【愛情/輕甜】☺我的鄰家女孩☹: 一、〈 童年回憶 〉

一、〈 童年回憶 〉


小男孩6歲，小女孩6歲。

公園
 
小男孩踩著滑板車，小女孩拍著小皮球。
 
「我地不如交換玩啊?」小男孩第一次看見如此燦爛的笑容。


 
「哈囉我叫雪瑩啊，你叫咩名啊?」
 
「我…我叫浩軒。」小男孩害羞地把臉別了過去
 
「你做咩自己一個嘅? 冇朋友陪你咩?」
 
「嗯…我不嬲都自己一個嘅，嘻嘻。」
 
小女孩若有所思。


 
「你住邊架? 」
 
「吓? 咁咪即係住我隔離? 又會咁岩嘅! 我地以後約出黎玩啦不如! 就咁話啦!」小女孩轉身就拿了男孩的滑板車滑來滑去。
 
.
.
.
「我聽日5點會落黎公園玩架，我地係… 呢個滑梯下面等啦! 不見不散!」
 


「嗯…」
 
 
 
小男孩7歲，小女孩7歲。
 
「嘻嘻! 今日我帶左之前老豆買比我嘅生日禮物，遙控飛機出黎啊! 你睇!」
 
「女仔唔係中意咩Hello Kitty、熊啤啤架咩… 哎呀! 雪雪你做咩打我啊!」
 
「咁證明我唔係普通女仔! 嘻嘻! 仲有啊，做咩叫我雪雪，明明個個都叫我瑩 
  瑩，聽落好怪囉! 」女孩開始低頭研究手上的遙控。
 
「一D都唔怪! 因為… 因為我覺得你同雪好襯… 一樣咁靚… 」
 


「你講咩話? 咁細聲我聽唔到啊… 啊! 得左喇! 原來係粒電鬆左，宜家可以玩  
  啦!!」女孩一臉雀躍。
 
 
小男孩8歲，小女孩8歲。
 
「媽咪! 你有冇見過雪… 瑩瑩佢啊? 呢排好似成日都冇見佢係公園…」
 
「之前你成日同佢玩果個女仔? 可能人地唔得閒呢… 你都唔好成日落公園玩喇，就黎考試，你唔考好D，點做阿妹榜樣啊? 上次考試科科得七十幾分，仲唔係你落公園玩到個心散曬? 下次測驗之前都唔準你落去玩!」
 
「下… 哦…」
 
.
.
.


 
我比阿媽門禁足足三個月，細個又冇電話，落公園識嘅朋友都冇個搵得翻。三個月之後，我再冇見過雪瑩，佢就好似係我面前消失左咁，以當年嘅情況黎講，其實都算幾正常，我諗呢個世代嘅每個90後都總有一兩個係公園識嘅朋友仔，咁岩同一時間落公園，又咁岩之後時間唔夾，突然進入你嘅世界，又突然離你而去。以前手機冇依家咁普及，宜家連個5歲嘅細路都可能有部 Iphone，真係咪話唔驚。
 
由細到大阿媽阿爸淨係灌輸「讀書就係一切」嘅概念比我，讀得成書，你就爭氣，你就可以做阿妹個榜樣，你就會成功，其實佢地只不過想我讀到大學，威比班街坊睇，因為住公屋嘅，有幾多個細路係生性做人，循規蹈矩啊? 夢想? 我冇啊，其實都冇咩所謂嘅，老豆老母開心就好，話曬佢地都養到我咁大，配合下，做場大戲讀好少少書，等佢地有面，又唔會管得我太多，都未嘗唔係一件好事嘅。

雪雪可以話係我人生第一個「朋友」。係屋企，我只係一個細妹嘅榜樣，同未來嘅家庭支柱；係學校，我係一個沉默寡言，戴眼鏡嘅死書蟲。


 
「今次英文測驗，浩軒又係我地最高分，大家要好好向浩軒學習啊!」



「都唔知佢係咪收買老師」
 


「威啦次次一百分」
 
「佢份人好悶囉，淨係識讀書」
 
「正書蟲」
 
 
呢D說話我由細聽到大，甚至直到初中，都仲有一部分人係咁，只能說腦袋是一個好東西，但不是每個人天生擁有。六歲嘅時候，我全科考到一百分，好多街坊嘅小朋友都同我讀同級，免費幫我唱通街，個個都問我老豆老母有冇比咩獎勵我，結果佢地就揀左部豪華滑板車，叫我自己落街玩，原因我都知嘅，咪就係夠曬張揚，等個個都知佢地有論功行賞，我係大家認知中嘅一等一「乖仔」、「叻仔」，而佢地就係「好父母」。
 
 
但就係因為咁，比我遇到雪瑩。