【愛情/輕甜】☺我的鄰家女孩☹: 三、〈 新鄰居 〉

三、〈 新鄰居 〉


「媽。」
 
「翻黎喇，飲湯啊，記住等陣洗埋隻碗。」
 
「嗯，得啦。」
 
「對面好似搬左戶人入黎，今日見到個同你差唔多大嘅女仔幫手搬家俬入屋。瘦瘦削削又白白淨淨咁，睇唔出佢咁有力水。」


 
「係咩…」
 
「見到人記住打聲招呼啊，唔好失禮人，岩喇，聽日你幫手送D西餅比對面。」
 
「媽…我聽日要翻學放4半，之後仲要去敏晴度私補啊…」
 
 
「唉叫你做少少野都嫌三嫌四，夜喇，我翻房訓。」
 


「…」
 
 
 
 
 
 
「軒哥! 呢題應該點做啊?」
 
「軒哥~ 呢題呢?呢題呢!」


 
「軒哥~」
 
屌，條女真係好撚煩。
 
如果唔係我啊媽同佢阿媽熟，打死我都唔會接呢份私補，條女又肥又唔知自己柒，成日特登癡身癡世。人私補我私補，我搞到好似賣埋身咁，話曬都係大學生，啊媽個「街坊價」，嗚! 究竟我要作賤自己到幾時…
 
「喂! 軒仔! 做咩發曬呆咁啊? 仲唔快D幫敏晴解題? 我比左錢你架!」
 
我屌你老母。
 
唔得，太重口，收翻。
 
「啊啊唔好意思啊李太，今日翻完全日有少少攰遮。敏晴啊，呢題應該咁….」
 


「哇好犀利啊軒哥! 我完全冇諗到可以咁解啊! 」
 
7:30PM
 
唉!
 
終於走得!
 
敏晴住我屋村隔離樓，所以我落樓再上翻樓就翻到屋企。
 
拖住疲倦嘅身軀，一諗到翻到去又要幫班 free-ridersss執手尾，我個腦都就黎hang機。
 
 
到大堂門口，要撳密碼鎖。
 


呢個時候有個女仔推住幾膠箱，係門口前面停低左。佢身穿熱褲T-shirt，我估佢唔記得左密碼所以先停左係度。
 
「密碼4685啊! 前幾日先改左!」
 
我幫佢開門。
 
「唔該。」
 
個女仔望都冇望我一眼，好冷淡，然後再冇同我有任何交流。
 
見到佢咁辛苦一個女仔推幾個膠箱，我忍唔住問佢洗唔洗幫手，佢一口拒絕，然後我地就好尷尬咁一齊等lift，可能得我尷尬遮。
 
一入lift，我撳左25樓，咁岩同層陳師奶都係度，又要同佢嗲兩句。
 
「軒仔? 讀緊大學喇?」


 
「係啊。」
 
「咁咪好囉! 最緊要生性做人…唔好好似我個仔咁啊! 書又讀唔成，成日係屋企打機，唉! 如果佢有你一半就好喇!」
 
「…哈哈」
 
「聽講你同李太個女敏晴補緊習喔，不如你都幫我個仔補下英文啊? 街坊一場，收平D得唔得啊?」
 
「啊… 我最近學校功課有D忙，應該冇咩時間再幫你個仔補喇，唔好意思啊!」
 
「係啊… 真係可惜」
 
屌，又想攞我著數?
 


收皮啦好嗎?
 
 
25樓
 
「好啦唔講喇! 掰掰!」
 
「掰掰!」
 
呼! 終於走左，我覺得我笑到有D面容扭曲，跟住我發覺出lift嘅唔單只我同陳師奶，頭先個女仔都好努力咁推緊佢D膠箱出lift。
 
「你比我幫你啦!」
 
講完我一手將D箱推出部lift。
 
「你住幾號? 好似冇見過你嘅?」
 
「2505」
 
「下，我住03架，即係你對面啊，原來你就係新搬黎果戶人。」
 
「啊我阿媽叫我攞D西餅過黎同你地打個招呼，你等我一陣」
 
 
行到門口
 
我攞鑰匙開門，佢都擰轉面攞鑰匙開門。
 
「翻黎喇?」
 
「係啊，媽，你係咪有西餅啊，我撞到對面個女仔啊!」
 
「咁岩?係雪櫃啊，成盒攞過去啦!」
 
「哦」