《名為青春的樂章》（ 逢星期日晚更新）: 第十五話：Code Red
（啟明POV）
我得到咗阿媽嘅同意之後就即刻幫阿宇佢將佢啲行李執入以前阿爸間房，希望阿爸佢唔會因為咁樣而顯靈啦。
用咗半個鐘同佢一齊將啲嘢收抬好之後，我地一齊坐咗係張床度，望住窗外黃昏嘅景色。
「其實我訓係你爸爸間房度，好似唔係好啱。」旻宇說。
我笑咗笑講：「咁我地得番依間房可以捭你用，唔通你同我同房訓咩。」
旻宇好認真咁諗咗一陣，望過嚟我度：「梗係唔係啦，我點會同你一齊訓呀。」
「你咁講真係好hurt人喎...」
「Sor。」
「唉。」我歎咗口氣：「我去煮啲嘢食先。」就走咗去廚房煮個出前一丁。
「幫埋我呀唔該。」
「好～」
我一邊聽住boy pablo嘅《Everytime》，一邊將煮好嘅兩碗出前一丁擺咗係張枱度：「阿宇，啲麵煮好啦。」
「嚟啦！」阿宇佢好快就過咗嚟一齊食啲嘢。
我地兩個就係寂靜之中只係顧住食自己眼前嘅出前一丁，直到阿宇佢打破咗我地兩個之間尷尬嘅寂靜：「其實呢，aunite佢係
做咩嘅，成日都唔見佢嘅？」
「佢係喺公立醫院度做外科醫生，所以成日都唔會見到佢囉。」
「咁姐係你平時都係自己一個人喺屋企度囉。」
我點咗點頭：「咁有咩問題？」
「梗係好大問題啦！」阿宇佢好緊張咁講：「平時你都唔會同其他人有咩互動，你唯一嘅活動就只有我地四個去練習或者係去
表演之類－」
佢仲未講到一半就捭我打斷咗：「其實你咁樣同嗰啲overprotective嘅女朋友好似。」
「！」阿宇佢一瞬間塊面紅到不得了，十足十嗰啲係動漫入面嘅...好似係叫『傲嬌』嗰一類嘅角色。
「我...我...我咁樣只係因為我地係成三年朋友咋！」佢口窒窒咁講。
「只係朋友？」
「120％」
我只係歎咗口氣，「唔」咗聲，就繼續專注返我面前嘅出前一丁。
佢執好咗自己碗面之後，就直接返入間房度，剩返低我一個人係客廳。
我坐咗係張梳化，眼神空洞咁望住前面播緊新聞嘅電視。
「佢只係當我係三年朋友呀...」我嘗試將佢拋到腦後，但係我點都做唔到。
我同自己鬥咗唔幾，最後都係戴返耳機，繼續沉醉係音樂之中。
過咗唔知幾耐，我先從耳機播住音樂抽離返出嚟，原來已經係成九點半喇，我打理好埋啲嘢，就返咗入房訓。
而正當我玩周公online玩到興起嘅時候，忽然係阿宇間房度傳嚟咗尖叫聲。
「啊啊啊啊啊啊！有鬼呀！」
我被阿宇佢突然之間嘅尖叫嚇到跌咗落床，一頭撞到咗地板。
「好痛啊...」我扶住我痛到不得了嘅額頭，過咗去阿宇間房度。
正當我想打開房門嘅時候，阿宇佢唔知係咪一早就夾好咁，從房門度衝咗出嚟，又係撞到我仲未痛完嘅額頭，直接將我撞低咗，而我又好唔好彩咁隻右手想搵到門柄捉住（其實我都唔知點解我會咁做），但係偏偏捉到阿宇嘅杉。
「阿－阿明！」雖然阿宇佢想制止我，但係已經太遲了。
我回過神嚟嘅時候，雖然阿宇佢唔係好重，但係佢唔單止壓到我實一實，最唔好彩（定係好彩？）嘅係，我地嘅嘴唇正係度互
相掂住對方。如果老豆係度嘅話，佢應該笑我笑到2047掛。
唔知過咗幾多分鐘，阿宇佢先知道佢究竟處於係咩嘅處境，佢一手推開我，褪到有咁後得咁後。
「我...我...我...」阿宇佢口窒窒咁，唔知講咩好。
我扶住我而家痛得仲犀利嘅額頭：「點解你偏偏要咁啱呀...」
阿宇佢只係過嚟罵我：「你點解要拉住我件衫呀！而家我嘅初吻...」
初...初吻？！
「咁我頭先聽到喺你度有尖叫聲，所以先過嚟睇下...」
「講重點呀！！」
「我想捉住門柄保持平衡，只不過唔好彩捉到你件衫...」
「吓？！」阿宇佢好明顯無接受到我嘅解釋：「你玩我呀？」
「呃...」
自從依件事之後，我就再都無同阿宇佢有過任何對話。
（俊昇POV）
「哇...」我聽咗啟明嘅故事之後，完全唔知捭咩反應好。
啟明佢一口氣喝完先嚟到仲熱緊嘅齋啡：「我點做先好呀...」
「佢頭先先嚟嘅喎，你唔覺得太熱嘅咩？」
「點都好過我而家同佢嘅處境啦。」
我拎咗部手機，打算打捭人幫手：「其實我就係依啲方面完全無經驗，所以都係由靜詩佢嚟解決好啲，始終佢又係你嗰妹。」
而係我正當要打過去嘅時候，啟明佢一手阻止咗我：「但係我驚佢會爆出去喎，你諗下如果我而家同緊阿宇一齊住傳咗出去嘅話，後果會幾恐怖。」
「但係除咗咁樣做嘅話仲有其他辦法咩？」
「唉，希望靜詩佢唔會爆出去啦...」啟明佢明白到目前唯有依個辦法，唯有無奈地接受。
我打咗捭靜詩並同佢解釋咗而家啟明佢陷入嘅處境...越少細節越好。
「所以而家哥哥佢同旻宇佢冷戰緊呀？」靜詩整理好之後講。
「某程度上...掛，咁而家啟明佢同旻宇又唔係拍緊拖。」
「咁姐係點姐？」
「都係由啟明佢親自嚟解釋啦。」
我將手機遞捭啟明：「你嚟同佢講究竟發生咗咩事啦。」
啟明佢歎咗口氣，好緊張咁接過我部手機。
「喂？」啟明說。
「哥哥呀，你同佢究竟發生咗咩事姐，俊昇佢又講到一舊舊咁，完全聽唔明嘅。」
我雖然只係聽到佢地兩個一部分嘅對話，但係從啟明嘅表情佢就睇得出，今次依件事嘅危險程度肯定拍得住十號風球。
過咗一陣之後，啟明佢好似生意失敗咁捭返部電話我：「直接Code Red，睇嚟我同佢應該就係咁啦。」
「凡事無絕對嘅，希望在明天啊嗎。」
「唔洗用嗰個上世紀啲廣告台詞喇。」佢欲哭無淚咁望住我：「我今晚仲要同佢係同一屋簷下....」
我諗咗一陣，唯有拍咗拍佢膀頭：「呃...你依幾日睇嚟都係唯有咁樣捱住先啦，我同靜詩佢會諗盡辦法幫你嘅喇。」
啟明又歎咗口氣：「暫時唯有咁啦。」
《待續》