《名為青春的樂章》（ 逢星期日晚更新）: 第六話
「誒？！」依琳佢好似輕咗機咁，完全唔知點答我。 「喂，依琳？」 「我得閑呀，聽日幾時呀？」從佢嘅語氣就可以聽到佢係度猶豫緊。 「其實你唔一定要去嘅，反正我本身都都無人約－」我講到一半，先醒起我咁樣咪係變相逼佢陪我去。 「既然無人約嘅話，咁我更加無理由推你啦！」 「究竟係咩發展呀...」我同自己講。 「咁幾時呀？」 我歎咗一口氣，「聽日下奏度六點掛。」 「咁我地聽日見啦！」佢講完就Cut咗線。 我灘係張床，望住天花板，而另一個我又出咗嚟。 「做咩姐。」我說。 「加油喇，反正你一直都Feel到佢鐘意你嘅。」 「我係有少少Feel到，只不過頭先先放棄咗曉欣，而家咁真係好人渣。」 「你一直都無真心鐘意過曉欣佢，只不過係你想從佢度搵返以前同依琳一樣嘅感覺姐。」 我又歎咗一口氣，「咁我咪仲人渣。」 「咁你而家決定繼續同曉欣佢做朋友，佢都唔會有咩抗議嘅。」 我拍咗拍自己塊面，「好啦！我聽日就同依琳一齊出去喇！」 第二日，我如常咁食咗個早餐，返到間房後就換好衫，係間房度等。 「其實你好似早咗啲囉。」另一個我同我講。 我睇咗睇手錶，而家只不過係十二點，我唯有睇住手機，等到六點鐘。 一到六點鐘，我即刻執好所有野出門。咁啱依琳又係而家出門。 「本來仲打算打捭你話係邊度等，睇嚟而家唔洗喇。」我說。 「唔，咁行喇。」 我地兩個去旺角期間同之前一樣毫無交流，不過氣氛比起之前好咗好多。 「其實你點解唔去搵曉欣呀？」依琳問。 「因...因為...」我一時間唔知點答佢好。 「你其實係咪真係鐘意佢嘅？」 「咁人地本身就有男朋友，而且因為同佢表白件事，搞到我地兩個嘅關係咁差...」 「咁姐係你放棄咗佢啦，係咪？」 「係。」我答。 依琳佢歎咗一口氣，「你真係一個好奇怪嘅人呢。」 「可能掛，但係你肯同我出嚟咪一樣奇怪。」 「咁我又真係奇怪嘅...係喇，一陣間做咩好呀？」 「死喇，我完全無諗過做好添。」我心諗。 「呃...不如...一齊去...」 「其實我無所謂嘅，只要係同你一齊就得喇。」 佢突然間咁講搞到我唔知點算好。 「咁呀...到時先算喇！」我說。 「吓...」佢好失望咁同我講。 「呃...咁真係要嘅話，就去行人專用區度，睇下人地啲Show，一嚟可以從佢地學到嘢，然後臨到十二點時候就維港度睇下煙花之－」 我都未講完，依琳就喊：「就咁喇！」 雖然由細到大，依琳嘅性格係有啲怪嘅，不過今日佢唔知咩事咁，特別興奮。 「可能係因為同自己鐘意嘅人一齊出街，所以先咁興奮掛...」我同自己講。 自從夾咗Band，我地兩個重新聯繫番，佢就好似特別關心我咁，本來我認為只不過係因為我地係青梅竹馬，不過最近佢嘅行動真係超越咗朋友嘅關心，比較似病嬌多啲。 我搖咗搖頭，清理好自己嘅思維，原來己經到咗尖東站，我同依琳一齊轉地鐵，去到行人專用區度。我地兩個係度周圍行下，雖然九成『表演』都係大媽『唱歌』，走音到不得了，話係對我地嘅 折磨只不過係輕描淡寫。 「我而家真係好後悔同意你嘅建議囉。」依琳冚住對耳同我講。 「我都好後悔。」 我地兩個跑到附近嘅商場，再諗做咩好。 「咁欣賞表演嘅計劃就...」我說。 「CANCEL！」 「咁先係附近行下喇。」 依琳點了點頭。 我地兩個一齊去咗附近嘅一間琴行睇下啲樂器。 「係喇，之前你嘅Bass係咪斷咗鉉嘅，不如我幫你買過一套新嘅？」我問。 「唔洗，我之前就換咗套新嘅喇。都係去第二度喇。」 「唔。」我說。 之後我地兩個唔知點解去咗間眼鏡店、 書店、精品店等等。過咗唔知幾耐，佢先開始覺得悶。 「係喇，而家幾點呀？」依琳問。 我睇咗睇手錶，原來己經係十一點半。 「己經係十一點半喇，咁快啲行囉。」我說。 「唔。」 我地兩個好快就趕到維港度，雖然唔似係港島咁，不過依度都係人山人海，而我地就因為太遲先到，唯有係文化中心出面嘅樓梯度坐住。 「Sorry，因為我而搞到而家要係依度...」依琳說。 我望咗望夜空，「唔洗道歉，有時候用另一個角度嚟睇一樣嘢都幾好呀。」 「又係嘅...係喇，仲有幾耐就到十二點呀？」 我又望咗望手錶，而家係十一點五十九分。 「大約三十秒左右。」 依琳佢無答我，只係望住夜空。 忽然煙花「呯」嘅一聲，嚇咗我一跳。 依琳佢拎轉頭望住我，同我講：「Happy New Year！」 「Happy New Year！」 「咁唯一要煩嘅就係假期之後嘅考試姐。」依琳說。 「哇，你真係最鐘意破壞氣氛姐。」 「咁Sor囉。」 我笑咗一笑，同佢講：「咁返去啦，費事人地擔心。」 「唔，行囉。」佢笑住同我講。 《待續》