同佢講完，佢都只會當我係MK用黎呃女仔既說話。
冇用架。
如果我唔係李志誠既話，如果我唔係人渣誠既話，話唔定佢就會信我，比次機會我。
那麼多如果 可能如果我 可惜...
「希望你揾到啦。」我說。
我從來未試過咁想投胎，我唔想做李志誠啊Hi。
原來海仔所講既洗唔到底，係咁既意思...
可惜沒如果 沒有你和我