《名為青春的樂章》（ 逢星期日晚更新）: 第十七話：出乎意料嘅發展（續）
（啟明POV）
阿宇佢好明顯並無估到我咁突然嘅行動，完全唔知捭咩反應好。
過咗幾分鐘之後，阿宇佢先重新開口：「我無...無聽錯嘅話...你話你...鐘意我？」
「係...」
「哦...」阿宇佢沉思咗一陣後先知道自己究竟發生咗咩事，成塊面一瞬間紅咗起身。「你講咩話？！你鐘意我？！」
「如果你冇聽清楚嘅話，我就講多一次。」我清咗清喉嚨：「你可唔可以做...做...」
陽啟明，你頭先已經同佢講咗你鐘意佢啦！講多一次有咩問題！
「做我女朋友！」
「呃...呃...我呀...」阿宇佢推開咗我：「捭啲時間我考慮下。」
佢講完就衝返入間房，閂實咗度門。
「佢冇直接拒絕我，應該冇事嘅...」我依一刻只可以等佢嘅回覆啦...祝我好運啦。
而正係依個時候突然間靜詩佢打咗過嚟，真係啱嘅姐。
「喂？你而家同旻宇佢點樣呀？」係電話另一邊嘅靜詩好膽心我而家同阿宇嘅情況。
「我同佢講咗，但係佢話捭啲時間佢考慮，」我歎咗口氣。「我應該唔會有事嘅...」
「佢既然仲未答返你，咁姐係佢而家一定十分之亂，或者有個人嚟幫佢冷靜落嚟會好啲囉。」靜詩佢停咗一陣：「或者我過一
過嚟啦。」
「咁呀...好啦。」
（旻宇POV）
阿明...阿明佢原來一直都鐘意我？！咁嘅話我應該點答返佢呀...佢係有啲奇怪，但係佢－
忽然係房門出邊傳嚟靜詩把聲：「旻宇，你係度？」
「係...係度...靜詩，係阿明佢叫你嚟？」
靜詩佢停咗停：「其實係我知道咗你而家同佢嘅事，所以先打算過嚟同你傾下...」
「咁佢係唔係度？」
「我已經呀咗阿哥暫時唔好出現，或者去附近個公園度傾下啦。」
「呃...好啦。」
我打開咗度房門，睇嚟阿明佢真係冇出現到。都好嘅，而家咁又見到佢咪只係搞到成個場面十分之尷尬。
我跟住靜詩佢去到咗附近嗰間公園度，途中靜詩佢只係一直睇住自己手入面本簿，入面嘅都係啲感情上面嘅嘢掛...
我地一坐咗係公園入面嘅長櫈 ，佢就同我講：「雖然知道你而家一定好亂，七上八下咁，但係而家最重要嘅係幫你整理返個
思路。」
我點咗點頭：「唔。」
「首先，你一直以嚟都覺得阿哥佢係你嘅咩？」
「阿明佢呀...呃...我同佢由中一開始就識...終之佢一直以嚟對我嚟講個地位十分模糊...」
「十分模糊呀...」靜詩佢停咗停，即刻係本簿度揭嚟揭去，好似係度搵緊啲嘢。「係邊度呀...」
「你...你搵緊咩呀？」
「搵到啦！」靜詩突然間大嗌，嚇到我一個措手不及。
「搵到姐，唔洗咁鬼大聲喎！」
「Sor。」佢道歉完之後，望咗望本簿，又拎返嚟我度：「Ok，我而家有幾條問題問你，真係要如實回答哦。」
我點咗點頭：「好。」
「咁嚟嘅啦喎。」佢停咗停：「如果有一日老師要全班調位，你會唔會暗中祈禱坐係佢隔離？」
「呃...我有冇過呢...」我諗咗一陣。「好似有。」
「O～k。咁第二條，星期六日出去玩嘅時候，會唔會幻想佢係你身邊？」
「我平時去邊都係同佢一齊嘅。」
靜詩佢聽到我依種答案，完全唔知道點接落去：「咁呀...如果有一日無同阿哥佢一齊出去玩，你會唔會呀？」
「呃...如果呀...會掛。」
靜詩佢意味深長咁「唔～」咗聲，就繼續落去：「當佢唔開心嘅時候，會唔會想係佢身邊陪住佢？」
「會。」
「答得咁快嘅...」
「咁我之前同俊昇佢一齊令你地兩個見返對方，你唔記得咗啦？」
「係喎...」佢突然之間企咗起身：「好口渴呀，你喝唔喝嘢呀？」
我從銀包入面拎咗二十蚊出嚟：「我要支蜜桃茶。」
「OK，等我一陣。」佢講完就走咗去買嘢喝。
過咗一陣之後，靜詩就拎住兩支嘢喝返嚟：「咁繼續囉。」
佢唔等我就直接繼續落去：「請問你係咪成日發夢發到佢？」
「有時啦。」我講完就繼續喝住支嘢。
「呃...依條問題呀...」靜詩佢望咗過嚟：「我好心提醒你，小心噎親呀。」
「吓？」
「咳咳。」佢清咗清喉嚨。「你有無試過...將阿哥作為...性幻想對象？」
我一聽到依句，即刻就噴曬啲蜜桃茶出嚟：「吓？！我點會咁諗嘅，你當我係嗰啲饑渴女咩？！」
「嗰條問題真係咁寫嘅。」佢又停咗停：「咁姐係無啦。好，最後一題，如果阿哥有咗你嘅電話號碼嘅話，你會唔會希望佢成
日打嚟？」
「唔會。」
「OK，咁結果就係...」佢望住本簿，又望過嚟我度，又返返落本簿度：「妳係鐘意佢無錯，只係因為驚成日同佢一齊會洩漏
自己嘅感情，不要怕，要勇敢先會擁有屬於自己的真愛...」
「呃...你認真嘅？」
「咁佢真係咁寫嘅，不過睇見你咁樣，睇嚟佢都唔係好準姐。」靜詩合返佢手入面本簿。「但係你咁嘅答案，無論係邊個都好
都睇得出你其實一直都鐘意阿哥佢囉。」
「係...咩？」我只不過一直都只當佢係朋...我真係咁諗嘅咩？
「如果你只係當佢係朋友嘅話，你嗰日仲會得登為咗令阿哥佢開心返而嚟搵返我，捭我可以見返阿哥佢咩？」
朋友當然會咁...當然會...當然...當...唔會咁做，好明顯咁樣一定係鐘意人先會咁做...
「可能我一直都鐘意佢...只係自己唔知道掛。」
靜詩伸咗個懶腰：「咁而家你打算點做呀？」
「直接去搵佢，最後捭佢一個正式嘅回覆。」我講完就直接企咗起身，返去見阿明佢。
「咁樣呀，加油啦，而家已經係成七點，我都返去先。」靜詩講咗聲就向住輕鐵站行返去。
好啦旻宇，你得嘅！
（啟明POV）
已經過咗成個鐘，只不過而家唯有繼續等去。
突然之間從門口傳嚟阿宇把聲：「我返嚟啦。」
我二話不說就衝咗出去，企咗係佢面前：「呃...阿宇，咁你考慮－」
「唔洗再講落去啦。」阿宇佢直接打斷咗我。
「誒？」正當我想問佢究竟係咩事嘅時候，佢居然...自己靠咗過嚟...正正式式咁獻上咗自己嘅初吻...捭我。
十秒？三十秒？定係十分鐘？我都已經無數落去了。過咗唔知幾耐，我地嘅雙唇先因為唔夠氣抖先分離。
「我嘅答覆...咪好明顯囉。」阿宇佢直接對住我。「我願意。」
「阿宇...」我就好似因太幸福所以直接暈低咗，毀咗成個氣氛。
「阿明！你唔係咁樣就直拉暈咗呀嗎！喂...」
《待續》