人渣誠自傳（完整版）: 八
「你覺得，我應唔應該同佢當面傾下?」我問張彥琪。
「有咩好傾啊?」
「...」
其實我都唔知，可能覺得大家講清楚會舒服啲。
「就算佢認左，佢塊膜都唔會返黎架啦。」
咁又係。
「你覺得佢對你好唔好丫?」佢問。
「好係好..」
講真，Heidi對我真係幾好。佢會織頸巾比我，就算冇乜零用錢，都會草埋草埋啲錢買禮物比我。加上，佢屋企人好嚴，成日唔比佢出街。但佢會為左見我，呃屋企人去溫書，之後走黎見我一面。
佢對我，真係幾好。
遺憾既係，當初既我冇好好珍惜依個女仔。
就怪我太年輕。
「如果我係你，我就會扮唔知，盡力愛佢。你試下代入佢既角色，可能你就會體諒佢既遭遇。」張彥琪說。
「唯有係咁啦...」
我聽左張彥琪講，扮作冇事發生過，努力去愛Heidi。嗯，我真係努力過。原本我都忍到，直至條Hi Hi...
過左幾日，又要過正常既校園生活。我同Heidi亦好恩愛，至少其他人眼中，我地係好恩愛。
「頂，好哂啊。」振威用手掩住雙眼。
係學校，我同Heidi形影不離。
「點解你咁幸福，我就咁好樣....嗚啊!!!」我隱約見到佢隻手濕左。
唔係精，係淚水。佢喊緊。
「喂，你冇野啊話?」Hi，明明前一秒仲笑緊架，做乜啊?
阿偉禁住我，搖一搖頭。
「我衰左啊...」振威一邊抽泣，一邊講。
原來表白衰左...
「冇事既，仲有我地。」我攬住振威。
佢依偎住我，一直喊，喊到lunch完。我留意到，巧玲望住佢，一秒都冇移開過視線。
「點解你咁爽，我咁慘，公平咩!!!?」
我爽...有苦自己知啦，Hi。
放學既時候，振威情緒又穩定返，做返平時既佢。但我知道，係全班面前派緊膠既佢，內心一定唔好受。
我自己先落小食部，諗住等埋Heidi一齊放學。點知，我見到個Hi Hi，死肥龍。
佢一見到我，用一個好招積，串SevenSeven既樣望住我。我不甘示弱，啤到佢行一行，霸氣盡顯。
佢慢慢走近我，我冇理會到佢。
「聽講你問人我啲野喎，o靚仔。」
我沒有理會佢。
「直接問我咪得囉。」
我沒有理會佢...
「我係搞過你條女啊，吹脹啊?哈哈...」
Hi!忍無可忍!!!!!
「Stop la啦，人渣!!!」冇，我冇打到佢。
但係，我大聲到樓上二樓既老師都聽到。
我真係好後悔當初冇打Seven佢。
不過我諗我點都估唔到，幾個月後，我都變左個人渣。
「發生咩事啊?」我既聲線驚動到老師。
旁邊亦有一班人行過黎，諗住食花生。
「...」我冇出到聲。
見到老師黎，我廢事搞大佢。為左啲咁既人動手，唔值得。
「哦冇，玩下姐。」肥龍同老師講。
佢轉身望住我，行近我耳邊，細聲講:「走先喇，老襟。」
我成世人，第一次想殺人。話你知，肥龍，我遲早打Seven你。
「做咩黎啊頭先!?」Heidi落到黎，見到我比一班人圍住。
「冇..行喇...」我冷冷地說。
「哦，好啊...」
同Heidi行既路程當中，氣氛好僵，我地都冇講過野。直至就快返到佢屋企樓下既時候，佢終於開腔。
「頭先，係唔係阿龍同你講左啲咩黎啊?」Heidi問我。
原本心情都唔係咁好，你仲提個Hi Hi!?
「冇..」
「我知係架，你講啦。」佢捉住我隻手，係度嗲我。
做咩咁想知啊，好怕佢講我知佢搞你?
「冇啊...」我已有少少不耐煩。
「你講啦...」
「Hi!都話冇落!」
我記得我當時都幾大聲，嚇到佢即刻縮開，仲有少少眼濕濕。
「Sorry，你快啲返上去啦。」我道。
「哦...」佢強忍淚水。
個次，係我第一次用粗口話佢。
其實我知道唔關佢事，但我就係發左佢脾氣。雖則話我唔會同佢講返件事，但有時忍得耐，情緒會更易變差。
積得越耐，爆得越甘。
有左第一次，自然就有第二次。久而久之，我地成日嘈交，次次都係我撩起先。就算係再小事，我都會好易就話佢...
恃住雄辯滔滔 隨便的把你喝罵
「Hi，講極你都唔明既!」
「你又發咩神經啊!?」
「你頭先同個男仔傾得咁向左走向右走開心，仲問我做乜?」
「朋友黎咋，都唔知你嬲乜。」Heidi轉身就走。
冇錯，我地又嘈交。
今次係因為佢同坐佢隔離個男仔傾左成堂，有講有笑，我呷醋就話佢。
其實，我都係驚佢唔要我姐。
點知，越係去怕佢發生，佢反而黎得越快...
「做咩啊你?又同Heidi嘈啊?」問我既女仔，叫林優怡。
林優怡係我同班同學，係Heidi既朋友，所以先識到佢。唔知點解，一向唔擅長同女仔溝通既我，同佢幾啱嘴形。
佢份人kai kai地，冇乜架子，所以我幾鍾意佢份人。有心事既時候，都會揾佢吹下水。
「係啊...」
「好心你啦，控制下自己啦，全級都知你地兩個日日嘈喇。」佢托托自己副眼鏡。
「得啦，我有分數啦」
當時既我，就係唔識得收下口，冇好好珍惜Heidi。
到佢走既時候，後悔都冇用...
你唔識珍惜自己女人既話，就會由第二個男人黎替你去珍惜。
「唔好嬲啦，好冇?」返到屋企，打開whatsapp就見到Heidi既message。
其實依家諗返，佢真係好錫我。
明明就係我冇野揾野黎嘈，但每次揾對方道歉既，都唔係我。
係佢。
而遺憾既係，當時既我唔會感激佢對我既包容。反而將其視為理所當然。
「喂，你唔洗揾你女朋友架咩?唔怕佢嬲啊?」林優怡問。
「佢自然就會揾我架啦。」
「你男人老狗，好心你就主動揾人認低威啦。」
「你都痴線既!明明就佢做錯，點解要我道歉啊?」其實我都唔知佢做錯乜。
「咁你男人黎架，緊係要你去say sorry架啦。」
「唔制。」
「廢事理你!」
佢愛我既，掛住我既時候就自然會揾我架啦。
每一次我地嘈完，我都係抱住依種心態。Heidi又真係一次又一次咁同我道歉，認錯。
睇黎佢曾經真係好愛我，好重視我。嗯，曾經...
直至有一日，佢再冇揾過我。我發現自己其實好愛佢，好掛住佢既時候，我揾佢，都已經太遲喇。
係，我地分左手。
又或者應該咁講，我被分手了。
個晚，我呆呆地望住手機上既字
「我諗我地都係分手啦。」
Heidi佢，終於都頂我唔順，決定要離開我。