《名為青春的樂章》（ 逢星期日晚更新）: 第四話：第一次捭人約出街
自從個一次練習後，我地每個禮拜六日都會到阿Sam度練，而我地嘅合拍程度都進步神速。而且我同啟明都不停地寫歌，每次練習都最少寫好兩首。
十二月二十四號，我地一如平常咁練習。
「聽日就係聖誕節，大家不如一齊出嚟玩下喇。」啟明說。
「聽日呀...我應該得閑。」旻宇說。
「我個日無嘢做。」依琳說。
「Sor，我個日有約。」我說。
「你居然有人約？！」旻宇有啲驚訝。
「是咁的...」我同佢地解釋係咩事。
兩日前，曉欣佢突然捭咗張紙條我，我打開咗嚟睇，原來佢想約我聖誕節個日一齊去睇戲。
「曉欣，你其實唔使捭張紙條我嘅，直接問我咪得囉。」我主動去搵曉欣說。
「咁你個日得閑？」曉欣說。
「55，我個日全日無嘢做，一定陪到你嘅。」
「咁聖誕節個日係屯門西鐵站V City出口度等啦，不見不散。」
「不見不散。」
聽完之後，佢地並無任何特別嘅反應。
「所以你個日約咗佢呀，咁我地三個自己去慶祝喇。」依琳說。
「咁俊昇，我地祝你早日出pool啦。」啟明同旻宇異口同聲咁講。
「呃...」
個日練完習後，我同依琳一齊係屋企附近嘅公園坐一陣，而佢就主動問我關於我同曉欣嘅事。
「係啦，你打算幾時同佢表白？」
「表白啊~或者遲啲考試最後一日掛。」
「唔，咁你打算Whatsapp定係親口講？」
「我點會Whatsapp告白姐，搞到我好似好無誠意咁。」我好大聲咁講。
「其實你揀係考試最後一日真係好奇怪囉，都係元旦之類嘅節日好啲。」
「元旦啊...我真係無咩勇氣約佢出嚟告白。」
「無勇氣告白嚟做嘜。」依琳佢對我咁嘅舉動有啲嬲。
「好喇好喇，我就元旦個日同佢告白。」
我腦海中突然對依琳對我嘅態度有啲懷疑。
「係喇。」
「咩事？」
「點解你同我明明只係最近先聯絡番，而你又咁關心我嘅？」
「呃...咁我同你識咗咁耐，想你出到Pool。」依琳佢好心虛同我講。
「無啦啦咁關心我？」
「係...係呀！」佢依一刻根本就係教科書式嘅傲嬌。
我用盡辦法忍住笑意，雖然真係好難。
「無嘢喇，返去啦。」
「哦。」
我地兩個最後同平時一樣返到屋企。
另一邊，依琳佢返到屋企後直接衝到自己床度，個頭埋落個枕頭度。
「黃依琳呀黃依琳，你搞咩呀！」係依琳心入面不斷重複住依一句。
第二日，我一早就係屯門站V City個出口等住曉欣，好彩曉欣佢係一個守時嘅人，好快就到。
「咁行囉。」曉欣佢拖住咗我隻手講。
我做人十四年，第一次捭我阿媽以外嘅女仔拖住我隻手，真係好緊張。我用盡辦法冷靜落嚟同佢一齊去電影院。我地諗咗一陣，最後決定一齊去睇《帶我去月球》。
套戲講咩六個中學死黨因為鐘意一個女仔而去夾Band，而後過咗二十年個主唱過到一塌糊塗，而後又咩鐘意佢嘅結他手無啦啦返到二十年前之類...基本上就係而家大部分嘅青春校園電影嘅老梗加埋時空穿越。
連平時無點睇戲嘅我都覺得好悶，但係我同到佢一齊睇，咩都值得。
睇完戲後，我就同曉欣一齊去咗附近嘅餐廳食啲嘢。食到一半佢突然從手袋入面囉咗啲嘢捭我。
「Merry Christmas!」佢好開心咁同我講。
我因為係第一次收人地禮物，連我都feel到面好紅。
「多...多謝。」
「收禮物姐，唔使咁怕羞嘅。」曉欣佢笑住同我講。
「咁我...我係第一次...」我說。
曉欣佢聽到我咁講忍唔住笑咗出嚟，佢嘅笑容真係好靚。
「呃...你係度笑咩呀？」
「咁你怕羞嘅樣真係好可愛。」曉欣佢好快冷靜咗落嚟同我講。
我聽到依句個腦直接輕咗機，唔知點答佢好。
「Sor，我好似搞到你好尷尬咁...」
「無嘢，咁埋單喇。」
「唔。」
我地埋完單後，同對方講咗聲"Bye"後就各自返屋企喇。不過正當我想去入閘時，我聽到後面有幾把熟悉嘅聲。
「依琳，講真我地咁就嘥咗成個聖誕節，值得咩？」
「咁我都係好唔放心俊昇佢。」
「咁點解你又要拉埋我地落水姐？」
「呃...」
我拎轉頭一望，不出所料，係依琳、啟明同旻宇三個。
「你地三個係度做咩呀？」
「呃...無...咩...」依琳佢好心虛咁答。
「唉，啟明、旻宇，你地先返去喇。」佢地點了點頭就走咗，得番我同依琳。
我睇咗睇手錶同依琳講：「都係夜晚七點啦，返去喇。」
「唔。」
我地兩個返去屋企期間同琴日一樣毫無交集，咁樣落去真係會好大件事嘅。
我諗咗一陣，決定問佢究竟咩事。
「其實你講真點解咁關心我同曉欣嘅事？」
「呃...咁...係因為...」
「多年朋友，Right?」
依琳佢點了點頭。
雖然一切好似平常咁，但係我地之間好似多咗一種距離。
我返到屋企，係間房諗咗好多嘢，同依琳嘅事，同曉欣嘅事。我望咗望日曆，最後都係決定係元旦同曉欣表白。
我拍咗拍自己塊臉，同自己講：「...都係聽日先諗點算喇。」
另一方面，依琳佢坐係自己張床，望住自己以前同俊昇影嘅相。
「估唔佢居然早過我出pool...唉，都係聽日先諗點算喇。」
《待續》