《名為青春的樂章》（ 逢星期日晚更新）: 第十話
我同旻宇一齊搭車時候突然間醒起：「不過...啟明佢以前係邊間孤兒院嘅？」
「呃...依個真係一個好問題呢－」旻宇講到一半好似諗起咩咁：「係喎，我地去問啟明而家嘅父母咪得囉！」
「你知道啟明住係邊？」
「咁如果唔係因為我同佢住得比較近嘅話，我一定唔會同到你地一齊夾Band。」
「咁你帶路了。」
經過一程又一程嘅西鐵同輕鐵，我地終於嚟到啟明住嘅大廈樓下。
「原來佢係住係嘉湖山莊嘅。」我說。
「無記錯嘅話...佢應係喺依座嘅。」
我跟住旻宇到咗啟明屋企門口。旻宇撳咗撳門鐘，一位大約三十歲中嘅女人出咗嚟答我地。
「宇呀？啟明佢唔係度呀。」嗰個女人有啲唔耐煩咁講。
旻宇搖咗搖頭講：「我今日過嚟唔係搵啟明佢，而係想問Auntie你一啲野。」
旻宇口中嘅Auntie仍然極之唔耐煩咁講：「咁咩事呀？問完就快啲走啦，我仲有事要煩。」
我清咗清喉嚨講：「係咁嘅，我地只係想知道啟明以前係喺邊間孤兒院，就係咁多。」
「係呀Auntie，我地想幫番啟明嘅阿妹，所以唔該可唔可以捭我地知道佢以前住係邊孤兒院。」係我隔離嘅旻宇說。
啟明阿媽諗咗一陣：「啟明佢以前係住喺...聖公會嗰間孤兒院，如果我無記錯嘅話。」
「聖公會呀...唔該曬喇Auntie。」旻宇同我一齊向啟明阿媽講。
「咁祝你地好運了。」啟明阿媽說。
我突然間醒起：「係喇，依件事可唔可以唔好同啟明講呀？」
「唔好同佢講呀...可以嘅。」
我同啟明阿媽講咗聲多謝就同旻宇一齊走咗。
我用Google Map搵咗嗰間孤兒院嘅地址：「聖公會呀，係灣仔度。」
旻宇望咗望手機講：「灣仔呀...而家已經係下奏五點喇喎，咁聽日先去喇。」
「五點喇，咁聽日先去喇。」我講完就同旻宇講咗聲"Bye"自己搭車返去。
第二日。
我一早就換好衫，同旻宇約咗係元朗西鐵站等，咁啱出門時候撞到依琳。
依琳佢同我打招呼：「俊昇，早晨呀。」
「早晨。」我講完望咗望手錶，就即刻趕到西鐵站。
「係喇！」依琳大喊，「下個星期六...」
我一路跑一路同旻宇Whatsapp，同佢講聲對唔住。
俊昇：對唔住，我要遲啲先到。
旻宇：唔洗對唔住，我都係幾分鐘前先到。
俊昇：咁要你等住先了。
大約半個鐘後，我終於到咗元朗西鐵站。
旻宇望咗望手錶：「二十分鐘，唔算太遲呀。」
「Who cares...」
「行囉，費時搞到太夜。」旻宇講完就走咗去。
「喂！」我邊跟住佢喊：「等埋我呀！」
一程又一程嘅西鐵同地鐵後，我地終於到咗啟明以前住嘅孤兒院。
「你好，請問你地嚟係有咩事呀？」孤兒院嘅職員問。
「係咁嘅，請問你地十年前係咪有一對兄妹因不明原因被兩個唔同嘅家庭收養？」旻宇問。
「兄妹呀...請等我一陣。」嗰個職員即刻係佢地嘅記錄入面搵返當時嘅記錄，「有喇，葉啟明同埋葉靜詩。請問你地要佢地嘅資料嚟做咩？」
我清咗清喉嚨：「係咁嘅，我地想知道葉靜詩究竟捭邊個家庭收養，捭佢地兩個見返對方。」
「原來係咁呀，希望你地成功喇，順便可唔可以代我問候下啟明佢呀？」佢微笑住同我地講。
「唔該曬。」我地兩個講完就一齊去啟明阿妹而家嘅新家。
我望咗望嗰個職員捭我地嘅資料：「呃...隨玉沛？點解我有種不詳預感嘅...」
「隨玉沛...個名咁熟嘅...」旻宇突然醒起，「係天宇阿媽呀！」
「係隨天宇一家收養咗佢呀，真係冤家路窄呢...」
「你同佢發生咗咩事嚟？」
「係咁嘅...」我同旻宇講咗我之前因為校運會偷走而捭天宇老豆，姐係嗰個訓導罵咗一餐，加埋我同曉欣，天宇嘅女朋友嘅事。
旻宇聽完完全唔知點答我好，「呃...咁你就唔好係佢地面前出現喇，等我嚟啦。」
我點了點頭同意。
「咁而家我地唯一要做嘅就只係過去。」旻宇講完就直接去咗隨天宇嘅屋企。點都估唔到原來佢係住係九龍嘅一間高級住宅。
「哇～」我忍唔住感歎，「原來佢係住係依啲屋呀。」
「否則佢點會性格咁壞呀？」旻宇說。
「又係嘅，富二代...」
「你就係依度等陣先啦。」旻宇講完就自己搭𨋢上咗去，剩返我一個係大堂度。
另一方面，旻宇上咗去後搵一陣後終於搵到佢屋企。
「叮噹～」
「係邊個呀。」門嘅對面傳嚟天宇嘅聲，好明顯十分之唔耐煩。
「天宇，係我旻宇呀。」
「旻宇？！你過嚟做咩呀？」雖然佢嘅語氣仍然十分之唔耐煩，不過比起之前好咗少少。
「呃...你地十年前係咪收養咗一個孤兒呀？」
天宇聽到後十分之驚訝，「你點知嘅？」
「咁我今朝去返阿明以前嘅孤兒院，希望可以搵返佢失散多年嘅阿妹，估唔到原係捭你地收養咗。」
「個世界真係細嘅姐。」天宇望向佢後面嘅房，「詩！你過一過嚟呀！」
間房傳嚟一把聲：「咩呀！」
「我朋友想見你喎！」
嗰把聲又講：「唉，等我一陣。」
好快阿詩就係佢自己間出咗嚟，好唔耐煩咁望住旻宇同埋天宇。
「呃...」旻宇唔知點開口好，「請問你係咪葉靜詩呀？」
「我叫隨靜詩，嗰個姓我晨早就無再用過喇。」
「係咁嘅。」旻宇停咗一陣，「我係你哥哥嘅朋友。」
靜詩以一種十分之冷淡嘅語氣講：「你認為我睇唔到呀？」
旻宇明白到自己講得唔係好清楚，「唔係天宇佢，而係你親生哥哥。」
「你唔係講笑掛。」靜詩完全無辦法相信旻宇嘅話。
「你阿哥叫葉啟明，am i right？」
係一邊聽住嘅天宇聽到後唔敢相信：「旻宇，你唔好同我講話啟明佢係阿詩嘅親生哥哥呀。」
「全對。」旻宇說。
「唔係掛？！」天宇喊。
「你真係知道我哥哥係邊？」靜詩問。
旻宇只係點了點頭。
「個世界真係細嘅姐。」天宇說。
「仲有一樣野。」旻宇諗咗一陣，唔知應唔應該同佢講依件事。
「咩事呀？」天宇同靜詩異口同聲咁問。
「其實你嘅親生父母唔係拋棄咗你地兩個，而係因為佢地當時已經死咗。仲有啟明佢聽到依個消息之後成個人頹到好交關。」
「咩...咩話？」靜詩依一刻完全唔知點回應好。
《待續》