【愛情/輕甜】☺我的鄰家女孩☹: 二、〈 印象中的她 〉

 二、〈 印象中的她 〉

印象中嘅佢，係一個好活潑開朗又男仔頭型格嘅女仔，第一次見佢，就比佢搶左我部滑板車黎玩，果陣嘅我唔識反抗，所以「被迫」借比佢。之後我發覺佢唔似我D小學同學咁欺凌我，一開始係我人生第一次有「朋友」嘅感覺，唔通呢D就係學校所講嘅友誼? 最初可能係。
 
雪，當我去旅行親眼見到飄雪嘅情景，就即刻回想起呢段長兩年、唯一嘅愉快童年回憶。
 
雪瑩好中意笑，佢嘅笑容無人能及，真係有感染他人力量，而被佢感染嘅人就係我。其實當初只要我行開，就唔會再同佢有任何交集，成為公園遇到嘅一個陌生人。
 
但我拒絕唔到佢嘅笑容，我想繼續望住佢嘅笑容，微微上揚嘅嘴角，如果我拒絕左佢，就唔會再有機會正面近距離感受佢嘅笑容。一個咁令人溫暖嘅女仔，點解我會用「雪」黎形容佢? 佢嘅皮膚白皙，潔淨無瑕，可以好暴力又可以好溫柔，同雪一樣。佢講過，個個都叫佢瑩瑩，得我叫佢雪雪，佢覺得唔好聽，我更加熱衷咁叫佢，好小學雞，諗落我應該係想佢記得我呢個特別嘅存在，我想成為佢心入面特別嘅存在。
 


我已經唔同以前，識佢嘅時候我仲係個怕醜仔，依家待人接物好左，識睇人面色，識阿諛奉承，其實我都唔知係咪叫進步。人越大，帶嘅面具越多，應該都係一件正常事啊?
 
不過如果比我再見翻佢，第一句應該講咩呢? 我成日都會咁諗。
 
「哈囉，雪雪，好耐冇見，點解果陣妳冇再黎公園嘅? 」
 
「嗨，好耐冇見。」
 
「嗨，妳搬左屋?」
 


「嗨」
 
「我好掛住妳」
 
「我好掛住同妳一齊嘅時光」
 
「其實我一直都好想見翻妳」
 
 妳究竟去左邊…
 


 
.
.
.