人渣誠自傳（完整版）: 二十七

溫到大概五點幾，接近晚飯時間，我準備離開自修室。 

「喂，你走未啊?」我問身邊既林優怡。 

「未啊，作埋先啦。你搞掂喇?」佢仲未作好。 

「係啊，我走得架喇。」 

「咁你走先啦，bye。」 



「好啦，學校見。」 

跟住我就自己走左，行行下先醒起... 

Hi Hi，我餐飯呢!? 

「算，下次再揾佢找數。」 

事至現今，佢都未找數，正男朋友。 



返到屋企，眼訓到喊，溫成日書仲攰過打幾個鐘波。唔得，訓返陣先... 

恰一恰，已經九點幾十點，唔係老媽子嘈醒我都唔識起身。 

「仔，起身食野喇，阿媽買左野比你食啊。」 

「咦，你出左街咩?」 

「咩啊，今日家長晚會要去你學校啊，你唔記得喇?」 



講真，唔記得。 

「係喎，今日阿媽識左個家長，係你地班架。」 

「邊個呢?」 

「佢個女姓林架喎...」 

吓...林?

姓林既女仔，哈，實係條男朋友。因為我個班既女仔，得佢一個係依個姓。 

「你識唔識啊?」老媽子問。 

「何止識啊...」 



「聽講個女仔好勤力架，溫書溫到飯都唔食啊。」 

唔向左走向右走係掛，佢溫書溫到唔食飯，咁都仲係咁肥?? 

我唔信。 

好心你就學下人啦...平時既話，老媽子一定咁同我講。但今次，佢冇。 

「不過我知你依排都好努力，老師都有讚你。」老媽子欣慰地說。 

溫書，睇黎係我做過最孝順既事。 


「喂，你知唔知我阿媽識你阿媽啊?」我問林優怡。 



「吓，有咁既事?」 

「係啊，佢話家長晚會個晚傾左陣。」 

「唔係掛。」 

「係啊，聽講你仲溫書溫到唔食飯。」 

「哈，乜料啊，我諗住減肥咋。」 

Hi，我都估到佢冇咁勤力架喇。 

「喂係喎，我餐飯呢?」差啲唔記得。 



「Bye。」 

「信唔信我同你阿媽講啊?」 

「Stop la啦，唔好扮熟啊。」

「我老媽子話係你阿媽r佢friend子先，都唔知係唔係你為左接近我，所以先叫你媽媽接近我老媽子。」 

「Stop la啦，鬼得閒接近你咩!」 

佢發癲個陣，塊面真係好肥，好on勁。 

「落堂喇，走先，唔好掛住我。」傾傾下，咁就落堂喇。 

「Stop la，冇人會咁做。」 



「記得還返餐飯比我。」 

林優怡永遠都只有依啲時候，先會咁安靜，正hihi。 

Lunch既時候，我去左揾振威食飯，佢今日請左假，唔洗陪女。 

「好地地陪兄弟食飯咋喎，洗唔洗請假咁大獲啊?」我問。 

「你唔明架喇，陪少佢一陣佢又嬲豬架喇。」 

有女之後，振威比起以前更加膽小，比條女食住哂。 

正一老婆奴，算咩男子漢!? 

「係呢，又話打波既，琴晚去左邊啊?」振威問。 

「哦，太攰訓左啊。」 

「太攰?做咩黎啊你?」 

「冇啊，去左自修室溫書囉。」 

振威聽到我話去自修室，馬上露出淫賤既笑容， 

「自己去啊?」 

「唔係啊...仲有林優怡既...」見到佢個笑容，我都有少少驚驚地。 

「哈。」佢輕笑一聲，就冇再講野喇。 

咩意思呢?

「你笑乜春呢?」我問振威。 

「冇啊。」 

冇?冇你又笑個樣咁Hi Hi?肯定係有野。 

「講啦。」我好憎人有野又唔講。 

「遲啲你就明。」 

嘩，頂你丫，講野咁玄既... 

「唉，原本仲以為會遇上一段美好既姻緣...Hi，乜都冇。」諗起都灰。 

「你之前又話唔想拍拖住既?」 

係，的確係阿欣之後，我有一段時間都唔想拍拖住。不過上到中六，情侶都一對對，搞到我都好想拍下拖。 

當然唔係以前扑完就散個種，而係好似少女漫畫般浪漫既愛情。 

「正所謂，但見旁人談情何引誘，你地個個都有女喇，我都唔想再單身。」 

「你要媾女有幾難啊?」 

「我唔想要個種啊，我想要以結婚為前提，好柏拉圖式個種啊。」 

「咁你咪去追尋囉!」 

「未有對象又點追呢兄台?」 

振威再次露出個個笑容，好向左走向右走Seven啊! 

「扮哂野，明明就係你面前。」 

吓..? 

我鍾意既人咩?點解連我自己都唔知既? 

「你講緊邊個啊?」